NA NGOI so Jésus ayeke fa lani na adisciple ti lo tongana nyen ti fa nzoni tënë, lo tene na ala so a yeke lakue la azo ayeke mä ala pëpe (Luc 10:3, 5, 6). A yeke ye so ayeke si nga na e laso na fango tënë. Ambeni zo so e yeke wara ala alingbi ti sara ye na e na nzoni bê ape wala ala lingbi même ti sara ye ti ngangu na e. Mara ti aye tongaso alingbi ti sara si a yeke ngangu na e ti bâ mawa ti ala wala ti yeda ti fa tënë na ala.

Zo so abâ mawa ti zo ayeke bâ bezoin ti azo nga na akpale ti ala, mawa ti ala ayeke sara lo na lo yeke ye ti mû maboko na ala. Ye oko, tongana e komanse ti bâ pëpe mawa ti azo so e yeke tingbi na ala na fango tënë, peut-être e yeke yapu pëpe ti fa tënë na ala na e lingbi pëpe ti mû maboko na ala. E lingbi ti haka yapungo ti e ni na mbeni wâ. Ti tene wâ angbâ ti za, a lingbi a zia keke wâ dä. Legeoko nga ti tene e ngbâ ti yapu na fango tënë, e bezoin ti bâ mawa ti azo.​—1 aThes. 5:19.

Tongana nyen la e lingbi ti bâ mawa ti azo, même tongana a yeke ngangu ti sara ni? Zia e bâ tapande ti azo ota so e lingbi ti mû peko ni: Jéhovah, Jésus nga na Paul.

BÂ MAWA TI AZO TONGANA TI JÉHOVAH

Teti angu saki mingi, a tene asioni mvene na ndö ti Jéhovah. Me lo ngbâ ti “sara nzoni na azo so ayeke kiri singila pëpe nga na azo ti sioni.” (Luc 6:35). Lo fa nzoni bê ti lo na lege so lo kanga bê. Jéhovah aye ti tene “mara ti azo nde nde kue” asö fini ti ala (1 Tim. 2:3, 4). Atâa so Nzapa ake aye ti sioni, lo bâ azo na nene ni mingi na lo ye si zo oko akui ape.​—2 Pi. 3:9.

Jéhovah ahinga so Satan ahinga nzoni mingi ti sara si azo amä na bê na amvene (2 aCor. 4:3, 4). A fa atënë ti mvene na azo mingi na ndö ti Nzapa ngbene ye so ala de molenge. A sara si a yeke ngangu na ala ti yeda na tâ tënë. Jéhovah aye mingi ti mû maboko na ala. E hinga ni tongana nyen?

Gbu li na ndö ti bango ndo ti Jéhovah na ndö ti azo ti gbata ti Ninive. Atâa so ala yeke sara aye ti ngangu na zo, Jéhovah atene na Jonas, atene: “Mbi doit ti bâ mawa ti Ninive, kota gbata so ape? gbata so na yâ ni a yeke wara azo ahon 120 000, na so ala hinga même ti sara kangbi pëpe na popo ti ye ti nzoni na ye ti sioni.” (Jonas 4:11). Jéhovah abâ mawa ti azo so, so ahinga tâ tënë na ndö ti lo ape so. Tongaso, lo tokua Jonas ti mû wango na ala.

Legeoko tongana ti Jéhovah, e bâ azo na nene ni mingi. E lingbi ti mû tapande ti Jéhovah na lege so e yeke gi na alege kue ti mû maboko na ala ti manda ye na ndö ti lo, même na ngoi so a yeke mo bâ mo tene ala yeke yeda ande na tâ tënë ape.

BÂ MAWA TI AZO TONGANA TI JÉSUS

Jésus abâ mawa ti azo so ayeke na bezoin ti aye ti yingo, legeoko tongana ti Babâ ti lo. Bible atene: “Tongana lo bâ gbâ ti azo so, mawa ti ala asara lo ngbanga ti so a sara pasi na ala nga yâ ti ala akangbi kirikiri tongana ataba so ayeke na berger pëpe.” (Mat. 9:36). Jésus ahinga ndani so ala yeke na yâ ti mara ti ye so. A yeke ndali ti so akota zo ti vorongo nzapa ti ala asara ye na ala nzoni ape nga afa atënë ti mvene na ala. Atâa so Jésus ahinga so ndali ti ambeni raison nde nde azo mingi so aga ti mä lo ayeke ga adisciple ti lo ape, lo ngbâ ti “fa aye mingi na ala”.​—Marc 4:1-9.

Découragé ape tongana na tongo nda ni azo ake ti mä mo

Tongana dutingo ti ambeni zo achangé, peut-être ala lingbi ti changé bango ndo ti ala na ndö ti tâ tënë

Tongana azo ake ti mä tënë so e yeke fa na ala, a lingbi e gi ti comprendre ngbanga ti nyen  la ala sara tongaso. Peut-être ala yeke na sioni pensé na ndö ti Bible wala na ndö ti aChrétien ndali ti so ala bâ so ambeni zo so atene ala yeke aChrétien ayeke sara asioni ye. Peut-être ala mä ambeni mvene so azo atene na ndö ti aye so e mä na bê na ni. Peut-être ala sara nga mbeto ti tene afami ti ala wala ambeni zo ahe ala ndali ti so ala sara lisoro na e.

Peut-être ambeni ye ti ngangu asi na ambeni zo so e yeke wara ala na fango tënë na asara ngangu mingi na ndö ti ala. Mbeni ita-wali missionnaire so iri ti lo Kim atene so azo mingi na yâ ti territoire ti lo ayeke azo so asö kuâ na yâ ti bira na ala girisa aye ti ala kue. Ala yeke na nzoni beku ti kekereke ape. Ala découragé nga ala yeke na confiance na zo oko ape. Azo ti territoire so agi fani mingi ti kanga lege na aTémoin ti fa tënë. Mbeni lâ, na ngoi so Kim ayeke fa tënë azo ni asara même sioni na lo.

Tongana nyen la Kim angbâ ti bâ mawa ti zo, même na ngoi so a sara ye na lo na lege ni ape? Lo gi lakue ti dabe ti lo na versê ti aProverbe 19:11, so atene: “Zo so ahinga ti bâ yâ ti aye nzoni ayeke sara ngonzo hio pëpe.” Tongana lo pensé na ndö ti aye so asi na azo ti territoire ti lo, a mû maboko na lo ti bâ mawa ti ala. Nga a yeke azo kue la ayeke ke ti mä tënë ni ape. Lo yeke na ambeni nzoni vizite so lo yeke kiri lo bâ ala na yâ ti territoire so.

E lingbi ti hunda terê ti e: ‘Tongana mbi hinga fade tâ tënë ape, mbi yeke sara ye tongana nyen tongana aTémoin ti Jéhovah aga ti fa tënë na mbi?’ Na tapande, ka tongana mbi mä amvene mingi na ndö ti aTémoin? Peut-être e kue e yeke ke ti mä ala na e yeke na bezoin ti tene a bâ mawa ti e. Jésus atene so a lingbi e sara ye na azo tongana ti so e ye a sara na e. Ni la a lingbi e gi ti comprendre azo nga e kanga bê na ala, même tongana a yeke ngangu ti sara ni.​—Mat. 7:12.

BÂ MAWA TI AZO TONGANA TI PAUL

Bazengele Paul abâ même mawa ti azo so asara sioni na lo ndali ti fango tënë ti lo. Ngbanga ti nyen? Ngbanga ti so lo girisa sarango ye ti lo ândö ape. Lo tene: “Kozo mbi yeke mbeni zo ti zongango ndo, zo ti sarango ye ti ngangu na azo ti lo nga zo ti sioni yanga. Ye oko, a sara nzoni bê na mbi ngbanga ti so ye so mbi sara lani, mbi hinga ni pëpe nga mbi yeke na mabe pëpe.” (1 Tim. 1:13). Paul ahinga so Jéhovah na Jésus asara lani kota nzoni bê na lo. Lo lingbi ti comprendre azo so aye ti kanga lege na fango tënë ti lo, ndali ti so ândö lo kue lo yeke tongaso.

Na mbeni ngoi, Paul atingbi na azo so amä na bê ngangu na afango ye ti wataka. Lo sara ye tongana nyen? Kusala 17:16 atene so na ngoi so Paul ayeke na Athènes, “bê ti lo akomanse ti son na bango ayanda so asi singo na yâ ti gbata ni.”  Ye oko, Paul asara kua tâ na ye so ason bê ti lo ti fa tënë na azo (Kus. 17:22, 23). Lo leke yâ ti kode ti fango tënë ti lo nga lo sara tënë na azo nde nde alingbi na dutingo ti ala tongaso “si na yâ ti ye kue [lo] sö fini ti ambeni.”​—1 aCor. 9:20-23.

Tongana e fa tënë na azo so ayeke na sioni bango ndo wala azo so amä na bê na aye so ayeke na lege ni ape, e lingbi ti sara ye so Paul asara so. E lingbi ti sara kua na ye so e hinga na ndö ti ala ti mû maboko na ala ti manda “nzoni tënë ti mbeni ye so ayeke nzoni mingi”. (És. 52:7). Mbeni ita-wali so iri ti lo Dorothy atene: “Na yâ ti territoire ti e, a fa na azo mingi so Nzapa ayeke sioni nga lo yeke fâ ngbanga hio na ndö ti zo. Mbi yeke gonda azo ni ndali ti so ala mä na bê na Nzapa ngangu, na pekoni mbi yeke gboto lê ti ala na ndö ti ye so Bible afa na ndö ti asarango ye ti Jéhovah so afa so lo yeke na ndoye nga na ndö ti azendo ti lo ti kekereke.”

“ZIA SI SIONI AHON MO NA NGANGU PËPE”

So “lâ ti nda ni” aga nduru mingi ti hunzi, e lingbi ti ku ti tene bango ndo ti ambeni zo so e yeke fa tënë na ala aga ‘gï sioni ti gue na ni’. (2 Tim. 3:1, 13). Me a lingbi e zia pëpe si sarango ye ti ala asara si e bâ mawa ti azo ape wala e girisa ngia ti e. Jéhovah alingbi ti mû na e ngangu ti “ngbâ ti hon ndö ti sioni na lege ti ye ti nzoni.” (aRom. 12:21). Mbeni pionnier so iri ti lo Jessica atene: “Fani mingi mbi yeke wara azo so asara terê ti ala kete ape nga so ayeke bâ e tongana ambumbuse zo nga abâ atënë ti e tongana senge ye. Ye so alingbi ti son bê ti zo. Tongana mbi komanse lisoro na mbeni zo, mbi yeke sambela Jéhovah na yâ ti bê ti mbi, mbi hunda lo ti mû maboko na mbi ti bâ zo ni tongana ti so lo bâ na lo. Ye so asara si mbi yeke zia bê ti mbi gï na ndö ti apensé ti mbi ape me na ndö ti ye so mbi lingbi ti sara ti mû maboko na zo ni.”

E yeke ngbâ ti gi azo so ayeke nduru ti yeda na tâ tënë ti wara fini ti lakue lakue

A si na mbeni ngoi, ambeni zo ayeke yeda ti tene e mû maboko na ala na ala yeke manda tâ tënë

A lingbi e gi nga ti kpengba aita ti e so e na ala e yeke fa tënë. Jessica atene so tongana lo yeke fa tënë na ambeni ita na mbeni ye so asi na mbeni ayeke nzoni ape, lo yeke gi ti luti na ndö ni ape. Me lo yeke sara tënë na ndö ti mbeni nzoni ye, na tapande ambeni nzoni ye so e wara na fango tënë atâa so ambeni zo asara ye na e nzoni ape.

Jéhovah ahinga nzoni mingi so na ambeni ngoi a yeke ngangu na e ti fa tënë. Me a nzere na lo mingi tongana e sara ye na azo na nzoni bê tongana ti lo (Luc 6:36). Biani, Jéhovah ayeke ngbâ ti sara ye na nzoni bê na azo ti dunia so nga ti ngbâ ti bâ mawa ti ala teti lakue lakue ape. E lingbi ti hinga biani so lo hinga nzoni mingi lawa la lo yeke futi sioni dunia so. Juska ti si na ngoi ni so, fango tënë ti e ayeke mbeni ye so a lingbi e sara ni hio (2 Tim. 4:2). Tongaso, zia e ngbâ ti yapu na fango tënë nga e bâ biani mawa ti “mara ti azo nde nde kue”.