Mo diko a-article ti Tour ti Ba Ndo so asigi ade ti ninga ape so? Bâ wala mo lingbi ti kiri tënë na ahundango ndo so ge:

Tongana nyen la Bible afa so Nzapa ayeke zia terê ti lo na place ti e?

Na ngoi so azo ti Israël ti giriri ayeke lani angbâa na Égypte, Nzapa abâ vundu ti ala nga ason lo (Ex. 3:7; És. 63:9). Nzapa asara e na image ti lo, na e lingbi ti zia terê ti e na place ti azo. Lo zia terê ti lo na place ti e même tongana e bâ so e kpa ape ti tene lo ndoye e.​—wp18.3, l. 8-9.

Tongana nyen la afango ye ti Jésus amû maboko na azo ti hon ndö ti kengo zo senge senge ndali ti mara ti lo?

A-Juif mingi na ngoi ti Jésus ayeke ke lani azo senge senge ndali ti mara ti ala. Christ afa nzoni mingi so a lingbi zo asara terê ti lo kete nga lo fâ ngbanga na ndö ti kengo zo senge senge ndali ti mara ti lo. Lo wa lani adisciple ti lo ti bâ amba ti ala tongana aita.​—w18.06, l. 9-10.

Nyen la e manda na ndö ti raison so Nzapa azia lege pëpe na Moïse ti lï na Sese ti Zendo?

Moïse ayeke lani na kpengba songo na Jéhovah (Deut. 34:10). Nduru na hunzingo ti ngu 40 so azo ti Israël asara na yâ ti benyama, ala kiri adema ti use ni ndali ti ngu so ayeke dä ape. Nzapa atene na Moïse ti sara tënë na kota tênë. Me Moïse apika kota tênë ni. Peut-être bê ti Jéhovah ason ndali ti so Moïse asara pëpe ye alingbi na yanga so lo mû na lo wala peut-être ndali ti so Moïse amû gloire na Nzapa ape ndali ti miracle ni (Nom. 20:6-12). A lingbi ye so afa na e so a yeke kota ye ti mä yanga ti Jéhovah nga ti mû gloire na lo.​—w18.07, l. 13-14.

Ngbanga ti nyen la a lingbi ti duti ngangu ape ti fâ ngbanga na ndö ti zo alingbi na ye so lê abâ?

Ambeni ye ota ayeke dä so na yâ ni ye so lê ti zo abâ ayeke sara ngangu na ndö ti azo mingi: mara ti zo wala kodro ti zo, mosoro nga na ngu ti zo. A yeke kota ye ti tene e bâ azo tongana ti so Nzapa so asara kangbi na popo ti azo ape ayeke bâ na ala (Kus. 10:34, 35).​—w18.08, l. 8-12.

Na ambeni lege wa la aita-koli so ayeke ambakoro alingbi ti mû maboko na azo?

Nzapa angbâ ti bâ mbeni ita-koli so ayeke mbakoro so kua ti lo achangé na nene ni mingi nga lo lingbi ti sara aye mingi ti mû maboko na azo. Lo lingbi ti gi ti mû maboko na koli wala wali ti mbeni ita so ayeke Témoin ape, ti mû maboko na aita so afa tënë encore ape, ti manda Bible na azo nga ti fa tënë na alege nde nde.​—w18.09, l. 8-11.

Agbakuru wa la aChrétien ayeke fa na ye na azo?

Agbakuru ni ayeke acarte ti jw.org nga na ambeti ti tisango ndo, atract miombe so a leke ni pendere nga na Tour ti Ba Ndo na Zingo na lango! Na popo ti agbakuru ni a yeke wara nga ambeni brochure, abuku use ti manda na Bible na azo nga na avidéo osio, so mbeni oko ayeke Ndani nyen ti manda Bible?​—w18.10, l. 16.

Tongana nyen la mbeni Chrétien alingbi ti “vo tâ tënë” tongana ti so aProverbe 23:23 atene?

E lingbi ti vo tâ tënë na nginza ape. Ye oko, a lingbi e mû ngoi mingi nga e sara ngangu si e wara ni.​—w18.11, l. 4.

Nyen la e lingbi ti manda na lege ti sarango ye ti Osée na mbage ti wali ti lo Gomer?

Fani mingi Gomer asara lango-sioni, me Osée apardonné lo na lo ngbâ na lo. Tongana koli wala wali ti mbeni Chrétien asara lango-sioni, lo so asara ye oko ape alingbi ti pardonné lo. Tongana koli wala wali ni so asara ye oko ape akiri abungbi koli na wali na wali wala koli ni, mbeni raison ti Bible ti sara divorce ayeke dä encore ape.​—w18.12, l. 13.