“Ala yeke fa tënë ti kuâ ti Seigneur juska lo ga.”​—1 ACOR. 11:26.

BIA 18 Singila ndali ti ye so a futa ti zi e

AYE SO E YEKE BÂ NI *

1-2. (a) Nyen la Jéhovah ayeke bâ na ngoi so azo kutu mingi aga ndali ti Kobe ti Seigneur? (Bâ foto ti couverture ni.) (b) Nyen la e yeke bâ na yâ ti article so?

IMAGINÉ ye so Jéhovah ayeke bâ na ngoi so azo kutu mingi na yâ ti dunia abungbi ndali ti Kobe ti Seigneur. Lo bâ gï wungo ti azo so aga so ape, me lo bâ zo oko oko kue so ayeke dä. Na tapande, lo bâ azo so ayeke ga lakue ngu oko oko. Na popo ti ala a yeke wara azo so aga atâa so a sara ngangu mingi na ala. Ambeni ayeke ga lakue na ambeni bungbi ti e ape, me ala bâ gango na Dango bê na kuâ ti Christ tongana mbeni ye so ayeke kota mingi so a lingbi ala sara ni. Jéhovah ayeke bâ nga azo so kozo gango ti ala na Dango bê na kuâ ti Christ la, peut-être ala ye ti hinga gï ye na ndö ni.

2 Kite ayeke dä ape so a nzere na Jéhovah ti bâ so gbâ ti azo aga na Dango bê na kuâ ti Christ (Luc 22:​19). Ye oko, kozo ye so agbu bê ti Jéhovah ayeke pëpe wungo ti azo so aga. Ye so agbu bê ti Jéhovah mingi ayeke raison ti gango ti ala; aye so apusu ala ti ga ayeke kota ye mingi na lê ti lo. Na yâ ti article so, e yeke kiri tënë na mbeni hunda so ayeke kota mingi: Ngbanga ti nyen la e yeke ga na Dango bê na kuâ ti Christ nga na abungbi ti yenga oko oko kue so Jéhovah aleke ni ndali ti azo so aye lo?

(Bâ paragraphe 1-2) *

SARANGO TERÊ KETE APUSU E TI GUE NA ABUNGBI

3-4. (a) Ngbanga ti nyen la e yeke ga na abungbi? (b) Sarango ye wa la apusu e ti ga na abungbi? (c) Ti gue oko na tënë so ayeke na 1 aCorinthien 11:23-26, ngbanga ti nyen la a lingbi e manke Dango bê na kuâ ti Christ ape?

3 E yeke gue na abungbi ti congrégation kozoni kue ndali ti so ayeke mbeni ye so e yeke sara ni ti voro na Nzapa. E yeke gue nga na abungbi ndali ti so Jéhovah ayeke fa ye na e na ngoi ni. Azo ti baba ayeda ape so ala bezoin ti tene a fa mbeni ye na ala (3 Jean 9). Me ti e, e ye mingi ti tene Jéhovah nga na bungbi ti lo so lo yeke sara kua na ni afa ye na e.​—És. 30:​20; Jean 6:⁠45.

4 So e gue na abungbi afa so e sara terê ti e kete, e duti nduru nga e yeda na bê ti e kue ti tene a fa ye na e. Na bï ti Dango bê na kuâ ti Christ, e yeke gue na kota bungbi so gï pëpe ndali ti so a lingbi e gue me nga ndali ti so e sara terê ti e kete ti sara ye alingbi na commandement ti Jésus so: “Ala ngbâ ti sara ye so ti dabe ti ala na mbi.” (Diko 1 aCorinthien 11:​23-26.) Bungbi so akpengba beku ti e mingi nga adabe ti e so Jéhovah aye e mingi. Ye oko, Jéhovah ahinga so e bezoin ti tene a kpengba e nga a dë ti e fani mingi na yâ ti ngu oko. Tongaso, lo leke abungbi ndali ti e na yâ ti yenga oko oko kue nga lo wa e ti gue dä. Sarango terê kete ayeke pusu e ti mä yanga ti lo. E yeke mû angbonga mingi yenga oko oko ti leke abungbi so nga ti gue dä.

5. Ngbanga ti nyen la azo so asara terê ti ala kete ayeda na tisango ndo ti Jéhovah?

5 Ngu oko oko, azo mingi so asara terê ti ala kete ayeda na tisango ndo so Jéhovah atisa ala ti fa ye na ala (És. 50:⁠4). A nzere na ala ti gue na Dango bê na kuâ ti Christ, na ala komanse ti gue na ambeni bungbi ni (Zach. 8:​20-23). A nzere na e na ala kue ti tene Jéhovah, “zo ti mungo maboko na [e] nga zo ti sö [e]”, afa ye na e nga afa lege na e (Ps. 40:​17). Biani, mbeni ye so anzere na e mingi, wala so ayeke kota mingi, ahon ti yeda na tisango ndo so Jéhovah na Jésus, Molenge ti lo so lo ye lo mingi, atisa e ti fa ye na e ayeke dä ape.​—Mat. 17:5; 18:​20; 28:⁠20.

6. Tongana nyen la sarango terê kete amû maboko na mbeni koli ti gue na Dango bê na kuâ ti Christ?

6 Ngu oko oko, e yeke sara ngangu ti tisa azo mingi ti ga na Dango bê na kuâ ti Christ. Azo mingi so asara terê ti ala kete awara aye ti nzoni na peko ti so ala yeda na tisango ndo ti e. Bâ mbeni tapande. A sara ambeni ngu awe, mbeni ita-koli amû na mbeni koli mbeti ti tisango zo na Dango bê na kuâ ti Christ, me koli ni atene na ita ni so ni peut ti ga ape. Ye oko, na bï ti Dango bê na kuâ ti Christ, li ti ita ni akpe ti bâ oko koli so ayeke lï na Da ti Royaume. So aita abara koli ni na ngia apika bê ti koli ni mingi tongaso lo komanse ti gue na abungbi ti e yenga oko oko kue. Ti tâ tënë ni, lo manke bungbi gï fani ota na yâ ti ngu so aga na pekoni. Nyen la amû maboko na lo ti mû desizion ti gue na abungbi kue? Lo sara terê ti lo kete mingi ti changé bango ndo ti lo. Ambeni ngoi na pekoni, ita so atisa lo lani atene: “Lo yeke mbeni koli so asara terê ti lo kete mingi.” Kite ayeke dä ape so Jéhovah agboto koli so ti voro Lo, na lo yeke fadeso mbeni ita so awara batême awe.​—2 Sam. 22:​28; Jean 6:⁠44.

7. Tongana nyen la aye so e manda na ngoi ti abungbi nga na aye so e diko na yâ ti Bible alingbi ti mû maboko na e ti sara terê ti e kete?

7 Aye so e manda na ngoi ti abungbi nga na aye so e diko na yâ ti Bible alingbi ti mû maboko na e ti sara terê ti e kete. Na yâ ti ayenga so aga kozo na Dango bê na kuâ ti Christ, fani mingi abungbi ti e asara tënë mingi na ndö ti tapande ti Jésus nga na ndö ti fason so lo sara terê ti lo kete na lege so lo mû fini ti lo tongana ye so a futa ti zi azo. Nga na yâ ti alango so aga kozo na Dango bê na kuâ ti Christ, a yeke nzoni e diko ambaï ti Bible so asara tënë na ndö ti aye so ague juska na kuâ ti Jésus nga na zingongo ti lo. Aye so e manda na ngoi ti abungbi nga na aye so e diko na yâ ti Bible na ndö ti aye ni so asara si e kiri singila mingi ndali ti sandaga so Jésus amû ndali ti e. Ye so apusu e ti sara terê ti e kete tongana lo nga ti sara ye so bê ti Jéhovah aye, même na ngoi so a yeke ngangu na e ti sara ni.​—Luc 22:​41, 42.

 SARANGO YE NA MBETO APE AMÛ MABOKO NA E TI GUE NA ABUNGBI

8. Tongana nyen la Jésus afa so lo sara ye na mbeto ape?

8 E yeke gi nga ti sara ye tongana Jésus ti sara ye na mbeto ape. Gbu li na ndö ti lege so lo sara ye na mbeto ape na yâ ti alango so aga kozo na kuâ ti lo. Lo hinga lani nzoni mingi so na yâ ti kete ngoi awato ti lo ayeke sara ye ti kamene na lo, ala yeke pika lo nga ala yeke fâ lo (Mat. 20:​17-19). Me lo yeda ti kui. Tongana ngoi ni alingbi, lo tene na abazengele ti lo so ayeke be-ta-zo, so ayeke lani na terê ti lo na Gethsémané, lo tene: “Ala londo, e gue. Bâ, zo ti kango mbi aga nduru awe.” (Mat. 26:​36, 46). Nga na ngoi so gbâ ti azo so ayeke na aye ti bira na maboko ti ala aga ti gbu lo, lo sigi na popo ti adisciple ti lo, lo luti na devant, lo fa terê ti lo nga lo tene na aturugu ni ti zia abazengele ti lo ahon (Jean 18:​3-⁠8). So tâ sarango ye na mbeto ape la Jésus asara so! Laso, aChrétien so a soro ala ti gue na yayu nga na ambeni taba ayeke sara ngangu ti sara ye na mbeto ape tongana Jésus. Na lege wa?

So mo sara ye na mbeto ape ti gue na abungbi ti aChrétien ayeke kpengba amba ti mo (Bâ paragraphe 9) *

9. (a) Ngbanga ti nyen la peut-être e bezoin ti sara ye na mbeto ape ti gue lakue na abungbi? (b) Nyen la tapande ti e alingbi ti sara na ndö ti aita ti e so a kanga ala ndali ti tënë ti mabe ti ala?

9 Ti gue na abungbi lakue, peut-être e bezoin ti sara ye na mbeto ape na angoi ti ngangu. Ambeni ita ti e ayeke gue na abungbi atâa so ala yeke na vundu, ala découragé wala ala yeke na kpale ti seni. Ambeni ayeke gue na abungbi atâa so afami ti ala wala akota zo ti gouvernement akanga lege na ala ngangu. Gbu li kete na ndö ti ye so tapande ti e ayeke sara na ndö ti aita ti e so a kanga ala ndali ti tënë ti mabe ti ala (aHéb. 13:⁠3). Tongana ala mä so e ngbâ ti sara na Jéhovah be-ta-zo atâa so e yeke na yâ ti atara ayeke kpengba ala ti ngbâ ti duti na mabe, ti sara ye na mbeto ape nga ti ngbâ ti sara ye ti mbilimbili. Mara ti ye so asi lani na bazengele Paul. Na ngoi so lo yeke lani na kanga na Rome, lo yeke lani na ngia na ngoi kue so lo mä so aita ti lo angbâ ti sara na Nzapa be-ta-zo (aPhil. 1:​3-5, 12-14). Ngoi kete kozo ti tene a zi Paul wala kete na peko ti so a zi lo, lo sû lettre ti lo na aHébreu. Na yâ ni lo wa aChrétien so ayeke be-ta-zo ti zia “yengo terê ti ala ti aita angbâ ti gue” nga ti manke abungbi lâ oko ape.​—aHéb. 10:​24, 25; 13:1.

10-11. (a) Azo wa la a lingbi e tisa ala na Dango bê na kuâ ti Christ? (b) Raison wa la aÉphésien 1:7 afa so amû lege na e ti sara ni?

10 E yeke fa so e sara ye na mbeto ape na ngoi so e tisa afami ti e, amba ti e ti place ti kua nga na avoizin ti e ti ga na Dango bê na kuâ ti Christ. Ngbanga ti nyen la e yeke tisa ala? E bâ na nene ni mingi ye so Jéhovah na Jésus asara ndali ti e ni la e ye biani ti tisa azo ti ga na Dango bê na kuâ ti Christ. E ye ti tene ala hinga tongana nyen la ala nga ala lingbi ti bâ nzoni na lege ti “kota nzobe” ti Jéhovah na lege ti ye so a futa ti zi azo.​—Diko aÉphésien 1:7; Apoc. 22:⁠17.

11 Na ngoi so e fa so e sara ye na mbeto ape na lege so e bungbi oko, e yeke fa nga so e yeke na mbeni sarango ye nde so ayeke kota mingi, sarango ye so Nzapa na Molenge ti lo afa na alege so apika bê mingi.

 NDOYE APUSU E TI GUE NA ABUNGBI

12. (a) Tongana nyen la abungbi ti e ayeke sara si e ndoye Jéhovah na Jésus mingi? (b) Nyen la 2 aCorinthien 5:14, 15 awa e ti sara ti mû tapande ti Jésus?

12 Ndoye so e yeke na ni na mbage ti Jéhovah na Jésus apusu e ti gue na abungbi. Na pekoni, aye so e manda na ngoi ti abungbi asara si e ye Jéhovah na Molenge ti lo mingi. Na ngoi ti abungbi, a yeke dabe ti e lakue na ye so ala sara ndali ti e (aRom. 5:⁠8). Dango bê na kuâ ti Christ adabe ti e mbilimbili so ala ndoye e mingi, même azo so ade abâ na nene ni pëpe ye so a futa ti zi azo. So e ye mingi ti kiri singila, e yeke gi ti sara ye tongana Jésus na yâ ti fini ti e ti lâ na lâ. (Diko 2 aCorinthien 5:​14, 15.) Na ndö ni, bê ti e ayeke pusu e ti gonda Jéhovah so amû ye so a futa ti zi azo. Mbeni lege so e lingbi ti gonda lo ayeke ti mû acommentaire na bê ti e kue na ngoi ti abungbi.

13. Na lege wa la e lingbi ti fa so e ndoye Jéhovah na Molenge ti lo mingi? Fa ngbanga ti nyen la mo tene tongaso.

13 E lingbi ti fa so e ndoye Jéhovah na Molenge ti lo mingi na lege so e yeda na bê ti e wani ti sara asacrifice ndali ti ala. Fani mingi, a lingbi e sara asacrifice nde nde ti mû lege na e ti gue na abungbi. Acongrégation mingi ayeke sara bungbi na hunzingo ti mbeni lango ti kua na ngoi so peut-être e fatigué mingi. Nga e yeke sara mbeni bungbi na nda-yenga na ngoi so tanga ti azo ayeke wu terê ti ala. Eskê Jéhovah ahinga so e yeke gue na abungbi atâa so e fatigué? Biani, lo hinga ni. Jéhovah abâ angangu kue so e yeke sara ti gue na abungbi na lo bâ ni na nene ni.​—Marc 12:​41-⁠44.

14. Tongana nyen la Jésus azia na e tapande ti tâ ndoye?

14 Jésus azia na e nzoni tapande ti tâ ndoye. Lo yeda na bê ti lo ti kui ndali ti adisciple ti lo nga lo gi ti zia aye so agbu bê ti ala kozo na ti lo na yâ ti fini ti lo lâ oko oko. Na tapande, na ngoi so lo fatigué wala lo yeke lani na yâ ti kota vundu lo mû ngoi ti sara lisoro na ala nga ti fa ye na ala (Luc 22:​39-46). Nga lo yeke gbu li ti lo lani mingi na ndö ti ye so lo lingbi ti mû na azo, me pëpe na ndö ti ye so lo lingbi ti wara na mbage ti ala (Mat. 20:​28). Tongana ndoye ti e na mbage ti Jéhovah nga na mbage ti aita ti e akpengba tongaso, e yeke sara ye kue so e lingbi ti sara ti gue na Dango bê na kuâ ti Christ nga na tanga ti abungbi kue ti congrégation.

15. Azo wa la e ye mingi ti mû maboko na ala?

 15 E yeke na yâ ti sewa ti aita so ayeke atâ Chrétien, na e ye ti sara kue ti mû ngoi ti tisa azo ti ga na yâ ti sewa so. Ye oko, e ye mingi ti mû maboko na azo so ayeke “aita ti e na yâ ti mabe” so azia ti fa tënë nga ti gue na abungbi (aGal. 6:​10). E yeke fa ndoye ti e na mbage ti ala na lege so e yeke kpengba ala ti gue na abungbi, mbilimbili na Dango bê na kuâ ti Christ. Legeoko tongana Jéhovah nga na Jésus, a nzere na e mingi tongana mbeni ita so azia ti fa tënë nga ti gue na abungbi akiri na Jéhovah, Babâ ti e nga Berger ti e so ayeke sara ye na ndoye.​—Mat. 18:⁠14.

16. (a) Tongana nyen la e lingbi ti kpengba amba ti e? Abungbi ti e ayeke sara nyen na e? (b) Ngbanga ti nyen a yeke mbeni nzoni ngoi na yâ ti ngu ni ti dabe na atënë ti Jésus so ayeke na Jean 3:16?

16 Na yâ ti ayenga so ayeke ga, sara kue ti tisa azo mingi ti ga na Dango bê na kuâ ti Christ so ayeke duti ande na vendredi lango 19 ti avril ngu 2019 na lakui. (Bâ encadré “ Mo yeke tisa ala?”) Na yâ ti ngu so ayeke ga, zia e kpengba amba ti e na lege ti tapande ti e ti gue na abungbi kue so Jéhovah aleke ndali ti e. So aye ti ngoi so aga nduru ti hunzi, abungbi ti e ayeke mû maboko na e ti ngbâ ti sara terê ti e kete, ti sara ye na mbeto ape nga ti ndoye azo (1 aThes. 5:​8-11). Na bê ti e kue zia e fa so e kiri singila mingi ndali ti so Jéhovah nga na Molenge ti lo aye e mingi.​—Diko Jean 3:⁠16.

BIA 126 Zia lê ti mo angbâ na zingo ni, luti ngangu

^ par. 5 Dango bê na kuâ ti Christ so ayeke ande na vendredi na lakui, na lango 19 ti avril ngu 2019, ayeke duti ande bungbi so ayeke kota mingi na yâ ti ngu ni. Nyen la ayeke pusu e ti gue na kota bungbi so? Kite ayeke dä ape so a yeke ndali ti so e ye ti zia ngia na bê ti Jéhovah. Na yâ ti article so, e yeke bâ asarango ye so apusu e ti gue na Dango bê na kuâ ti Christ nga na abungbi ti e ti yenga oko oko.

^ par. 50 FOTO TI COUVERTURE: A yeke yamba azo so aga na Dango bê na kuâ ti Christ

^ par. 52 NDA TI AFOTO: Mabe ti mbeni ita-koli so a kanga lo ndali ti tënë ti mabe ti lo akpengba na lege ti lettre so azo ti da ti lo atokua na lo. Lo hinga so azo ti sewa ti lo agirisa lo ape, terê ti lo anzere mingi ti mä so sewa ti lo nga angbâ be-ta-zo na Jéhovah atâa so bira ayeke na ndo so ala yeke dä.