Gue na tënë ti yâ ni

Gue na li ti atënë ni

Jésus akui biani ndali ti mbi?

Jésus akui biani ndali ti mbi?

NA YÂ ti Bible a yeke wara gbâ ti atënë ti azo “so ayeke na abibe tongana ti e”. (Jacq. 5:17). Na tapande, e lingbi ti comprendre hio atënë ti Paul so ayeke na aRomain 7:21-24 so lo tene: “Tongana mbi ye ti sara ye so ayeke mbilimbili, ye so ayeke sioni la si ayeke na yâ ti mbi. . . . So mawa na mbi!” Atënë ti Paul so lo tene ni polele tongaso adë bê ti e na ngoi so e yeke tiri na awokongo ti e.

Paul afa nga ambeni ye nde so ayeke na bê ti lo. Lo tene: ‘Molenge ti Nzapa andoye mbi si lo kä terê ti lo na kuâ ndali ti mbi.’ (aGal. 2:20). Paul ayeke lani na kite na ndö ti tënë so ape. Eskê atënë so afa nga “abibe tongana ti e”? Peut-être a yeke lakue tongaso ape.

Tongana e ngbâ ti bâ so e yeke ye oko ape ndali ti asiokpari so e sara ândö, na ambeni ngoi e yeke tene so Jéhovah aye e ape nga ade lo pardonné e ape, na a yeke duti tâ ngangu mingi ti tene e bâ sandaga ti Jésus tongana mbeni cadeau so a mû na e oko oko kue. Eskê Jésus aye biani ti tene e duti na mara bango ndo tongaso na ndö ti ye so a futa ti zi azo? Tongana a yeke ni la, nyen la ayeke mû maboko na e ti bâ ni tongaso? Zia e kiri tënë na ahundango ndo use so.

BANGO NDO TI JÉSUS NA NDÖ TI SANDAGA TI LO

Biani, Jésus aye ti tene e bâ sandaga ti lo tongana mbeni cadeau so a mû na e oko oko kue. Tongana nyen la e lingbi ti hinga biani so a mû ni na e oko oko kue? Imaginé ye so apassé so a sara tënë ni na Luc 23:39-43. A pika mbeni koli na ndö ti keke ti pasi nduru na terê ti Jésus. Koli ni ayeda so ti lo, lo sara lani sioni ye. Ye so lo sara adoit lani ti duti sioni mingi ndali ti so sioni punition so lo wara ayeke ndali ti azo so asara aye so ayeke tâ sioni mingi. Koli so agi bê ti lo mingi, ni la lo voro yanga na Jésus lo tene: “Dabe ti mo na mbi tongana mo lï na yâ ti Royaume ti mo.”

Nyen la Jésus asara lani? Imaginé songo ti ye so ayeke son lo na ngoi so lo yeke tourné ti bâ lê ti koli ni. Atâa so ye ni ason lo mingi, Jésus ahe ngia nga lo dë bê ti koli ni. Lo tene: “Ti tâ tënë ni, mbi tene na mo laso: Mo yeke duti ande na mbi na Paradis.” Jésus alingbi lani gï ti dabe ti koli ni so “Molenge ti zo aga . . . ti mû fini ti lo tongana ye so a futa ti zi azo mingi.” (Mat. 20:28). Me na nzoni bê Jésus asara si koli ni ahinga so lo mû sandaga ndali ti koli ni wani. Lo sara tënë na lo tongana kamarade ti lo nga lo sara kua na tënë “mo” nga na tënë “mbi.” Na lo tene na koli ni so lo yeke wara ande fini na yâ ti Paradis na ndö ti sese.

Kite ayeke dä ape so Jésus aye lani ti tene koli so ahinga so sandaga ti lo ayeke nga ndali ti nzoni ti koli ni. Tongana Jésus apensé lani tongaso na ndö ti mbeni sioni zo so awara même lege pëpe ti sara na Nzapa, kite ayeke dä ape so lo pensé nga tongaso na ndö ti mbeni Chrétien so awara batême awe so ayeke sara na Nzapa. Tongaso, nyen la ayeke mû maboko na e ti mä na bê biani so sandaga ti Christ ayeke ga na e aye ti nzoni atâa asiokpari so e sara ândö?

 YE SO AMÛ LANI MABOKO NA PAUL

Fango tënë so Paul afa asara ye na ndö ti fason so lo bâ na sandaga ti Jésus. Na lege wa? Paul atene: “Mbi kiri singila na Christ Jésus, Seigneur ti e, lo so amû na mbi ngangu, ngbanga ti so lo bâ mbi tongana zo so ayeke be-ta-zo na lege so lo soro mbi ndali ti mbeni kusala, atâa so kozo mbi yeke mbeni zo ti zongango ndo, zo ti sarango ye ti ngangu na azo ti lo nga zo ti sioni yanga.” (1 Tim. 1:12-14). Kua so a mû na Paul asara si lo hinga biani so Jésus asara nzoni bê na lo, lo ye lo nga lo yeke na confiance na lo. Legeoko nga, Jésus amû na e oko oko kue kua ti fango tënë (Mat. 28:19, 20). Eskê kua ti fango tënë so a mû na e alingbi ti mû maboko na e ti hinga so Jésus akui nga ndali ti e?

Albert, so akiri na Jéhovah ade ti ninga ape na peko ti so a bi lo na gigi ngu 34 tongaso, atene: “Asiokpari ti mbi ayeke lakue na gbele mbi. Me tongana mbi yeke na fango tënë, mbi bâ so, legeoko tongana bazengele Paul, Jésus amû na mbi kua ti fango tënë. A kpengba mbi nga a sara si mbi ngbâ ti duti na nzoni bango ndo na ndö ti mbi wani, na ndö ti gigi ti mbi nga na kekereke ti mbi.”—Ps. 51:3.

Na ngoi so mo yeke manda Bible na mara ti azo nde nde kue, sara si ala hinga biani so Jésus asara nzoni bê na ala nga lo ye ala

Allan, so ayeke sara lani asioni ye nga so asara aye ti ngangu na azo kozo ti hinga tâ tënë, atene: “Mbi ngbâ ti pensé na aye ti sioni kue so mbi sara lani na azo. Na ambeni ngoi, a sara mbi vundu mingi. Me mbi kiri singila na Jéhovah so amû lege na mbeni wasiokpari tongana mbi ti gue na nzoni tënë na azo. Tongana mbi bâ sarango ye ti azo na mbage ti nzoni tënë, a dabe ti mbi so Jéhovah ayeke nzoni mingi nga lo ye azo mingi. Mbi bâ so lo sara kua na mbi ti mû maboko na azo so asara asioni ye tongana ti so mbi sara lani.”

Na ngoi so e yeke na fango tënë e yeke sara mbeni ye so ayeke nzoni nga e yeke pensé na anzoni ye. A sara si e hinga biani so Jésus asara nzoni bê na e, lo ye e nga lo yeke na confiance na e.

JÉHOVAH AYEKE KOTA AHON BÊ TI E

Juska ti si na ngoi so a yeke futi sioni dunia ti Satan, bê ti e ayeke ngbâ ti fâ ngbanga na ndö ti e ndali ti afaute so e sara ândö. Nyen la ayeke mû maboko na e ti tiri na mara ti apensé so?

Jean, mbeni ita-wali, so fani mingi abâ so tënë ayeke na li ti lo ndali ti so lo yeke sara lani double vie na ngoi so lo de maseka, atene: “A nzere na mbi mingi so ‘Nzapa ayeke kota ahon bê ti e.’” (1 Jean 3:19, 20). E nga kue, ti hinga so Jéhovah na Jésus acomprendre so siokpari ayeke na terê ti e alingbi ti dë bê ti e. Girisa ape so na ndoye ala mû ye so a futa ti zi azo pëpe ndali ti azo so ayeke mbilimbili-kue me ndali ti awasiokpari so achangé bê ti ala.—1 Tim. 1:15.

E yeke hinga na bê ti e kue so ye so a futa ti zi azo ayeke ndali ti e oko oko kue tongana e sambela nga e gbu li ti e na ndö ti fason so Jésus asara ye na azo so ayeke mbilimbili-kue ape nga tongana e sara kue ti sara kua ti fango tënë so lo mû na e. Tongana e sara tongaso, legeoko tongana Paul, e lingbi ti tene: Jésus “andoye mbi si lo kä terê ti lo na kuâ ndali ti mbi.”