“BARA mo! Mo yeke senge?”

Kite ayeke dä ape so fani mingi mo yeke bara azo tongaso. Peut-être mo yeke bara zo même na maboko wala mo gbu lo na kate. Angobo ti barango zo nga na atënë so zo atene ti bara na zo ayeke nde nde, me ndani so azo ayeke bara terê ayeke oko. Tongana zo abara amba ti lo ape wala lo yeda na bara ape, a lingbi ti tene so lo ye azo ape wala afa so lo yeke na anzoni sarango ye ape.

Me azo kue la ayeke bara ka amba ti ala ape. Ambeni zo abara amba ti ala ape ndali ti so kamene asara ala wala ala bâ so ala yeke ye oko ape. Na ambeni zo a yeke ngangu na ala ti bara azo so mara ti ala, ngobo ti ala wala dutingo ti ala ayeke nde na ti ala. Ye oko, même mbeni kete bara so zo atene alingbi ti sara nzoni mingi na zo.

Hunda terê ti mo: ‘Nyen la bara alingbi ti sara na zo? Nga, nyen la Bible alingbi ti fa na mbi na ndö ti abara?’

BARA “MARA TI AZO NDE NDE KUE”

Na ngoi so bazengele Pierre ayamba kozo Gentil, Corneille, na yâ ti congrégation ti aChrétien, lo tene: “Nzapa ayeke sara kangbi na popo ti azo pëpe.” (Kus. 10:34). Ambeni ngoi na pekoni, Pierre atene so Nzapa ‘aye si azo kue achangé bê ti ala.’ (2 Pi. 3:9). Na tongo nda ni, e lingbi ti pensé so aversê so abâ azo so angbâ ti manda tâ tënë. Me Pierre awa nga aChrétien kue, lo tene: “Ala ne mara ti azo nde nde kue, ala ndoye sewa ti e ti aita kue.” (1 Pi. 2:17). Tongaso, a yeke nzoni ti tene e bara azo atâa mara ti ala, ngobo ti ala wala ndo so ala londo dä. A yeke mbeni lege ti fa na ala so e ne ala na e ye ala.

Bazengele Paul awa aita ti congrégation, lo tene: “Ala yamba terê na popo ti ala legeoko tongana ti so Christ nga ayamba ala.” (aRom. 15:7). Paul asara mbilimbili tënë ti aita so “aga awamungo maboko so akpengba” lo. Laso aita abezoin ti tene a kpengba ala mingi ahon ti ngoi ti Paul, ndali ti so Satan ayeke sara aye ti ngangu mingi na awakua ti Nzapa.​—aCol. 4:11, kete tënë na gbe ni; Apoc. 12:12, 17.

Atapande ti Bible afa so barango zo ayeke sara aye mingi ahon gï ti sara si zo abâ so a yamba lo.

A DË BÊ, A KPENGBA ZO, A FA NDOYE

Tongana ngoi alingbi ti tene a zia fini ti Molenge ti Nzapa na yâ ti Marie, Jéhovah atokua mbeni ange ti sara tënë na lo. Na tongo nda ni, ange ni atene: “Bara mo, mo so Nzapa abâ mo tâ na nzoni lê mingi. Jéhovah ayeke na mo.” “Li ti [Marie] aga kirikiri,” lo hinga ape ndani so mbeni ange ayeke sara tënë na lo. So ange ni abâ ni, lo tene: “Mo sara mbeto pëpe, Marie, ndali ti so Nzapa abâ mo na nzoni lê awe.” Lo tene na lo so Nzapa aleke na bê ti lo ti tene lo dü Messie. Li ti Marie ayeke kirikiri encore ape, lo yeke nduru ti mä yanga, ni la lo tene: “Bâ, mbi yeke maseka-wali so ayeke ngbâa ti Jéhovah! Zia ye ni asi na mbi gï tongana ti so mo tene.”​—Luc 1:26-38.

Ange ni ayeke na pasa ti sara tënë na iri ti Jéhovah; ye oko, lo bâ pëpe so lo yeke kota mingi tongaso lo lingbi pëpe ti sara tënë na mbeni zo so ayeke mbilimbili-kue ape. Lo to nda ni na bara. E lingbi ti manda mbeni ye na lege ti tapande ti lo? A lingbi e duti nduru ti bara azo na ti kpengba ala. Gï na ambeni nduru tënë, e lingbi ti mû maboko na azo nga ti mû na ala confiance so ala nga ala yeke biani awakua ti Jéhovah.

Paul ahinga azo mingi na yâ ti acongrégation so ayeke na Asie Mineure nga na Europe. Na yâ ti alettre ti lo, lo bara azo mingi na iri ti ala. E bâ ni na aRomain chapitre 16. Paul abara amba ti lo aChrétien mingi. Lo sara tënë ti Phœbé, “ita ti e ti wali,” na lo wa aita ti  “yamba lo na yâ ti Seigneur na mbeni lege so alingbi na ala so ayeke azo ti be-vulu, nga ti tene ala mû maboko na lo na yâ ti aye kue so lo yeke duti na bezoin ti ala dä”. Paul abara Prisca na Aquila, na lo tene: “Gï mbi oko la mbi kiri singila na ala pëpe, me acongrégation kue ti amara akiri nga singila na ala.” Lo bara ambeni zo so a hinga ala laso ape: “Épénète, lo so mbi ndoye lo mingi,” nga Tryphène na Tryphose, awali so ayeke sara kusala ngangu na yâ ti Seigneur.” Biani, Paul ayeke nduru ti bara aita ti lo.​—aRom. 16:1-16.

Imaginé ngia so ala wara ti hinga so a dabe na ala nga a ye ala. Ala kiri ala ye Paul nga na amba ti ala mingi. Tongana ambeni Chrétien amä tënë ti abara so a bara ala na ndoye so kite ayeke dä ape so akpengba ala, a mû maboko na ala ti luti ngangu na yâ ti mabe. Biani, abara so afa so zo abi bê na amba ti lo zo nga so atënë ti gonda ayeke dä ayeke kpengba songo ti kamarade nga ayeke sara si awakua ti Nzapa so ayeke be-ta-zo aduti beoko.

Na ngoi so Paul asi na yanga ti ngu ti Putéolie na lo mû lege ti gue na Rome, aChrétien ti ndo ni aga na mbage ti sud ti wara terê na lo. Tongana Paul angbâ ayo lo bâ ala, lo “kiri singila na Nzapa na lo kiri lo wara ngangu.” (Kus. 28:13-15). Na ambeni ngoi, peut-être e lingbi gï ti he ngia wala ti sara maboko ti bara zo. Même so kue alingbi ti sara si mbeni zo ayapu, peut-être zo so kota vundu asara lo wala mbeni zo so ayeke na vundu.

LO SARA SI ALA YEDA NA WANGO TI LO

Disciple Jacques ayeke lani na mbeni kpengba wango ti mû. Ambeni Chrétien akomanse lani ti sara lango-sioni na lege ti yingo na sarango kamarade na dunia so (Jacq. 4:4). Me bâ tongana nyen la Jacques akomanse lettre ti lo:

“Jacques, ngbâa ti Nzapa na ti Seigneur Jésus Christ, atokua mbeti so na amara 12 so akangbi na ando nde nde: Mbi bara ala!” (Jacq. 1:1). Kite ayeke dä ape so a yeke lani ngangu ape na azo so adiko lettre ti lo ti yeda na wango ti lo tongana ala bâ na lege ti bara ti lo so ala na lo kue ayeke oko na gbele Nzapa. Biani, mbeni senge bara alingbi ti zi lege même ti tene azo asara lisoro na ndö ti ambeni kota tënë.

Ye oko, ti tene barango zo aga na nzoni ye, a lingbi a londo na bê nga a fa tâ ndoye, même tongana a yeke nduru (Mat. 22:39). Mbeni lâ mbeni ita-wali na Irlande asi na Da ti Royaume tâ gï na ngoi so bungbi ayeke nduru ti komanse. Na ngoi so lo yeke hon hio ti lï, mbeni ita-koli atourné, lo he kete ngia, na lo tene: “Bara mo. A nzere na mbi mingi ti bâ mo.” Ita-wali ni ague aduti sân ti sara tënë.

Ambeni yenga na pekoni, lo ga lo bâ ita-koli so abara lo lani na lo tene na lo so na yâ ti mbeni ngoi lo yeke gi lani ti hon ndö ti mbeni ngangu kpale na yanga-da. Lo tene: “Na lakui ni so, mbi yeke lani na vundu mingi na a ngbâ kete mbi ga na Da ti Royaume ape. Mbi lingbi ti dabe ti mbi na aye mingi na ngoi ti bungbi ni so ape, gï bara ti mo. A sara si mbi bâ so a yamba mbi nzoni. Merci.”

Ita-koli so ahinga pëpe ye so nduru bara ti lo asara. Lo tene: “Na ngoi so lo tene na mbi ye so anduru tënë so asara na lo, mbi yeke na ngia mingi ndali ti effort so mbi sara lani. A sara si mbi kue terê ti mbi anzere.”

Salomon atene: “Bi mapa ti mo na lê ti ngu, teti na peko ti alango mingi, mo yeke kiri ti wara ni.” (Zo-ti. 11:1). Tongana e bâ so ti bara azo ayeke kota ye, mbilimbili amba ti e aChrétien, e yeke sara nzoni na ala nga na e wani. Tongaso, zia e bâ lâ oko ape tongana senge ye ngangu so bara ayeke mû na zo.