Gue na tënë ti yâ ni

Gue na li ti atënë ni

 ARTICLE TI MANDANGO NI 33

A yeke sö ande “ala so ayeke mä mo”

A yeke sö ande “ala so ayeke mä mo”

“Mo sara hange lakue na aye so abâ mo nga na fango ye ti mo. Mo ngbâ gï dä, ndali ti so na sarango tongaso mo yeke sö ande mo wani nga na ala so ayeke mä mo.”​—1 TIM. 4:16.

BIA 67 Gue mo “fa tënë ni”

AYE SO E YEKE BÂ NI *

1. Nyen la e kue e ye ndali ti afami ti e?

MBENI ita-wali, so iri ti lo ayeke Pauline, atene: “Ti londo na ngoi so mbi komanse ti manda tâ tënë ti ga na ni, mbi ye ti tene mbi na afami ti mbi kue e duti na yâ ti Paradis. * Mbi ye mbilimbili ti tene koli ti mbi Wayne na kete molenge ti e ti koli asara na Jéhovah legeoko na mbi.” Mo yeke na afami so ade ti sara na Jéhovah ape? Âmanke mo yeke na mara pensé so Pauline ayeke na ni na ndö ti afami ti lo.

2. Ahundango ndo wa la e yeke bâ na yâ ti article so?

2 E lingbi pëpe ti gbu afami ti e na ngangu ti yeda na nzoni tënë, me e lingbi ti mû maboko na ala ti dengi mê ti mä tënë ti Bible mingi ahon ti kozo (2 Tim. 3:14, 15). Ngbanga ti nyen la a lingbi e fa tënë na afami ti e? Ngbanga ti nyen la e doit ti gi ti comprendre ala? Aye wa la e lingbi ti sara ti mû maboko na afami ti e ti ye Jéhovah tongana ti so e ye lo? Tongana nyen la aita kue ti congrégation alingbi ti mû maboko na e?

NGBANGA TI NYEN LA A LINGBI E FA TËNË NA AFAMI TI E?

3. Ti gue oko na 2 Pierre 3:9, ngbanga ti nyen la a lingbi e fa tënë na afami ti e?

3 Fafadeso, Jéhovah ayeke futi aye ti ngoi so. Gï azo so ayeke “nduru ti yeda na tënë ni ti wara fini ti lakue lakue” la ayeke sö ande kuâ (Kus. 13:48). E yeke mû ngoi nga na ngangu ti e mingi ti fa tënë na azo so e hinga ala ape na ndo so e yeke dä, tongaso a yeke na lege ni so e ye nga ti tene afami ti e asara na Jéhovah  legeoko na e. Jéhovah, Babâ ti e ti ndoye, ‘aye si a futi zo oko pëpe, me lo ye si azo kue achangé bê ti ala.’​—Diko 2 Pierre 3:9.

4. Faute wa la e lingbi ti sara na ngoi so e yeke fa tënë na afami ti e?

4 A lingbi e girisa ape so nzoni lege ti fa na azo tënë ti salut ayeke dä nga sioni lege ni ayeke dä. Atâa so e lingbi ti sara ye na nzoni bê na ngoi so e yeke fa tënë na mbeni zo so e hinga lo ape, na ngoi so e yeke fa tënë na afami ti e, e lingbi ti sara tënë na mbeni lege so ason bê ti ala.

5. Kozo ti tene e gi ti sara lisoro na afami ti e na ndö ti tâ tënë, nyen la a lingbi e girisa ni ape?

5 E mingi tongana e pensé na ndö ti kozo fason so e fa na tënë na afami ti e lani, e yeke regretté, na e bâ so e doit fade ti sara ni na mbeni fason nde. Bazengele Paul awa aChrétien, lo tene: “Zia lakue tënë ti yanga ti ala aduti nzoni, ala zia ingo dä, si ala hinga tongana nyen la a lingbi ala kiri tënë na zo oko oko.” (aCol. 4:5, 6). A yeke nzoni e girisa ape wango so na ngoi so e yeke sara lisoro na afami ti e. Tongaso ape, e lingbi ti son bê ti ala ahon ti sara si ala mä e.

AYE WA LA E LINGBI TI SARA TI MÛ MABOKO NA AFAMI TI E?

Tongana mo gi ti comprendre zo nga mo yeke na nzoni sarango ye ayeke duti kota témoignage (Bâ paragraphe 6-8) *

6-7. Mû mbeni tapande ti fa ndani so a yeke kota ye ti tene aChrétien agi ti comprendre koli wala wali ti ala so ayeke Témoin ape.

6 Gi ti comprendre ala. Pauline, so e sara tënë ti lo fade, atene: “Na tongo nda ni, mbi ye gï ti sara lisoro na koli ti mbi na ndö ti Nzapa nga na Bible. E sara lisoro lâ oko ape na ndö ti aye ti lâ oko oko.” Ye oko, Wayne, koli ti Pauline, ahinga ye gï kete na ndö ti Bible na lo mä yâ ti atënë ti Pauline ape. Ti Wayne, lo bâ so lakue Pauline aye gï ti sara tënë na ndö ti bungbi ti vorongo Nzapa ti lo. Lo gi bê ti lo ndali ti so lo bâ lo tene wali ti lo alï na yâ ti mbeni sioni secte awe, na azo so ayeke na yâ ni ahanda lo.

 7 Pauline ayeda so, teti mbeni ngoi, lo mû ngoi mingi na alakui nga na anda-yenga ti duti na terê ti aita ti lo ti bungbi; lo yeke na ala na abungbi, na fango tënë nga na angoi so lo gue ti bâ ala na da ti ala. Pauline atene: “Na ambeni ngoi tongana Wayne akiri na yanga-da, zo oko ayeke dä ape, na lo bâ so lo yeke gï lo oko.” Biani, Wayne aye lani ti tene wali ti lo nga na molenge ti lo aduti na terê ti lo. Wayne ahinga pëpe azo so wali ti lo nga na molenge ti lo ayeke na terê ti ala, nga lo bâ lo tene wali ti lo aye afini kamarade ti lo mingi ahon lo. Ye so asara si Wayne atene na Pauline so lo ye ti sara divorce na lo. Mo bâ ambeni lege so Pauline alingbi lani ti gi ti comprendre koli ti lo mingi?

8. Ti gue oko na 1 Pierre 3:1, 2, nyen la alingbi ti pika bê ti afami ti e mingi?

8 Zia nzoni tapande. Fani mingi, ye so e sara ayeke pika bê ti afami ti e mingi ahon tënë so e tene. (Diko 1 Pierre 3:1, 2.) Na nda ni, Pauline aga ti bâ so tënë so ayeke tâ tënë. Lo tene: “Mbi hinga so Wayne aye e na lo ye biani ti sara divorce na mbi ape. Me tënë so lo tene na ndö ti sarango divorce na mbi asara si mbi bâ so a lingbi mbi sara ye alingbi na ye so Jéhovah atene na ndö ti mariage. Ahon ti tene mbi sara tënë mingi, a lingbi mbi zia mbeni nzoni tapande na lege ti sarango ye ti mbi.” Pauline azia ti forcé Wayne ti sara lisoro na ndö ti Bible, na lo komanse ti sara lisoro na lo na ndö ti aye ti lâ oko oko. Wayne abâ tongana nyen la wali ti lo aga zo so aye siriri mingi, nga lo bâ tongana nyen la sarango ye ti molenge ti ala aga nzoni ahon ti kozo (aProv. 31:18, 27, 28). Tongana Wayne abâ so aye so Bible afa aga na aye ti nzoni na sewa ti lo, lo komanse ti dengi mê ti mä tënë ti Bible mingi ahon ti kozo.—1 aCor. 7:12-14, 16.

9. Ngbanga ti nyen la a lingbi e ngbâ ti gi ti mû maboko na afami ti e?

 9 Ngbâ ti gi ti mû maboko na afami ti mo. Jéhovah azia nzoni tapande na e. “Fani mingi,” lo mû lege na azo ti yeda na nzoni tënë na ti wara fini (Jér. 44:4). Nga bazengele Paul atene na Timothée ti ngbâ ti mû maboko na azo. Ngbanga ti nyen? Ngbanga ti so tongana lo sara ni, lo yeke sö lo wani nga na azo so amä lo (1 Tim. 4:16). E ye afami ti e, tongaso e ye ti mû maboko na ala ti hinga atâ tënë so ayeke na yâ ti Bible. A si na mbeni ngoi, atënë nga na sarango ye ti Pauline aga na aye ti nzoni na sewa ti lo. Laso, lo yeke na ngia ti sara na Jéhovah legeoko na koli ti lo. Ala use kue ayeke apionnier, nga Wayne ayeke ancien.

10. Ngbanga ti nyen la a lingbi e kanga bê?

10 Kanga bê. Tongana e sara ye alingbi na aye so Nzapa ahunda na e, a lingbi ti duti ngangu na afami ti e ti yeda na achangement so e sara. Fani mingi, kozo ye so ala bâ ayeke so e na ala e sara encore ape amatanga ti abungbi ti nzapa nga e mû mbage encore ape na yâ ti aye ti poroso. Na tongo nda ni, ambeni fami ti e alingbi ti sara ngonzo na terê ti e (Mat. 10:35, 36). Me a lingbi e pensé ape so ala lingbi ande ti changé lâ oko ape. Tongana e zia lege ti gi ti mû maboko na ala ti mä yâ ti aye so e mä na bê na ni, a yeke mo bâ mo tene e fâ ngbanga na ndö ti ala e tene ala lingbi pëpe ti wara fini ti lakue lakue. Jéhovah azia e ajuge ape, lo mû kua so na Jésus (Jean 5:22). Tongana e kanga bê, mbeni lâ afami ti e alingbi ti yeda ti mä tënë so e yeke fa.—Bâ encadré “ Sara kua na site ti e ti fa ye.”

11-13. Nyen la mo manda na lege ti fason so Alice asara ye na babâ na mama ti lo?

11 Luti na ndö ti desizion ti mo me sara ye na nzoni bê (aProv. 15:2). Bâ tapande ti Alice. Lo manda ye na ndö ti Jéhovah na ngoi so lo yeke lani yongoro na babâ na mama ti lo, so amä na bê na Nzapa ape nga so ayeke sara aye ti poroso mingi. Lo ga ti bâ so a lingbi lo sara tënë ti anzoni ye so lo yeke manda so na ala hio. Alice atene: “Tongana mo ku ngbii si mo sara tënë ti afini ye so mo mä na bê na ni nga na achangement so mo sara na afami ti mo, a yeke son ala mingi.” Lo tokua alettre na babâ na mama ti lo, lo hunda ala ti hinga bango ndo ti ala na ndö ti afango ye ti Bible na ndö ti ambeni ye so lo bâ so alingbi ti nzere na ala, na tapande ndoye (1 aCor. 13:1-13). Lo kiri singila na babâ na mama ti lo ndali ti so ala bata lo nga ala bâ lege ti lo, nga lo tokua na ala acadeau. Na angoi so lo ga ti bâ babâ na mama ti lo, lo sara ye kue so lo lingbi ti sara ti mû maboko na mama ti lo na akua ti da. Na ngoi so Alice asara tënë ti aye so lo mä na bê na ni na babâ na mama ti lo, na tongo nda ni, a nzere na ala ape.

12 Na ngoi so Alice ayeke na ndo ti babâ na mama ti lo, lo ngbâ ti bata kapa ti lo ti dikongo Bible. Alice atene: “Ye so amû maboko na mama ti mbi ti hinga so Bible ayeke kota mingi na lê ti mbi.” Na oko ngoi ni, babâ ti Alice amû desizion ti gi ti hinga ye na ndö ti Bible ti mû lege na lo ti hinga ye so asara si molenge ti lo achangé. Lo ye nga ti gi ambeni ye so ayeke na lege ni ape na yâ ti Bible. Alice atene: “Mbi mû na lo Bible nga mbi sû mbeni note na lo na yâ ni.” Nyen la asi na pekoni? Babâ ti Alice awara pëpe mbeni ye so ayeke na lege ni ape na yâ ti Bible. Me ye so lo diko na yâ ti Bible andu bê ti lo mingi.

13 A lingbi e ngbâ na ndö ti desizion ti e me zia e sara ye na nzoni bê même tongana e doit ti gbu ngangu na yâ ti atara (1 aCor. 4:12b). Na tapande, Alice adoit lani ti gbu ngangu na gbele kangango lege ti mama ti lo. Alice atene: “Na ngoi so mbi wara batême, Mama atene mbi yeke ‘sioni molenge.’” Alice asara ye lani tongana nyen? Lo tene: “Ahon ti tene mbi kpe kpale ni, na nengo zo, mbi fa na mama ti mbi so mbi mû desizion ti ga Témoin ti Jéhovah na  mbi yeke changé desizion ni ape. Mbi gi ti sara si mama ti mbi ahinga so mbi ye lo biani. Mbi na lo kue e toto, na mbi to na lo mbeni pendere kobe. Ti londo na ngoi ni so ti ga na ni, mama ti mbi akomanse ti yeda so Bible asara si mbi ga nzoni zo mingi.”

14. Ngbanga ti nyen la a lingbi e zia lâ oko ape si afami ti e apusu e ti changé desizion so e mû ti sara na Jéhovah?

14 Peut-être ngoi ayeke hon mingi kozo ti tene afami ti e ahinga biani so a yeke kota ye na lê ti e ti sara na Jéhovah. Na tapande, na ngoi so Alice amû desizion ti sara kua ti pionnier ahon ti sara kua so babâ na mama ti lo asoro ndali ti lo, mama ti lo akiri atoto. Me Alice angbâ na ndö ti desizion ti lo. Alice atene: “Tongana mo zia si afami ti mo apusu mo ti changé desizion ti mo na ndö ti mbeni ye, peut-être ala yeke pusu mo ti changé adesizion ti mo na ndö ti ambeni ye nde. Ye oko, tongana mo ngbâ na ndö ti desizion ti mo me mo sara ye na nzoni bê na afami ti mo, peut-être ambeni ayeke mä mo.” A yeke ye so asi na Alice. Babâ na mama ti lo ayeke fadeso apionnier, nga babâ ti lo ayeke ancien.

AITA KUE TI CONGRÉGATION ALINGBI TI MÛ MABOKO TONGANA NYEN?

Aita ti congrégation alingbi ti mû maboko na afami ti e so ayeke aTémoin ape tongana nyen? (Bâ paragraphe 15-16) *

15. Ti gue oko na Matthieu 5:14-16 nga na 1 Pierre 2:12, tongana nyen la “apendere kusala” ti ambeni zo alingbi ti mû maboko na afami ti e?

15 Jéhovah ayeke gboto azo na mbage ti lo na lege ti “apendere kusala” ti congrégation ti aChrétien. (Diko Matthieu 5:14-16; 1 Pierre 2:12.) Tongana wali wala koli ti mo ayeke Témoin ti Jéhovah ape, eskê lo wara terê na aita ti congrégation ti mo awe? Pauline, so a sara tënë ti lo fade, atisa aita na yanga-da ti lo tongaso si koli ti lo, Wayne, alingbi ti hinga ala. Wayne adabe ti lo na fason so mbeni ita-koli  amû maboko na lo ti hinga aTémoin ti Jéhovah nzoni. Lo tene: “Ita-koli ni so amû congé lango oko gï ti tene mbi na lo e bâ ballon na télé. Na mbi bâ so lo yeke tongana tanga ti azo kue.”

16. Ngbanga ti nyen la a lingbi e tisa afami ti e ti ga na abungbi?

16 Mbeni nzoni lege ti mû maboko na afami ti e ayeke ti tisa ala ti tene e na ala e gue na abungbi (1 aCor. 14:24, 25). Kozo bungbi so Wayne ague dä ayeke Dango bê na kuâ ti Christ ndali ti so asara ni lani na peko ti kua nga kapa ni aninga lani ape. Lo tene: “Mbi mä lani yâ ti diskur ni kue ape, me mbi dabe ti mbi na azo so ayeke lani dä. Ala ga na mbage ti mbi ala yamba mbi nga ala bara mbi ala yengere maboko ti mbi. Mbi hinga so ala sara ni na bê ti ala kue.” Mbeni couple asara lani ye na nzoni bê mingi na Pauline, ala mû maboko na lo ti bâ lege ti molenge ti lo ti koli na ngoi ti abungbi nga na fango tënë. Tongaso, na ngoi so Wayne amû desizion so lo ye ti hinga ye mingi na ndö ti afini ye so Pauline amä na bê na ni, lo hunda na ita-koli ni ti manda Bible na lo.

17. Nyen la a lingbi e bi tënë na li ti e ndali ni ape? Ngbanga ti nyen la a lingbi e pensé lâ oko ape so afami ti e ayeke changé ape?

17 E yeke na beku so mbeni lâ e na afami ti e kue e yeke sara na Jéhovah. Ye oko, atâa angangu kue so e sara ti mû maboko na afami ti e ti ga awakua ti Nzapa, peut-être ala yeke ga na yâ ti tâ tënë ape. Tongana a si tongaso, a lingbi e bi tënë na li ti e pëpe ndali ti desizion ti ala. E lingbi pëpe ti gbu azo na ngangu ti yeda na aye so e mä na bê na ni. Atâa so kue, tongana afami ti mo abâ so mo yeke na ngia mingi ndali ti so mo yeke sara na Jéhovah, a lingbi ti sara ye mingi na ndö ti ala. Sambela ndali ti ala. Sara tënë na ala na nzoni bê. Zia pëpe ti gi ti mû maboko na ala (Kus. 20:20). Duti na confiance so Jéhovah ayeke iri tënë nzoni na ndö ti angangu so mo sara. Tongana afami ti mo asoro ti mä mo, a yeke sö ala ande.

BIA 57 Fa tënë na mara ti azo nde nde kue

^ par. 5 E ye ti tene afami ti e ahinga Jéhovah, me a yeke na ala ti mû desizion ti sara na lo wala ti sara na lo ape. Article so ayeke fa na e aye so e lingbi ti sara ti tene a duti ngangu na afami ti e ape ti mä e.

^ par. 1 A changé ambeni iri ni. Na yâ ti article so, tënë “afami” aye ti sara tënë ti afami ti e so ade ti sara na Jéhovah ape.

^ par. 53 NDA TI AFOTO: Mbeni maseka-koli ayeke mû maboko na babâ ti lo so ayeke Témoin ape ti leke oto ti lo. Na mbeni nzoni ngoi, lo fa na babâ ti lo mbeni vidéo na ndö ti jw.org®.

^ par. 55 NDA TI AFOTO: Mbeni ita-wali adengi mê nzoni ayeke mä koli ti lo so ayeke Témoin ape so ayeke sara tënë na lo na ndö ti gbâ ti aye so lo sara na yâ ti lango ni. Na pekoni, lo na sewa ti lo ayeke sara ngia.

^ par. 57 NDA TI AFOTO: Ita-wali ni atisa ambeni ita ti congrégation na da ti lo. Ala yeke gi ti hinga koli ti lo ni. Na mbeni ngoi, koli ni aga na Dango bê na kuâ ti Christ na wali ti lo.