Mo diko a-article ti Tour ti Ba Ndo so asigi ade ti ninga ape so nzoni? Bâ wala mo lingbi ti kiri tënë na ahundango ndo so ge:

Aye osio wa la e lingbi ti sara ti he bia nzoni ahon ti kozo?

E lingbi ti luti nzoni na lege so e gbu mbeti ti bia ti e na nduzu. A lingbi e wu pupu nzoni. Tongana e zi yanga ti e kota nga e he bia na kota go, go ti e ayeke toto na nduzu.​—w17.11, l. 5.

A lingbi nyen la apika bê ti e na ndö ti ando so agbata ti batango zo ayeke dä nga na alege so ague dä?

Agbata ti batango zo ayeke lani omene na ando nde nde na yâ ti kodro ni, na alege ti gue na yâ ni ayeke nzoni. Tongaso, zo alingbi ti si dä kamême hio ti bata terê ti lo.​—w17.11, l. 14.

Ngbanga ti nyen la cadeau so Nzapa amû so ayeke ye so a futa ti zi azo na lege ti Jésus ayeke mbeni pendere cadeau so ade e wara mara ni ape?

A kaï nzara so e yeke na ni ti ngbâ na fini nga a yeke ye so e yeke na bezoin ni ti tene a zi e na gbe ti siokpari na kuâ. So Nzapa aye ahale ti Adam mingi, lo mû Jésus ti kui ndali ti e atâa so e yeke lani awasiokpari.​—wp17.6, l. 6-7.

Tongana nyen la Psaume 118:22 aye ti sara tënë ti zingongo ti Jésus na kuâ?

A ke Jésus so ayeke Messie na a fâ lo. Ti tene lo ga “ngangu tênë ti coin ti da ni” a lingbi a zingo lo na kuâ.​—w17.12, l. 9-10.

Eskê molongo ti akotara so asi na Messie andu droit ti zo ti kozo molenge?

Ambeni zo so ayeke na yâ ti molongo ti akotara ti Messie ayeke akozo molenge ti koli, me a yeke ala kue ape. David so ayeke molenge ti Jessé ti koli ayeke kozo molenge ape; ye oko Messie aga na lege ti lo.​—w17.12, l. 14-15.

Ambeni mama-ndia wa so asara tënë na ndö ti seni ayeke na yâ ti Bible?

Ndia ahunda lani ti tene a zia nde azo so ayeke na ambeni kobela. Azo adoit lani ti sukula terê ti ala na peko ti so ala ndu mbeni kuâ. Ndia ahunda lani ti tene azo azi dû si ala sara kabinë dä. A yeke fâ molenge-koli na ganza lango miombe na peko ti so a dü lo, tongaso si terê ti lo apeut ti wara ngangu ti kanga lege na mênë ti yuru tongana lo wara kä.​—wp18.1, l. 7.

Ngbanga ti nyen la a yeke na lege ni ti tene na yâ ti ambeni ye mbeni Chrétien andoye terê ti lo wani?

A lingbi e ndoye amba ti e tongana terê ti e wani (Marc 12:31). A lingbi akoli “andoye awali ti ala tongana terê ti ala wani.” (aÉph. 5:28). Me tongana zo aye terê ti lo wani ahon ndö ni alingbi ti ga sioni.​—w18.01, l. 23.

Ambeni ye wa la mo lingbi ti sara ti maï na lege ti yingo?

A lingbi e manda Bible, e gbu li na ndö ni nga e sara ye alingbi na ye so e manda. A lingbi nga e zia lakue si yingo vulu asara kua na ndö ti apensé ti e nga na bê ti e nga a lingbi e yeda na mungo maboko ti amba ti e na bê ti e kue.​—w18.02, l. 26.

Ngbanga ti nyen la gingo nda ti aye na lege ti atongoro nga na bango mbadi ayeke pëpe aye so amû lege na zo ti hinga aye so ayeke si kekereke?

Araison ni ayeke mingi, me kota raison ni ayeke so Bible ake asarango ye so use kue.​—wp18.2, l. 4-5.

A lingbi e sara ye tongana nyen tongana e yeda na mbeni tisango ndo?

Tongana e yeda na mbeni tisango ndo, a lingbi e sara ye alingbi na tënë ti yanga ti e (Ps. 15:4). E yeke ke ti gue senge senge ape. Peut-être zo so atisa e aleke aye nzoni mingi ti ku na e.​—w18.03, l. 18.

Nyen la a-ancien alingbi ti manda na lege ti Timothée?

Timothée abi bê ti lo lani biani na azo nga lo zia lani kua ti fango tënë na kozo ndo. Lo sara lani akua so ayeke nzoni-kue mingi nga lo sara lani ye alingbi na aye so lo manda. Lo ngbâ lani ti tara terê ti lo wani nga lo zia lani bê ti lo na yingo ti Jéhovah. A-ancien nga na tanga ti aita alingbi ti mû tapande ti lo.​—w18.04, l. 13-14.