“E yeke tiri . . . na asioni yingo so ayeke na yayu.”​—AÉPH. 6:12.

BIA 55 Sara mbeto ti ala pëpe!

AYE SO E YEKE BÂ NI *

1. Tongana ti so a fa na aÉphésien 6:10-13, mbeni kpengba lege so Jéhovah afa so lo pensé na e ayeke so wa? Mo tene tongaso ngbanga ti nyen?

MBENI kpengba lege so Jéhovah afa so lo pensé na e awakua ti lo ayeke so lo yeke mû maboko na e ti luti na awato ti e. Akota wato ti e ayeke Satan nga na asioni yingo. Jéhovah amû wango na e na ndö ti awato so nga lo mû na e ye so e bezoin ni ti luti na ala. (Diko aÉphésien 6:10-13.) Tongana e yeda na mungo maboko ti Jéhovah nga e zia bê ti e kue na lo, e yeke luti na Zabolo nzoni. E lingbi ti duti na mara ti confiance so bazengele Paul ayeke lani na ni. Lo tene: “Tongana Nzapa ayeke na e, zo wa la si ayeke ke e ande?”​—aRom. 8:31.

2. Nyen la e yeke bâ na yâ ti article so?

2 Ndali ti so e yeke atâ Chrétien, e yeke zia li ti e mingi ape na ndö ti Satan na asioni yingo. E zia li ti e mingi na ndö ti mandango ye na ndö ti Jéhovah nga na ndö ti kua so e yeke sara ndali ti lo (Ps. 25:5). Me e bezoin ti hinga ye na ndö ti aye so Satan ayeke sara. Ngbanga ti nyen? Tongaso si e lingbi ti kpe amayele ti lo (2 aCor. 2:11; kete tënë na gbe ni). Na yâ ti article so, e yeke bâ mbeni kota ye so na yâ ni Satan na asioni yingo ayeke gi ti handa azo. E yeke bâ nga tongana nyen la e lingbi ti luti na ala nzoni.

ASIONI YINGO AYEKE HANDA AZO TONGANA NYEN?

3-4. (a) Sarango yorö ayeke nyen? (b) Nyen la afa so tënë ti sarango yorö amû ndo mingi?

3 Mbeni kota ye so na yâ ni Satan na asioni yingo ayeke gi ti handa azo ayeke sarango yorö. Azo so ayeke sara yorö atene so ala hinga aye wala ala yeke na ngangu na ndö ti aye so asenge zo alingbi ti hinga ape wala ala yeke na ngangu na ndö ni  ape. Na tapande, ambeni atene so ala lingbi ti sara kua na mbadi wala ti gi nda ti aye na lege ti atongoro ti hinga ye so ayeke si kekereke. Ambeni alingbi ti sara ye mo bâ mo tene ala yeke sara tënë na azo so akui awe. Ambeni alingbi ti sara ye ti likundu wala ti magie nga ala lingbi ti gi ti sara sioni na azo na lege ti yorö. *

4 Eskê azo mingi amä na bê na ngangu ti sarango yorö? Na peko ti so a gi nda ti ye na yâ ti akodro 18 ti Amérique Latine na ti Caraïbe, a bâ so tongana a mû azo ota, zo oko tongaso amä na bê na magie wala na likundu, nga tongana a mû azo ota, zo oko tongaso amä na bê so lege ayeke dä ti sara lisoro na ayingo. A gi nga nda ti ye na yâ ti akodro 18 na Afrika. Kâ, a hon ndambo ti azo so a hunda ala amä na bê na likundu. Biani, atâa ndo wa la e yeke dä, a lingbi e sara hange na sarango yorö. Satan ayeke gi ti “handa azo na ndö ti sese kue”.​—Apoc. 12:9.

5. Jéhovah apensé nyen na ndö ti sarango yorö?

5 Jéhovah ayeke “Nzapa ti tâ tënë”. (Ps. 31:5). Tongaso, lo pensé nyen na ndö ti sarango yorö? Lo ke ni! Jéhovah atene lani na azo ti Israël, lo tene: “A lingbi a wara na popo ti ala pëpe zo so asara si a gbi molenge ti lo ti koli wala ti wali na wâ, wala zo ti bango mbadi, wala zo ti sarango magie, wala zo ti fango ye so ayeke si kekereke, wala zo ti yorö, wala zo ti kangango amba ti lo na yorö, wala zo so ague abâ zo ti sarango tënë na yingo ti akuâ, wala zo so ague abâ zo ti fango aye so ayeke si ande na zo, wala zo so ayeke hunda tënë na akuâ. Zo so asara aye so, lo yeke sioni mingi na lê ti Jéhovah.” (Deut. 18:10-12). A-Chrétien ayeke pëpe na gbe ti Ndia so Jéhovah amû lani na azo ti Israël. Ye oko, e hinga so pensé ti lo na ndö ti sarango yorö achangé ape.​—Mal. 3:6.

6. (a) Satan asara kua na sarango yorö tongana nyen ti sara sioni na azo? (b) Ti gue oko na Zo-ti-fa-tene 9:5, tâ tënë na ndö ti ye so ayeke si na zo na peko ti kuâ ayeke so wa?

6 Jéhovah amû wango na e na ndö ti sarango yorö ndali ti so lo hinga so Satan asara kua na ni ti sara sioni na azo. Satan asara kua na sarango yorö ti sara si amvene amaï, na popo ti amvene ni a yeke wara ti so atene akuâ ayeke na fini na mbeni ndo. (Diko Zo-ti-fa-tene 9:5.) Satan asara nga kua na sarango yorö ti sara si azo angbâ na yâ ti mbeto nga ti gue na ala yongoro na Jéhovah. Ye so lo zia na gbele lo ayeke ti tene azo so ayeke sara yorö azia bê ti ala na asioni yingo me pëpe na Jéhovah.

AYE TI SARA TI LUTI NA ASIONI YINGO

7. Nyen la Jéhovah afa na e?

7 Tongana ti so a fa fade na tongo nda ti article so, Jéhovah afa na e ye so e bezoin ti hinga ni tongaso si e lingbi ti kpe si Satan na asioni yingo ahanda e ape. Zia e bâ ambeni nzoni ye so e lingbi ti sara ti tiri na Satan nga na asioni yingo.

8. (a) Kpengba ye so e yeke sara ti luti na asioni yingo ayeke so wa? (b) Tongana nyen la Psaume 146:4 afa na gigi mvene ti Satan na ndö ti kuâ?

8 Diko Bible nga gbu li na ndö ni. So ayeke kpengba ye so e yeke sara ti ke amvene so asioni yingo ayeke maï ni. Bible ayeke mbeni epée so yanga ni aza mingi so alingbi ti fa na gigi amvene so Satan ayeke maï ni (aÉph. 6:17). Na tapande, Bible afa na gigi nda ti  mvene so atene akuâ alingbi ti sara lisoro na azo so ayeke na fini. (Diko Psaume 146:4.) A fa nga na e so gï Jéhovah oko la alingbi ti fa ye so ayeke si kekereke so e lingbi ti zia bê ti e na ni (És. 45:21; 46:10). Tongana lakue e diko Bible nga e gbu li na ndö ni, e yeke leke terê ti e ti ke amvene so asioni yingo aye ti tene e mä na bê na ni.

9. Asarango ye wa so andu sarango yorö e yeke kpe ni?

9 Sara pëpe mbeni ye so andu sarango yorö. Ndali ti so e yeke atâ Chrétien, e yeke sara lâ oko ape mbeni ye so andu sarango yorö. Na tapande, e yeke gue pëpe ti bâ mbeni zo so ayeke sara tënë na yingo ti akuâ wala e yeke gi pëpe ti sara tënë na akuâ na mbeni lege nde. Tongana ti so e bâ na yâ ti article so ahon, e yeke kpe angobo ti place ti kuâ so aluti na ndö ti tënë so atene akuâ angbâ na fini na mbeni ndo. E yeke gi pëpe nda ti ye na lege ti atongoro wala e yeke gue pëpe ti bâ mbeni zo so ayeke fa ye so ayeke si na zo ti hinga aye so ayeke si kekereke (És. 8:19). E hinga so asarango ye so kue ayeke sioni mingi nga alingbi ti sara si e sara lisoro droit na Satan nga na asioni yingo.

Mû tapande ti akozo Chrétien na lege so mo bi aye kue so andu sarango yorö so peut-être mo yeke na ni nga mo ke angia so andu sarango yorö (Bâ paragraphe 10-12)

10-11. (a) Nyen la ambeni zo na ngoi ti akozo Chrétien asara na ngoi so ala manda tâ tënë? (b) Ti gue oko na 1 aCorinthien 10:21, ngbanga ti nyen la a lingbi e mû tapande ti akozo Chrétien? E lingbi ti sara ni tongana nyen?

10 Bi aye kue so andu sarango yorö. Ambeni zo so ayeke lani na Éphèse na ngoi ti akozo Chrétien ayeke sara lani yorö. Na ngoi so ala manda tâ tënë, ala sara akota changement. “Gbâ ti azo so ayeke sara lani aye ti magie aga na ambeti ti ala legeoko, ala zö ni na lê ti azo kue.” (Kus. 19:19). Ala sara lani ye kue so ala lingbi ti sara ti luti na asioni yingo. Ngere ti ambeti ti magie ti ala ayeke lani ngangu mingi. Me ahon ti tene ala mû ambeti ni so na azo wala ala kä ni, ala gbi ni. Ti zia ngia na bê ti Jéhovah agbu bê ti ala lani mingi ahon ngere ti ambeti so.

11 Tongana nyen la e lingbi ti mû tapande ti  akozo Chrétien so? A yeke na lege ti ndara ti bi aye kue so peut-être e yeke na ni so andu sarango yorö. Aye so ayeke aye tongana awaraga wala ambeni ye nde so azo ayeke yü wala ayeke duti na ni ti gï ti bata terê ti ala na asioni yingo.​—Diko 1 aCorinthien 10:21.

12. Ahundango ndo wa la a lingbi e hunda terê ti e na ni na ndö ti angia so e yeke sara?

12 Bâ yâ ti angia so mo yeke sara nzoni. Hunda terê ti mo: ‘Eskê mbi yeke diko ambeti, ambeti-sango wala a-article na ndö ti Internet so andu sarango yorö? Ka ti abia, akuasinga ti télé so mbi yeke bâ wala angia ti vidéo so mbi yeke sara? Ambeni ngia so mbi yeke sara andu sarango yorö? Na yâ ti ambeni ngia so mbi yeke sara a yeke fa azo ti yâ ti apande so ayeke nyon mênë ti azo, azo so azingo na kuâ nga na aye ti ndima? Ambeni ngia ni afa aye ti magie, sarango sioni na zo na lege ti yorö wala debango zo tongana ye so ayeke sioni ape?’ Ti tâ tënë ni, a yeke pëpe angia kue so afa aye so ayeke atâ ye ape la andu sarango yorö. Na ngoi so mo yeke bâ yâ ti angia so mo yeke sara, leke na bê ti mo ti soro angia so ayeke mû maboko na mo ti ngbâ ayo na ye kue so Jéhovah ake. A lingbi e sara kue ti “bata nzoni conscience” na gbele Nzapa ti e.​—Kus. 24:16. *

13. Nyen la a lingbi e kpe ti sara ni?

13 Tene pëpe tënë ti aye so asioni yingo asara. Na ndö ti tënë so, a lingbi e mû tapande so Jésus azia na e (1 Pi. 2:21). Kozo ti tene Jésus aga na sese, lo yeke lani na yayu, na lo hinga lani ye mingi na ndö ti Satan nga na asioni yingo. Me lo yeke tene lani pëpe tënë ti aye so asioni yingo so asara. Jésus aye  lani ti fa ye na azo na ndö ti Jéhovah, me pëpe na ndö ti Satan. E lingbi ti mû tapande ti Jésus na lege so e yeke sara pëpe si tënë ti aye so asioni yingo asara amû ndo. Me e yeke fa na lege ti atënë ti e so “bê ti [e] asi singo na mbeni nzoni ye,” so ti tene tâ tënë.​—Ps. 45:1.

E yeke na mbeni ye oko ti sara mbeto ni na mbage ti asioni yingo ape. Jéhovah, Jésus nga na a-ange ayeke na ngangu mingi ahon ala (Bâ paragraphe 14-15) *

14-15. (a) Ngbanga ti nyen la a lingbi e sara mbeto ti asioni yingo ahon ndö ni ape? (b) Nyen la afa polele so Jéhovah ayeke bata azo ti lo laso?

14 Sara mbeto ti asioni yingo ahon ndö ni ape. Na yâ ti dunia so ayeke mbilimbili-kue ape so, asioni ye alingbi ti si na e. Ndao, kobela wala même kuâ alingbi ti si na e sân ti tene e ku terê ti e na ni. Me a lingbi e pensé ape so asioni yingo la asara si asi na e. Bible atene: ‘Ye so zo aku terê ti lo na ni pëpe’ alingbi ti si na zo kue (Zo-ti. 9:11). Ti asioni yingo, Jéhovah afa so lo yeke na ngangu mingi ahon ala. Na tapande, Nzapa azia lani lege pëpe na Satan ti fâ Job (Job 2:6). Na ngoi ti Moïse, Jéhovah afa lani so lo yeke na ngangu mingi ahon aprêtre ti Égypte so ayeke sara magie (Ex. 8:18; 9:11). Jéhovah amû na Jésus so awara gloire ngangu ti mû Satan nga na asioni yingo na yayu ti bi ala na sese. Fafadeso a yeke bi ala na yâ ti kota dû so alï mingi, kâ ala yeke wara ande lege ti sara sioni na zo oko ape.​—Apoc. 12:9; 20:2, 3.

15 E bâ gbâ ti aye so afa so Jéhovah ayeke bata awakua ti lo laso. Gbu li na ndö ti ye so: E yeke fa tënë nga e yeke fa na azo tâ tënë na ndö ti sese kue (Mat. 28:19, 20). Ye so asara si e yeke fa na gigi asioni kusala ti Zabolo. Kite ayeke dä ape so tongana fade Satan ayeke na ngangu ti kanga lege na kua ti e kue ka lo sara ni awe, me lo lingbi ti sara ni ape. Tongaso, e bezoin pëpe ti sara mbeto ti asioni yingo ahon ndö ni. E hinga so “lê ti Jéhovah ayeke bâ ndo na ndö ti sese kue ti mû ngangu ti lo ti mû maboko na azo so azia bê ti ala kue na lo.” (2 Chron. 16:9). Tongana e yeke be-ta-zo na Jéhovah, asioni yingo alingbi pëpe ti sara sioni na e aninga.

ANZONI YE SO AZO SO AYEDA NA MUNGO MABOKO TI JÉHOVAH AYEKE WARA

16-17. Mû mbeni tapande so afa so a lingbi zo asara ye na mbeto ape si lo luti na asioni yingo.

16 A lingbi e sara ye na mbeto ape si e luti na asioni yingo, mbilimbili tongana akamarade ti  e nga na afami ti e so ayeke na anzoni bibe ake e. Me Jéhovah ayeke iri tënë nzoni na ndö ti azo so asara ye na mbeto ape. Bâ tapande ti Erica, mbeni ita-wali so ayeke na Ghana. Erica ayeke lani na ngu 21 na ngoi so lo yeda ti manda Bible. Ndali ti so babâ ti lo ayeke mbeni prêtre so ayeke sara magie, a ku lani na mbage ti lo ti tene lo mû mbage na angobo so andu tengo akobe so a mû na sacrifice na anzapa ti babâ ti lo. Na ngoi so Erica ake, azo ti sewa ti lo abâ ni tongana zongango anzapa ti babâ ti lo. Azo ti sewa ni apensé so anzapa ni ayeke sara si kobela ti li asara ala wala terê ti ala ason.

17 Azo ti sewa ti Erica agi ti forcé lo ti mû mbage na ngobo so, me lo ke, atâa so na sarango tongaso lo doit ti quitté da ti ala. Ambeni Témoin azia lo, lo lango na ndo ti ala. Na lege so, Jéhovah asara si Erica awara mbeni fini sewa: amba ti lo aChrétien so aga tongana aita ti lo na lege ti mitele (Marc 10:29, 30). Atâa so afami ti Erica ake lo nga ala gbi aye ti lo, lo ngbâ be-ta-zo na Jéhovah, lo wara batême, na lo yeke fadeso pionnier permanent. Lo sara mbeto ti asioni yingo ahon ndö ni ape. Erica atene na ndö ti azo ti sewa ti lo, lo tene: “Mbi yeke sambela lâ na lâ ti tene mbeni lâ azo ti sewa ti mbi awara aye ti nzoni so zo ayeke wara na lege ti hingango Jéhovah nga ti wara liberté so aga na lege ti sarango na Nzapa so aye e.”

18. Tongana e sara confiance na Jéhovah, aye ti nzoni wa la e yeke wara?

18 E kue la mara ti ye tongaso ayeke tara mabe ti e ape. Ye oko, a lingbi e kue e luti na asioni yingo nga e sara confiance na Jéhovah. Tongana e sara tongaso, e yeke wara aye ti nzoni mingi nga amvene ti Satan ayeke handa e ape. Na ndö ni, e yeke zia pëpe si mbeto ti asioni yingo akanga lege na e ti sara na Jéhovah. Ye so ayeke kota mingi ayeke so e yeke kpengba songo ti kamarade so ayeke na popo ti e na Jéhovah. Disciple Jacques atene: “Ala woko terê ti ala na gbe ti Nzapa; me ala luti na Zabolo, na lo yeke kpe ande yongoro na ala. Ala ga nduru na Nzapa, na lo yeke ga ande nduru na ala.”​—Jacq. 4:7, 8.

BIA 150 Gi Nzapa si lo zi mo

^ par. 5 Na ndoye Jéhovah amû na e wango na ndö ti asioni yingo nga na sioni so ala lingbi ti sara na azo. Tongana nyen la asioni yingo ayeke gi ti handa azo? Aye wa la e lingbi ti sara ti luti na asioni yingo? Article so ayeke sara tënë na ndö ti lege so Jéhovah ayeke mû maboko na e si asioni yingo ahanda e ape.

^ par. 3 NDA TI AMBENI TËNË: Sarango yorö aye ti sara tënë ti aye so azo amä na bê na ni nga na asarango ye so andu asioni yingo. A ndu nga tënë so azo amä na bê na ni so a tene ayingo ti azo ayeke ngbâ na fini na peko ti kuâ ti ala nga ayingo ni so ayeke sara lisoro na azo so angbâ na fini, mbilimbili na lege ti mbeni zo (mbeni zo so ayeke sara tënë na yingo ti akuâ). Sarango yorö andu nga aye tongana likundu nga na bango mbadi. Na yâ ti article so, magie aye ti sara tënë ti aye so andu sarango yorö wala aye ti ndima. Na yâ ni a yeke wara debango zo nga na sarango sioni na zo na lege ti yorö. A ye pëpe ti sara tënë ti aye so azo asara ti handa azo na bango yâ ti maboko ti ala, so ambeni zo asara ni gï ti sara na ngia.

^ par. 12 A-ancien ayeke pëpe na droit ti lu andia na ndö ti angia. Me a lingbi Chrétien oko oko asara kua na conscience ti lo so Bible afa lege na ni na ngoi so lo yeke soro aye so lo yeke diko, lo yeke bâ wala ngia so lo yeke sara. Amokonzi ti sewa so asara ye na ndara ayeke sara kue ti tene angia so sewa ti ala asara ague oko na amama-ndia ti Bible.​—Bâ article “Y a-t-il des films, des livres ou des chansons qui sont interdits aux Témoins de Jéhovah ?” na gbe ti QUI SOMMES-NOUS ? > QUESTIONS FRÉQUENTES, so ayeke na ndö ti jw.org®.

^ par. 54 NDA TI FOTO: A fa Jésus Gbia ti e so ayeke na yayu so ayeke na ngangu mingi so ayeke mû li ni na ndö ti a-ange so ayeke aturugu. Trône ti Jéhovah ayeke na ndö ti ala.