TËNË SO AYE TI TENE NYEN?

Tongana mbeni zo ayeke zo ti confiance, babâ na mama ti lo, akamarade ti lo nga na patron ti lo kue ayeke sara confiance na lo. Lo yeke sara ye alingbi na andia, lo yeke sara ye alingbi na tënë ti yanga ti lo nga lakue lo yeke tene tâ tënë.

NGBANGA TI NYEN A YEKE KOTA YE?

Mingi ni tongana a mû na mo liberté mingi, andâ a sara confiance na mo mingi; me tongana a mû na mo liberté mingi ape, andâ a sara confiance na mo mingi ape.

“Nzoni lege ti sara si babâ na mama ti mo asara confiance na mo ayeke ti fa na ala so mo yeke sara ye tongana kota zo nga ala peut ti sara confiance na mo, atâa ala yeke na terê ti mo wala pëpe.”—Sarahi.

MAMA-NDIA TI BIBLE: “Ala duti na nzoni sarango ye.”—1 Pierre 2:12.

YE SO MO PEUT TI SARA

Tongana mo ye si a sara confiance na mo mingi wala a kiri a sara confiance na mo, awango so na gbe ni ge so apeut ti aidé mo.

Tene tâ tënë. Tongana mo tene mvene, hio azo ayeke sara confiance na mo encore ape. Me tongana mo tene tâ tënë nga mo kanga ndö ti afaute ti mo ape, azo ayeke sara confiance na mo.

“Tongana aye atambela nzoni, a yeke facile ti tene tâ tënë. Me, tongana mo tene tâ tënë na ndö ti mbeni ye so apeut ti sara si azo abâ mo na nzoni lê ape, hinga biani so azo ayeke sara ande confiance na mo mingi na pekoni.”—Caiman.

MAMA-NDIA TI BIBLE: “Ngbanga ti so e ye ti sara ye mbilimbili na yâ ti aye kue.”—aHébreu 13:18.

Duti zo so a peut ti sara confiance na lo. Na États-Unis, awandara abâ so tongana mbeni ndokua aye ti mû zo na kua, ye so ala yeke gi kozo ayeke ti bâ wala zo ni ayeke zo ti confiance. Tongana mo gi laso ti duti mbeni zo so a peut ti sara confiance na lo, a yeke aidé ande mo tongana mo kono.

“Tongana mbi yeke sara ye na lege ni nga mbi yeke sara akua so a mû na mbi sân ti tene lakue a rappelé ni na mbi, babâ na mama ti mbi ayeke bâ ni. Tongana mbi sara tongaso lakue, ala yeke sara confiance mingi na mbi.”—Sarah.

MAMA-NDIA TI BIBLE: “Mbi hinga na bê ti mbi kue so mo yeke sara ande ye so, . . . na mbi hinga so mo yeke sara ni même ahon ti so mbi hunda so.”—Philémon 21.

Kanga bê. A yeke facile ti tene azo abâ tongana nyen la mbeni maseka ayeke kono, me a hunda ngoi ti bâ tongana nyen la lo yeke ga mbeni zo so a peut ti sara confiance na lo.

“Ti tene babâ na mama ti mo wala amba ti mo asara confiance na mo, a hunda ngoi nga a hunda effort mingi. Me mo peut ti gue na ala yeke yeke ti sara confiance na mo, tongana lakue mo fa na ala so mo yeke zo ti confiance.”—Brandon.

MAMA-NDIA TI BIBLE: “Ala yü . . . kangango bê ti ku.”—aColossien 3:12.