TËNË SO AYE TI TENE NYEN?

So mo yeke babâ wala mama, ambeni sarango ye ayeke dä so mo ye ti duti na ni. Na tapande, mo ye ti sara kue ti sara ye na lege ni na yâ ti aye kue. Tongana a yeke tongaso, peut-être mo yeke gi nga ti fa na amolenge ti mo ti tene ala kue asara tongaso.

Peut-être mo ye nga ti fa na ala so a yeke kota ye ti hinga ti sara kua, ti duti azo ti confiance nga ti pensé na amba ti ala; a yeke ambeni sarango ye so tongana molenge angbâ kete ayeke ngangu na lo mingi ape ti duti na ni.

MAMA-NDIA TI BIBLE: “Fa na molenge lege so a yeke nzoni lo mû; même na ngoi so lo ga mbakoro, lo yeke zia ni pëpe.”—aProverbe 22:6, kete tënë na gbe ni.

NGBANGA TI NYEN A YEKE KOTA YE?

So sarango kua na internet, ordinateur nga na atéléphone amû ndo laso, a yeke kota ye ti duti na anzoni sarango ye. Karyn so ayeke mbeni mama atene: “Na ngoi kue, zo apeut ti wara asioni ye na ndö ti aye tongana téléphone wala ordinateur. Amolenge ti e apeut ti duti même na terê ti e, na ala yeke bâ mbeni ye so ayeke na lege ni ape!”

MAMA-NDIA TI BIBLE: “Abiazo [ayeke] . . . na ngangu ti gbungo li ti ala [so] aga nzoni awe ti hinga popo ti ye ti nzoni na ye ti sioni.”—aHébreu 5:14.

A yeke kota ye ti pensé na mba. Ye so aye ti tene nga ti tene akete kete tënë tongana “pardon” nga na “merci” na ti fa na amba ti mo so mo pensé na ala. A yeke ambeni tënë so azo mingi ayeke tene ni encore ape, so fadeso aye so agbu bê ti azo ayeke gï aye tongana téléphone, ordinateur nga na ambeni ye ni nde.

MAMA-NDIA TI BIBLE: “Gï tongana ti so ala ye azo asara na ala, ala sara tongaso na azo ni nga.”—Luc 6:31.

YE SO MO PEUT TI SARA

Fa anzoni sarango ye ni polele. Na tapande, awandara atene so tongana a fa polele na amaseka so bungbingo koli na wali kozo ti sara mariage ayeke na lege ni ape, ala yeke bata terê ti ala.

WANGO: Sara kua na mbeni ye so alondo ti passé ti komanse lisoro na molenge ti mo na ndö ti nene ti duti na anzoni sarango ye. Na tapande, tongana a si so na radio wala na télé asara tënë ti mbeni zo so a fâ lo, mo peut ti tene: “A yeke tâ sioni mingi ti bâ tongana nyen la ambeni zo ayeke sara ye tongaso. Mo pensé nyen la asara si azo sara ye tongaso?”

“A yeke ngangu na amolenge ti sara kangbi na popo ti ye so ayeke nzoni na sioni tongana ala hinga pëpe nyen la ayeke nzoni wala sioni.”—Brandon.

Fa na amolenge ti mo ti pensé na amba ti ala. Même akete molenge apeut ti manda ti tene “pardon” nga na “merci” na ti fa so ala pensé na amba ti ala. Mbeni mbeti (Parenting Without Borders) atene: “Tongana amolenge abâ so gigi ni ayeke gï ala oko ape, me so ala yeke zo ti yâ ti mbeni sewa, ti mbeni ekole, ala yeke na yâ ti mbeni kodro so azo ayeke dä, a yeke sara si ala yeke sara aye so alingbi ti sara nzoni na amba ti ala, me gï na ala wani ape.”

WANGO: Mû akua ti yâ ti da na amolenge ti mo ti sara, tongaso si ala manda nene ti sara kua ndali ti amba ti ala.

“Tongana amolenge ti e ahinga ti sara akua ti yâ ti da fadeso, a yeke sara si ala yeke gi bê ti ala ape tongana ala vivre mbeni lâ na yâ ti da ti ala wani. Ala hinga ti bâ lege ti terê ti ala awe.”—Tara.