TËNË SO AYE TI TENE NYEN?

Ti hinga mo wani aye pëpe ti sara gï tënë ti iri ti mo, konongo ti mo nga na pendere ti mo. A ye nga ti tene ti hinga asarango ye wa la na lê ti mo ayeke nzoni wala sioni, ti hinga aye so mo mä na bê na ni nga ti hinga fason ti sarango ye ti mo. Biani, ti hinga mo wani aye ti tene ti hinga ye kue so andu mo wani.

NGBANGA TI NYEN A YEKE KOTA YE?

Tongana mo hinga mo wani bien, mo yeke zia si amba ti mo la afa na mo aye so mo doit ti sara ape, me mo yeke luti nganganga na ndö ti aye so na lê ti mo ayeke nzoni wala sioni.

“Azo mingi ayeke tongana aye so a leke na forme ti zo si a yeke zia ni na yanga ti amagazin ti kango bongo. Ala wani la asoro abongo so ala yü ape, a yeke ambeni zo la asoro ni si ayü na ala.”—Adrian.

“Mbi ngbâ gï ti sara ye ti nzoni même na ngoi so ayeke ngangu. Mbi peut ti hinga avrai kamarade ti mbi na lege ti fason ti ala nga na lege ti sarango ye ti mbi tongana mbi yeke na terê ti ala.”—Courtney.

MAMA-NDIA TI BIBLE: “Ala zia ti mû lege na aye ti ngoi so ti changé sarango ye ti ala, me ala changé na lege so ala sara si bibe ti ala akiri fini ni.”—aRomain 12:2.

YE SO MO PEUT TI SARA

Gi ti hinga asarango ye so mo yeke na ni fadeso nga na ati so mo ye ti duti ande na ni na lege so mo yeke gi ti hinga aye so mo kpengba dä, aplace so mo woko dä nga na aye so mo yeke na kite na ndö ni ape. Nzoni fason ti komanse ti sara ni ayeke ti hunda terê ti mo na ahunda so ayeke na gbe ni ge so.

Aye so mo kpengba dä: Aye wa la mbi hinga ti sara ni nzoni? Aye wa la mbi bâ so mbi yeke fort na ni (Na tapande: Eskê mbi yeke sara ka ye na l’heure? Mbi hinga ti kanga nzara ti bê ti mbi? Mbi ye kua mingi? Mbi yeke mû ka ye na zo?) Aye ti nzoni wa la mbi yeke sara ka ni?

WANGO: A yeke ngangu na mo ti hinga ambeni nzoni ye so mo sara? Hunda mbeni fami ti mo wala mbeni kamarade ti mo so mo sara confiance na lo ti tene na mo ambeni ye ti nzoni so lo bâ na terê ti mo, na nyen la asara si lo tene tongaso so.

MAMA-NDIA TI BIBLE: “Zia zo oko oko atara kua ti lo ti bâ wala a yeke tongana nyen, tongaso si lo duti na ngia ndali ti kua ti lo wani, me na hakango terê ti lo na mbeni zo nde pëpe.”—aGalate 6:4.

Aye so mo woko dä: Nyen la mbi doit ti sara effort ti changé ni na yâ ti sarango ye ti mbi? Na angoi wa la bê ti mbi apeut ti pusu mbi ti sara mbeni ye ti sioni? Na yâ ti aye wa la a lingbi mbi kanga nzara ti bê ti mbi dä mingi?

MAMA-NDIA TI BIBLE: “Tongana e tene: ‘E yeke na siokpari pëpe,’ e handa terê ti e wani.”—1 Jean 1:8.

Aye so mo yeke na kite na ndö ni ape: Anzoni sarango ye wa la mbi yeke gi ti duti na ni, nga ngbanga ti nyen la mbi ye ti duti na ni? Eskê mbi mä na bê na Nzapa? Nyen la afa na mbi biani so Nzapa ayeke dä? Asarango ye wa la mbi bâ so ayeke na lege ni ape, nga ngbanga ti nyen la aye ni so ayeke na lege ni ape? Nyen la mbi hinga biani so ayeke si ande na yâ ti angoi so ayeke ga?

MAMA-NDIA TI BIBLE: “Nzoni gbungo li so mo yeke na ni ayeke bâ ndo na ndö ti mo, nga bango yâ ti aye nzoni ayeke bata mo.”—aProverbe 2:11.