“Mo yeke Nzapa so ye ti sioni anzere na mo pëpe; zo ti sioni alingbi ti ngbâ na terê ti mo pëpe.”—PS. 5:4.

BIA 142 E bata beku ti e ngangu

AYE SO E YEKE BÂ NI *

1-3. (a) Ti gue oko na Psaume 5:4-6, Jéhovah abâ sarango sioni ye tongana nyen? (b) Ngbanga ti nyen la e lingbi ti tene so langongo na amolenge ague tâ nde mingi na “ndia ti Christ”?

JÉHOVAH NZAPA ake asioni ye kue. (Diko Psaume 5:4-6.) Lo ke tâ na bê oko langongo na amolenge, so ayeke mbeni siokpari so ayeke tâ sioni mingi. Ndali ti so e yeke aTémoin ti Jéhovah, legeoko tongana lo e ke tâ na bê oko langongo na amolenge nga e yeke kanga lê na ndö ni pëpe na yâ ti congrégation.—aRom. 12:9; aHéb. 12:15, 16.

2 Ti lango na amolenge ague tâ nde mingi na “ndia ti Christ”. (aGal. 6:2). E tene tongaso ngbanga ti nyen? Tongana ti so e bâ na yâ ti article so ahon, ndia ti Christ, so ti tene aye kue so Jésus afa na lege ti atënë nga na tapande ti lo, fondation ni ayeke ndoye nga amaï fango ngbanga ti mbilimbili. Ndali ti so atâ Chrétien ayeke sara ye alingbi na ndia so, ala yeke sara ye na amolenge na mbeni lege so asara si amolenge ni abâ so a bata ala nga a ye ala biani. Me langongo na mbeni molenge ayeke sioni, a yeke gingo gï ye so anzere na zo wani, a yeke sara si mbeni molenge abâ so zo ti batango lo ayeke dä ape nga a ndoye lo ape.

3 Mawa ni ayeke so langongo na amolenge ayeke mbeni kota kpale so amû yâ ti dunia kue, na andu atâ Chrétien nga kue. Ngbanga ti nyen? “Azo ti sioni na azo ti handango azo” ayeke mingi, na ambeni alingbi ti gi ti lï na yâ ti congrégation (2 Tim. 3:13). Na ndö ni, ambeni zo so atene ala kue ayeke na yâ ti congrégation, so sioni nzara ti bê ti ala apusu ala, alango na amolenge. Zia e bâ ngbanga  ti nyen la langongo na amolenge ayeke kota siokpari mingi. Na pekoni, e yeke bâ aye so a-ancien ayeke sara tongana mbeni zo na yâ ti congrégation asara mbeni kota siokpari, na tapande langongo na amolenge. E yeke bâ nga tongana nyen la ababâ na amama alingbi ti bata amolenge ti ala. *

MBENI KOTA SIOKPARI

4-5. Ngbanga ti nyen la langongo na mbeni molenge ayeke dorongo droit ti lo?

4 Asioni ye ti peko ti langongo na amolenge ayeke ninga mingi. A yeke sara sioni na amolenge so a lango na ala nga na azo so aye amolenge ni, so ti tene azo ti sewa ti ala nga aita ti ala aChrétien. Langongo na amolenge ayeke mbeni kota siokpari.

5 Zo so alango na mbeni molenge adoro droit ti molenge ni. * Tongana mbeni zo asara sioni na amba ti lo nga lo sara si ala bâ pasi, lo sara siokpari. Tongana ti so e yeke bâ ande na yâ ti article ti peko, mbeni zo so alango na molenge asara sioni mingi na molenge ni. Lo sara si molenge ni ayeke na confiance na lo encore ape, nga lo sara si molenge ni abâ so mbeni zo ti bata lo ayeke dä ape. A lingbi e bata amolenge si a sara mara ti sioni ye so na ala ape nga amolenge so a lango na ala abezoin ti tene a dë bê ti ala nga a mû maboko na ala.—1 aThes. 5:14.

6-7. Ngbanga ti nyen la zo so alango na amolenge asara sioni na congrégation nga lo ke yanga ti azo ti komande?

6 Zo so alango na amolenge asara sioni na congrégation. Tongana mbeni zo so ayeke na yâ ti congrégation alango na mbeni molenge, lo ga na zonga na ndö ti congrégation (Mat. 5:16; 1 Pi. 2:12). Zonga so zo ni aga na ni ayeke na lege ni oko ape ndali ti so aChrétien kutu mingi so ayeke be-ta-zo ayeke “tiri ngangu ndali ti mabe”. (Jude 3). Azo so asara asioni ye na ala changé bê ti ala ape nga so abuba nzoni iri ti congrégation, e yeke zia lege pëpe na ala ti ngbâ na yâ ti congrégation.

7 Zo so alango na amolenge ake yanga ti azo ti komande. A-Chrétien adoit ti ‘woko terê na gbe ti akota zo ti komande’. (aRom. 13:1). E yeke fa so e woko terê na gbe ti ala na lege so e sara ye alingbi na andia ti kodro. Tongana mbeni zo na yâ ti congrégation adoro mbeni ndia so ake na zo ti sara mbeni ye, na tapande langongo na amolenge, lo ke yanga ti azo ti komande. (Bâ Kusala 25:8.) A mû lege pëpe na a-ancien ti punir azo so adoro ndia. Ye oko, ala yeke bata pëpe mbeni zo so alango na mbeni molenge si azo ti gouvernement apunir lo ape (aRom. 13:4). Zo so asara siokpari ni ayeke ko ye so lo lu.—aGal. 6:7.

8. Jéhovah abâ sioni so azo asara na amba ti ala tongana nyen?

8 Ye so ayeke sioni mingi ayeke so zo so alango na amolenge adoro ndia ti Nzapa (Ps. 51:4). Tongana mbeni zo asara sioni na mba ti lo, lo doro nga ndia ti Jéhovah. Gbu li na ndö ti mbeni ndia so Nzapa amû lani na azo ti Israël. Ndia ni atene lani so zo so ahanda mba ti lo ayeke “be-ta-zo na Jéhovah pëpe”. (Lév. 6:2-4). Biani, na ngoi so mbeni zo na yâ ti congrégation alango na mbeni molenge, lo yeke be-ta-zo na Nzapa ape ndali ti so lo handa molenge ni. Molenge ni ayeke na confiance na lo me lo wara go na ndö ti molenge ni, na molenge ni abâ so zo ti batango lo ayeke dä encore ape. Zo so alango na mbeni molenge aga na kota zonga na ndö ti iri ti Jéhovah.  Ndani la a lingbi e hinga so langongo na amolenge ayeke dorongo ndia ti Nzapa na a lingbi e bâ ni tongana ye so ayeke sioni mingi.

9. Teti angu mingi, bungbi ti Jéhovah asara tënë mingi na ndö ti ye so Bible atene na ndö ti tënë wa? Ngbanga ti nyen?

9 Teti angu mingi, bungbi ti Jéhovah asara tënë mingi na ndö ti ye so Bible atene na ndö ti langongo na amolenge. Na tapande, a-article ti yâ ti Tour ti Ba Ndo nga na Réveillez-vous ! afa ye so azo so a lango lani na ala na molenge alingbi ti sara ti hon ndö ti vundu ti peko ni. A fa nga tongana nyen la ambeni zo alingbi ti mû maboko na ala nga tongana nyen la ababâ na amama alingbi ti bata amolenge ti ala. Bungbi ti Jéhovah afa na a-ancien anzene nzene ye so alondo na Bible so ala doit ti sara tongana mbeni zo na yâ ti congrégation alango na mbeni molenge. Bungbi ti Jéhovah angbâ ti bâ yâ ti aye so a-ancien adoit ti sara tongana mbeni zo asara siokpari so. Ngbanga ti nyen? Ti sara kue si lege so a yeke leke na tënë so ague oko na ndia ti Christ.

AYE SO A-ANCIEN AYEKE SARA TONGANA MBENI ZO ASARA MBENI KOTA SIOKPARI

10-12. (a) Na ngoi so a-ancien ayeke bâ tënë ti mbeni kota siokpari, nyen la ala yeke girisa ape? Atënë wa la agbu bê ti ala mingi? (b) Ti gue oko na Jacques 5:14, 15, nyen la a-ancien ayeke gi ti sara?

10 Na ngoi so a-ancien ayeke bâ tënë ti mbeni kota siokpari, ala yeke girisa ape so ndia ti Christ ahunda na ala ti sara ye na kundu ti ataba na ndoye nga ti sara ye so ayeke na lege ni na lê ti Nzapa. Ye so asara si ala yeke gbu li ti ala na ndö ti aye mingi na ngoi so ala mä tënë ti mbeni kota siokpari so mbeni zo asara. Kozo ye so agbu bê ti a-ancien ayeke ti sara si mbeni ye abuba iri ti Nzapa ape (Lév. 22:31, 32; Mat. 6:9). Mbeni ye so agbu nga bê ti ala mingi ayeke ti mû maboko na aita ti ngbâ nduru na Jéhovah nga ti mû maboko na azo so a sara mbeni ye so ayeke sioni mingi na ala.

11 Na ndö ni, tongana zo so asara sioni ye ni ayeke na yâ ti congrégation, ye so agbu bê ti a-ancien ayeke ti gi ti mû maboko na lo ti kiri ti leke songo ti lo na Jéhovah tongana lo changé bê ti lo. (Diko Jacques 5:14, 15.) Mbeni Chrétien so nzara ti bê ti lo ahon ndö ti lo na apusu lo ti sara mbeni kota siokpari ayeke na kobela na lege ti yingo. Ye so aye ti tene so lo yeke na nzoni songo na Jéhovah encore ape. * E lingbi ti haka a-ancien na adocteur. Ala yeke gi ti sara si “zo ti kobela ni [so ti tene zo so asara siokpari] awara sava”. Awango so ala mû na lo na lege ti Bible alingbi ti mû maboko na lo ti kiri ti duti na nzoni songo na Nzapa, me gï tongana lo changé bê ti lo biani.—Kus. 3:19; 2 aCor. 2:5-10.

12 A yeke polele so a-ancien ayeke na kota kua. Ala pensé mingi na kundu ti ataba so Nzapa azia ala na ndö ni (1 Pi. 5:1-3). Ala ye ti tene aita ti ala ahinga so congrégation ayeke ndo so zo alingbi ti duti dä nzoni. Ni la ala yeke sara ye hio tongana ala mä so mbeni zo asara kota siokpari, na tapande lo lango na mbeni molenge. Gbu li na ndö ti ahundango ndo so ayeke na tongo nda ti  paragraphe 13,  15, nga na  17.

13-14. Eskê a-ancien ayeke sara ye alingbi na andia ti kodro so ahunda ti tene tongana a bi tënë na li ti mbeni zo a tene lo lango na molenge, a lingbi a fa ni na azo ti komande? Mo tene tongaso ngbanga ti nyen?

 13 Eskê a-ancien ayeke sara ye alingbi na andia ti kodro so ahunda ti tene tongana a bi tënë na li ti mbeni zo a tene lo lango na molenge, a lingbi a fa ni na azo ti komande? En. Na ando so a lu mara ti andia so dä, a-ancien ayeke gi ti sara ye alingbi na ni (aRom. 13:1). Andia so ague nde na ndia ti Nzapa ape (Kus. 5:28, 29). Tongaso, tongana a-ancien amä so mbeni zo alango na mbeni molenge, hio ala yeke iri bureau ti filiale ti tene a fa na ala ye so ala doit ti sara ti sara  ye alingbi na andia so ahunda ti fa tënë ni na azo ti komande.

14 Na ngoi so a-ancien ayeke sara lisoro na amolenge so a lango na ala nga na ababâ na amama ti ala nga na azo so ahinga tënë ni, na nzoni bê ala yeke dabe ti ala so ala yeke na droit ti sara tënë ni na azo ti komande. Me ka tongana zo ni ayeke na yâ ti congrégation nga azo mingi na ndo so zo ni ayeke dä ahinga tënë ni? A lingbi Chrétien so asara tënë ni na azo ti komande abâ so lo ga na zonga na ndö ti iri ti Nzapa? Ên-ën. Zo so alango na molenge ni la aga na zonga na ndö ti iri ti Nzapa.

15-16. (a) Ti gue oko na 1 Timothée 5:19, ngbanga ti nyen la a hunda ti tene kozo si a-ancien asara komite ti mbeni ita, a lingbi atémoin use aduti dä si? (b) Nyen la a-ancien ayeke sara tongana ala mä a tene mbeni zo na yâ ti congrégation alango na mbeni molenge?

 15 Ngbanga ti nyen la a-ancien ti congrégation abezoin atémoin use si ala sara komite ti mbeni ita so a tene lo sara mbeni kota siokpari? Ngbanga ti so a yeke ye so Bible atene ayeke na lege ni ti sara ni. Tongana mbeni ita atene na yanga ti lo wani pëpe so lo sara mbeni sioni ye, a lingbi atémoin use aduti dä ti fa so ita ni asara mbeni sioni ye na a-ancien alingbi ti sara komite ti lo. (Deut. 19:15; Mat. 18:16; diko 1 Timothée 5:19.) Eskê ye so aye ti tene so kozo ti tene a fa na azo ti komande tënë ti langongo na mbeni molenge, a lingbi atémoin use aduti dä si? Ên-ën. Ti tene a-ancien wala ambeni zo nde afa na azo ti komande tënë ti mbeni ye so mbeni zo asara so ake ndia ahunda pëpe atémoin use.

16 Na ngoi so a-ancien amä so mbeni zo na yâ ti congrégation alango na mbeni molenge, ala yeke gi ti sara ye alingbi na andia ti kodro so ahunda ti sara tënë ni na azo ti komande, na pekoni ala yeke gi ti hinga mbilimbili ye so asi. Na nda ni, ala yeke sara kua na Bible ti bâ wala ala bezoin ti sara komite ti ita ni. Tongana ita ni abere tënë ni, a-ancien ayeke mä tënë so atémoin ti ye ni atene. Tongana atémoin use ayeke dä, so ti tene zo so abi tënë na li ti ita ni nga mbeni zo so afa so ita ni alango biani na molenge ni wala lo lango na mbeni molenge kozo, a-ancien ayeke na aye so alingbi awe ti mû lege na ala ti sara komite ti ita ni. * Me tongana use témoin ni ayeke dä ape aye pëpe ti tene so zo so abi tënë na li ti ita ni atene mvene. Même tongana atémoin use ayeke dä ape ti fa so mbeni ita alango na mbeni molenge, a-ancien ahinga so peut-être ita so a bi tënë na li ti lo asara mbeni kota siokpari so asara sioni mingi na ambeni zo. A-ancien ayeke ngbâ ti mû maboko na azo so peut-être a sara sioni na ala. Na ndö ni, lê ti a-ancien ayeke ngbâ ti kpengba ti bata congrégation si zo so peut-être alango na mbeni molenge asara sioni na mbeni zo ape.—Kus. 20:28.

17-18. Fa kua so a-ancien so ayeke sara komite ti mbeni ita ayeke sara.

 17 Kua ti komite ayeke nyen? A-ancien so asara komite ti mbeni ita ayeke bâ wala ita so asara mbeni kota siokpari alingbi ti ngbâ na yâ ti congrégation wala pëpe. A yeke pëpe ala la ayeke mû desizion ti tene a punir mbeni zo so alango na mbeni molenge ndali ti so lo ke mbeni ndia so gouvernement azia na sese. A-ancien ayeke zia gouvernement ti mû desizion na ndö ti lege so a yeke punir azo so ake ndia.—aRom. 13:2-4; Tite 3:1.

18 Na ngoi so a-ancien ayeke sara komite ti mbeni ita, ala yeke fâ ngbanga gï na ndö ti aye so andu vorongo Nzapa. Ala yeke sara kua na Bible ti bâ wala ita so alango na mbeni molenge achangé bê ti lo wala pëpe. Tongana lo changé bê ti lo ape, ala yeke bi lo na gigi ti bungbi na ala yeke sara tënë ni na congrégation na lege ti mbeni tokua (1 aCor. 5:11-13). Tongana lo changé bê ti lo, lo lingbi ti ngbâ na yâ ti congrégation. Ye oko, a-ancien ayeke tene na lo so peut-être lo lingbi encore ape ti sara mbeni kua na yâ ti  congrégation. Ti tene amolenge ti congrégation aduti nzoni, a-ancien alingbi ti gue na mbage ti ababâ na amama oko na oko kue so ayeke na amolenge ti wa ala ti sara hange na ngoi so amolenge ni ayeke na terê ti zo ni so. Na ngoi so a-ancien ayeke wa ababâ na amama, ala yeke sara hange ti fa pëpe azo so ita ni asara sioni na ala.

LEGE TI BATA AMOLENGE TI MO SI A SARA SIONI NA ALA APE

Ababâ na amama ayeke fa na amolenge ti ala aye so ala bezoin ti hinga na ndö ti bungbingo koli na wali, tongaso si a lango na ala ape. Ti sara ni, ababâ na amama ayeke sara kua na atënë so bungbi ti Jéhovah afa na ndö ni. (Bâ paragraphe 19-22.)

19-22. Nyen la ababâ na amama alingbi ti sara ti bata amolenge ti ala? (Bâ foto ti couverture ni.)

19 Azo wa la kozo kua ti ala ayeke ti bata amolenge si sioni asi na ala ape? A yeke ababâ na amama. * Amolenge ti mo ayeke mbeni cadeau so Nzapa amû na mo, so ti tene mbeni “héritage so Jéhovah amû na zo”. (Ps. 127:3). Jéhovah amû na mo kua ti batango amolenge ti mo. Nyen la mo lingbi ti sara ti bata amolenge ti mo si mbeni zo alango na ala ape?

20 Kozoni, gi ti hinga ye nzoni na ndö ti langongo na amolenge. Manda ye na ndö ti azo so ayeke lango na amolenge nga na akode so ala yeke sara kua na ni ti handa na amolenge. Zia lê ti mo akpengba ti bâ akpale so alingbi ti si (aProv. 22:3; 24:3). Girisa ape so mingi ni zo so alango na mbeni molenge ayeke mbeni zo so molenge ni ahinga lo nga ayeke na confiance na lo.

21 Use ni, sara lisoro lakue polele na amolenge ti mo (Deut. 6:6, 7). Ye so aye ti tene a lingbi mo mä amolenge ti mo nzoni (Jacq. 1:19). Girisa ape so fani mingi amolenge so a lango na ala ayeke na mbeto ti sara tënë ni na mbeni zo. Peut-être ala yeke sara mbeto so a yeke tene ande so tënë ti ala ni ayeke mvene wala peut-être zo so alango na ala atene so lo yeke sara mbeni ye ti sioni na ala tongana ala sara tënë ni na mbeni zo. Tongana mo bâ so mbeni ye atambela nzoni ape, na nzoni bê hunda ambeni tënë na ala na kanga bê mo mä akiringo tënë ti ala.

22 Ota ni, fa ye na amolenge ti mo. Fa na ala ye so ala bezoin ti hinga na ndö ti bungbingo koli na wali alingbi na ngu ti ala. Fa na ala tënë so ala doit ti tene wala ye so ala doit ti sara tongana mbeni zo agi ti ndu ala na mbeni lege so ayeke nzoni ape. Sara kua na atënë so bungbi ti Jéhovah afa na ndö ti aye so mo lingbi ti sara ti bata amolenge ti mo.—Bâ encadré “ Manda ye nga fa ye na amolenge ti mo.”

23. E bâ langongo na amolenge tongana nyen? Article ti peko ayeke kiri tënë na hundango ndo wa?

23 E aTémoin ti Jéhovah e bâ langongo na amolenge tongana mbeni kota siokpari nga tongana mbeni kengo ndia so ayeke sioni mingi. So ndia ti Christ ayeke fa lege na e, acongrégation ti e ayeke bata pëpe azo so alango na amolenge si ala wara pëpe asioni ye ti peko ti siokpari so ala sara. Me nyen la e lingbi ti sara ti mû maboko na aita so a lango na ala lani na ngoi so ala de molenge? Article ti peko ayeke kiri tënë na hundango ndo so.

BIA 103 Aberger: amatabisi

^ par. 5 Article so ayeke fa na e tongana nyen la e lingbi ti bata amolenge ti e si azo alango na ala ape. E yeke bâ aye so a-ancien alingbi ti sara ti bata congrégation nga na ye so ababâ na amama alingbi ti sara ti bata amolenge ti ala.

^ par. 3 NDA TI AMBENI TËNË: Tongana mbeni kota zo asara mbeni ye so andu bungbingo koli na wali na mbeni molenge ti kaï nzara ti lo ti bungbingo koli na wali, a yeke iri ni langongo na amolenge. A lingbi ti duti bungbingo na lo koli na wali; bungbingo na lo na yanga wala na ngbonda; sarango ngia na molenge ni na terê ti lo ti koli wala ti wali; sarango ngia na me ti molenge ni wala ngbonda ti lo wala sarango ambeni sioni ye tongaso na lo. Atâa so amolenge mingi so a lango na ala ayeke amolenge ti wali, a yeke lango nga na amolenge ti koli mingi. Atâa so azo mingi so alango na amolenge ayeke akoli, ambeni wali alango nga na amolenge.

^ par. 5 NDA TI MBENI TËNË: Na yâ ti article so nga na ti peko, tënë “zo so a sara sioni na lo” aye ti sara tënë ti mbeni zo so mbeni zo alango na lo na ngoi so lo yeke lani molenge. E sara kua na tënë so ti fa polele so tënë ayeke pëpe na li ti molenge so a sara sioni na lo nga so a wara go na ndö ti lo.

^ par. 11 Tongana mbeni zo asara mbeni kota siokpari ndali ti so lo yeke na kpengba songo na Jéhovah ape, a ye ti tene ape so tënë ayeke na li ti lo ape. Lo la lo mû desizion ti sara ye so ayeke sioni, na Jéhovah ayeke fâ ngbanga na li ti lo ndali ti ye so lo sara.—aRom. 14:12.

^ par. 16 A-ancien ayeke hunda lâ oko ape na molenge so a lango na lo ti duti dä na ngoi so ala yeke sara lisoro na zo so a bi tënë ti langongo na molenge ni na li ti lo. Babâ wala mama ti molenge ni wala mbeni zo so molenge ni ayeke na confiance na lo alingbi ti fa na a-ancien ye so asi. Tongana ala sara tongaso, vundu ayeke kiri ti sara molenge ni mingi ape.

^ par. 19 Tënë so a tene na ababâ na amama abâ nga azo so ayeke bata amolenge so ayeke ti ala ape.