“Jéhovah, . . . gunda ti tënë ti mo ayeke tâ tënë.”​—PS. 119:159, 160.

ABIA: 29, 53

1, 2. (a) Kua wa la Jésus azia ni kozo na yâ ti fini ti lo? Ngbanga ti nyen? (b) Nyen la a lingbi e sara ti duti anzoni zo so “e na Nzapa e sara kua oko”?

JÉSUS CHRIST ayeke lani charpentier nga wafango tënë (Marc 6:3; aRom. 15:8). Lo sara lani akua so use kue nzoni mingi. So lo yeke charpentier, lo manda lani ti sara kua nzoni na agbakuru ti sarango na kua ni si lo leke anzoni ye na keke. So lo yeke lani wafango nzoni tënë, lo sara kua nzoni na aye mingi so lo hinga na yâ ti Mbeti ti Nzapa ti mû maboko na asenge zo ti mä yâ ti atâ tënë so ayeke na yâ ti Mbeti ti Nzapa (Mat. 7:28; Luc 24:32, 45). Na ngoi so Jésus ayeke na ngu 30, lo dö kua ti charpentier lo zia lo ga wafango tënë ndali ti so lo hinga so kua ti fango tënë ayeke kota kua so lo lingbi ti sara. Lo tene so mbeni raison so Nzapa atokua lo na sese ayeke ti fa nzoni tënë ti Royaume ti Nzapa (Mat. 20:28; Luc 3:23; 4:43). Jésus azia kua ti fango tënë kozo na yâ ti fini ti lo, na lo ye lani ti tene ambeni zo asara tongaso.—Mat. 9:35-38.

2 Peut-être e yeke acharpentier ape, me kite ayeke dä ape so e yeke awafango nzoni tënë. Kua so ayeke tâ kota mingi ni la Nzapa kue ayeke sara ni; Bible atene so e yeke azo so “e na Nzapa e sara kua oko.” (1 aCor. 3:9; 2 aCor. 6:4). E hinga so “gunda ti tënë ti [Jéhovah] ayeke tâ tënë”. (Ps. 119:159, 160). Ndani la e ye ti sara kue ti ‘hinga ti sara kusala na lege ni na tënë so ayeke tâ tënë’ na fango tënë. (Diko 2 Timothée 2:15.) Ti sara ni e yeke ngbâ ti sara ngangu ti sara kua nzoni na Bible, so ayeke kozo gbakuru so e yeke sara kua na ni ti fa  na azo tâ tënë na ndö ti Jéhovah, na ndö ti Jésus nga na ndö ti Royaume. Ti mû maboko na e ti sara kua ti fango tënë nzoni, bungbi ti Jéhovah amû na e ambeni nzoni gbakuru so a lingbi e hinga tongana nyen ti sara kua na ni nzoni. Agbakuru so ayeke aye so e yeke fa na ye na azo.

3. Na yâ ti tanga ti ngoi so angbâ na e ti fa tënë so, nyen la a lingbi e zia li ti e na ndö ni? Kusala 13:48 amû maboko na e tongana nyen ti sara ni?

3 Peut-être mo hunda terê ti mo ngbanga ti nyen la a iri ni agbakuru ti fango na ye me pëpe agbakuru ti fango na tënë. Ti “fa tënë” aye ti tene ti to mbela na ndö ti mbeni tënë, me ti “fa ye” aye ti tene ti fa nda ti tënë ni ti ndu bê ti zo so ayeke mä mo, tongaso si lo sara ye alingbi na ye so lo manda. Na yâ ti tanga ti ngoi so angbâ na e ti fa tënë so, ye so a lingbi e zia li ti e na ndö ni ayeke ti komanse ti manda Bible na azo nga ti fa tâ tënë na ala. Ye so aye ti tene e sara kue ti gi azo so ayeke “nduru ti yeda na tënë ni ti wara fini ti lakue lakue” na ti mû maboko na ala ti ga azo so amä na bê.—Diko Kusala 13:44-48.

4. Tongana nyen la e lingbi ti wara azo so ayeke “nduru ti yeda na tënë ni ti wara fini ti lakue lakue”?

4 Tongana nyen la e lingbi ti wara azo so ayeke “nduru ti yeda na tënë ni ti wara fini ti lakue lakue”? Tongana ti akozo Chrétien, oko lege ti wara ala ayeke ti fa tënë. Tongaso, a lingbi e sara ye alingbi tâ gï na tënë ti Jésus so: “Na yâ ti mbeni gbata wala kete kodro so ala lï dä, ala gi na yâ ni zo so alingbi.” (Mat. 10:11). E yeke ku pëpe ti tene azo so aye ti sara ye na lege ni ape, azo so ayeke azo ti baba nga na azo so tënë ti Nzapa agbu bê ti ala ape ayeda na nzoni tënë so e fa. Me e yeke gi azo so aye ti sara ye na lege ni, azo so asara terê ti ala kete nga azo so aye biani ti hinga tâ tënë. E lingbi ti haka gingo azo so na aye so peut-être Jésus asara lani na ngoi so lo yeke charpentier. Kozoni a lingbi lo gi mbeni nzoni keke si lo lingbi ti leke na mbeni ye ti da, mbeni porte, mbeni joug wala mbeni ye nde. Na pekoni, lo lingbi ti mû agbakuru ti kua ti lo, lo sara kua na kode ti lo na lo leke na ye so lo ye ti leke. Na ngoi so e yeke sara ngangu ti sara adisciple, a lingbi e gi azo so aye ti sara ye na lege ni.—Mat. 28:19, 20.

5. Nyen la a lingbi e hinga na ndö ti agbakuru so e yeke fa na ye na azo? Mû mbeni tapande ti fa ni. (Bâ foto so ayeke na tongo nda ti article so.)

5 Tongana ti agbakuru ti kua kue, gbakuru oko oko ayeke na mbilimbili kua ti lo. Na tapande, gbu li na ndö ti agbakuru so Jésus asara kua na ni lani na ngoi ti kua ti lo ti charpentier. * Lo bezoin lani gbakuru ti mesurengo na keke nga na ti ziango marque na terê ni, ti fango yâ ni, ti korongo dû na terê ni nga ti lekengo na forme ni. Lo bezoin nga lani mbeni gbakuru ti kpakango na keke ni nga na ti tingbingo na akeke so lo fâ yâ ni. Legeoko nga, gbakuru oko oko kue so e yeke fa na ye ayeke na mbilimbili kua ti lo. Zia e bâ tongana nyen la e lingbi ti sara kua na anzoni gbakuru ti e so.

AGBAKURU SO AFA YE NA AZO NA NDÖ TI E

6, 7. (a) Tongana nyen la mo sara kua na acarte ti jw.org? (b) Ngbanga ti nyen la e yeke sara kua na ambeti ti tisango ndo?

6 Acarte ti jw.org. Acarte so ayeke kete me ayeke anzoni ye so afa ye na azo na ndö ti e nga afa na ala ti gue na ndö ti site ti e. Tongana ala gue dä, ala yeke manda aye mingi na ndö ti e nga ala lingbi même ti hunda ti tene amanda Bible na ala. Azo ahon 400 000 ahunda na lege ti jw.org ti tene a manda Bible na ala nga azo ngbangbo mingi ayeke hunda ni lâ oko oko. Peut-être mo lingbi ti mû acarte ni na terê ti mo tongaso si mo lingbi ti fa na tënë na azo so mo yeke tingbi na ala na ngoi so mo yeke sara akua ti mo ti lâ na lâ.

7 Ambeti ti tisango ndo. Na ndö ti mbeti ti tisango azo na abungbi ti e, a tene: “E tisa mo  ti manda Bible na aTémoin ti Jéhovah.” Na pekoni, a kiri a tene so mo lingbi ti sara ni na gango na “abungbi ti e” wala na lege so “mbeni zo amanda Bible na mo.” Tongaso, mbeti ti tisango ndo ni afa tënë na ndö ti e na azo nga atisa azo so “ahinga so ala yeke na bezoin ti aye ti yingo” ti manda Bible (Mat. 5:3). Biani, a tisa azo ti ga na abungbi ti e atâa ala yeda ti manda Bible wala ala yeda ape. Tongana ala ga, ala yeke bâ so ala lingbi ti manda aye mingi na yâ ti Bible.

8. Ngbanga ti nyen la a yeke kota ye ti tene azo aga na abungbi ti e kamême fani oko? Fa mbeni tapande ni.

8 A yeke kota ye ti tene e ngbâ ti tisa azo ti ga kamême fani oko na abungbi ti e. Ngbanga ti nyen? Tongana ala ga, ala yeke bâ so aTémoin ti Jéhovah ayeke fa tâ tënë so ayeke na yâ ti Bible nga ala yeke mû maboko na azo ti hinga Nzapa, me abungbi ti vorongo nzapa ti wataka asara ni ape (És. 65:13). Na tapande, na États-Unis mbeni koli na wali ti lo so asara mariage, so iri ti ala ayeke Ray na Linda, abâ kangbi so teti angu mingi. Ala mä na bê na Nzapa na ala ye ti hinga lo nzoni mingi. Tongaso, ala mû desizion ti gue na a-eglize kue na yâ ti gbata ti ala na ti gi ti bâ aye use na mbage ti eglize ni kozo awe si ala ga amembre ti eglize ni. Kozoni, a lingbi ala manda mbeni ye na ngoi ti bungbi ti eglize ni nga use ni a lingbi amembre ti eglize ni ayü bongo tongana azo so atene ala yeke sara na Nzapa. A mû angu mingi ndali ti so a-eglize ni ayeke gbani. Me vundu asara ala mingi. Ala manda ye oko ape, nga amembre ti a-eglize ni ayü bongo so ane zo oko ape. Na peko ti so ala hunzi na ndangba eglize so ayeke na yâ ti liste so ala sara, Linda ague na kua, na Ray akiri na yanga-da. Na ngoi so Ray ayeke kiri, lo hon na devant ti mbeni Da ti Royaume. Lo gbu li ti lo, lo tene: ‘Zia mbi lï kâ mbi bâ ye so ayeke passé kâ.’ Ye so asi na lo kâ ayeke pendere mingi ahon aye kue so asi na lo kozo. Azo kue na Da ti Royaume ni asara ye na zo na nzoni bê nga ala yü bongo nzoni mingi. Ray aduti na devant nga aye so lo manda anzere na lo mingi. Ye so adabe ti e na tënë so bazengele Paul atene na ndö ti mbeni zo so aga ti kozoni na mbeni bungbi na so zo ni atene: “Nzapa ayeke biani na popo ti ala.” (1 aCor. 14:23-25). Na peko ti ye so, lakue na dimanche Ray ayeke ga na bungbi. Na pekoni lo komanse ti ga na bungbi ti milieu ti yenga. Linda nga kue akomanse ti ga na abungbi, nga atâa so ala yeke na ngu 70 tongaso, ala yeda ti manda Bible nga ala wara batême.

AGBAKURU TI KOMANSE NA LISORO

9, 10. (a) Ngbanga ti nyen la a yeke ngangu ape ti sara kua na atract? (b) Fa tongana nyen ti sara kua na tract Royaume ti Nzapa ayeke nyen?

9 Atract. E yeke na atract miombe so ayeke ngangu ape ti sara kua na ni, nga ti komanse lisoro na ni aga na aye ti nzoni mingi. Ngbene ye na ngoi so a komanse ti sigi na ni na ngu 2013, a-imprimé ni milliard oku tongaso. Nzoni ti agbakuru so ayeke so tongana mo hinga ti sara kua na mbeni oko, mo lingbi ti sara kua na atanga ni ndali ti so fason so a sara na ni kue ayeke oko. Tongana nyen la mo lingbi ti sara kua na mbeni tract ti komanse lisoro na mbeni zo?

10 Mo lingbi ti soro ti sara kua na tract Royaume ti Nzapa ayeke nyen? Fa na zo ni hundango tënë so ayeke na ndö ti tract ni na hunda zo ni: “Royaume ti Nzapa ayeke nyen? Ti mo a yeke. . . ?” Na pekoni, hunda lo na popo ti akiringo tënë ota so ti so wa la lo yeke soro. Sân ti tene na zo ni so kiringo tënë ti lo ayeke na lege ni wala ayeke na lege ni ape, zi yâ ti tract ni na mbage so atene “Ye so Bible atene” na diko aversê so a fa ni, Daniel 2:44 nga na Ésaïe 9:6. Tongana lege ayeke dä ngbâ ti sara lisoro ni. Ti hunzi na ni, hunda tënë so ayeke na peko ti mbeti ni na gbe ti li ti tënë “Bâ tënë so”: “Azo ayeke duti ande tongana nyen na gbe ti Royaume ti Nzapa?” Mo lingbi ti kiri tënë na ni na lisoro ti peko. Tongana mo kiri mo wara zo ni, mo lingbi ti sara kua na ye ti manda 7 ti brochure Nzoni tënë so alondo na  Nzapa! so ayeke mbeni gbakuru so e yeke komanse ti manda na Bible na azo.

AGBAKURU SO ASARA SI ATËNË TI BIBLE AGBU BÊ TI ZO

11. A sigi na apériodique ti e ti tene e sara nyen na ni? Nyen la a lingbi e hinga na ndö ti apériodique ti e?

11 Apériodique. Tour ti Ba Ndo na Zingo na lango! la ayeke ambeti-sango so a sigi na ni mingi nga a kiri peko ni na ayanga ti akodro mingi ahon atanga ni kue na yâ ti dunia. Ndali ti so azo ti akodro nde nde ayeke diko apériodique so, a leke akota mama-tene ni ti tene agbu bê ti azo na ndo kue. A lingbi e sara kua na ambeti so ti mû maboko na azo ti zia lê ti ala gï na ndö ti aye so ayeke kota mingi na yâ ti fini ti zo laso. Me kozoni, a lingbi e hinga azo so a sara périodique ni oko oko ndali ti ala.

12. (a) A sigi na Zingo na lango! ndali ti azo wa? Kota raison so a sigi na ni ndali ni ayeke so wa? (b) Anzoni ye wa la mo wara ade ti ninga ape na sarango kua na gbakuru so?

12 A sigi na Zingo na lango! ndali ti azo so ahinga ye mingi ape wala ye oko ape na yâ ti Bible. Peut-être ala hinga ye oko ape na ndö ti afango ye ti aChrétien, peut-être ala yeke na confiance ape na abungbi ti nzapa wala peut-être ala hinga ape so Bible alingbi ti mû maboko na ala na yâ ti fini ti ala. Mbeni kota raison so a sigi na Zingo na lango! ndali ni ayeke ti sara si zo so adiko ni ahinga so Nzapa ayeke dä (aRom. 1:20; aHéb. 11:6). A mû nga maboko na zo so adiko ni ti duti na mabe so Bible ‘ayeke biani tënë ti Nzapa’. (1 aThes. 2:13). Li ti tënë ti anuméro ota ti Zingo na lango! ti ngu 2018 ayeke: “Lege ti duti na ngia,” “Aye 12 so ayeke sara si sewa aduti na ngia” nga na “Aye so apeut ti aidé azo so ayeke na vundu.”

13. (a) A sigi na Tour ti Ba Ndo ti kangbingo ni ndali ti azo wa? (b) Anzoni ye wa la mo wara ade ti ninga ape na sarango kua na gbakuru so?

13 Kota raison so a sigi na Tour ti Ba Ndo ti kangbingo ni ndali ni ayeke ti fa aye so Bible afa na azo so ane kamême Nzapa nga na Bible kete. Atâa so ala hinga peut-être ambeni ye na yâ ti Bible, ala mä yâ ti aye so Bible afa nzoni ape (aRom. 10:2; 1 Tim. 2:3, 4). Li ti tënë ti anuméro ota ti Tour ti Ba Ndo ti ngu 2018 ayeke: “Eskê Bible aga ngbene ye awe?,” “Kekereke ti e ayeke duti ande tongana nyen?” nga “Eskê Nzapa ayeke pensé nga na mo la?

AGBAKURU SO APUSU ZO TI SARA YE

14. (a) A sigi na avidéo osio so ayeke na yâ ti agbakuru so e yeke fa na ye na azo ngbanga ti nyen? (b) Anzoni ye wa la mo wara na fango avidéo so na azo?

14 Avidéo: Na ngoi ti Jésus, mbeni charpentier ayeke sara kua lani gï na agbakuru so a sara na kua na maboko. Me laso, acharpentier ayeke nga na ambeni gbakuru so asara kua na courant, na tapande ascie, aye ti korongo na dû nga na aye ti kpakango na keke. Laso, na ndö ti so e yeke na ambeti, e yeke na apendere vidéo ti fa na azo na ngoi so e yeke fa tënë. Na popo ti avidéo so, a zia avidéo osio so na popo ti agbakuru so e yeke fa na ye na azo: Ndani nyen ti manda Bible?, E yeke manda Bible na azo tongana nyen? E yeke sara abungbi ti e tongana nyen? nga A-Témoin ti Jéhovah: ala yeke azo wa? Avidéo so asi penze-ngbonga use ape sarango kua na ni na ngoi ti kozo tingbingo terê aga na anzoni ye. E lingbi ti sara kua na avidéo so ayo ahon penze-ngbonga use na ngoi so e yeke sara avizite nga tongana e wara azo so ayeke na ngoi. Apendere vidéo so alingbi ti pusu azo ti manda Bible nga ti ga na abungbi.

15. Tongana azo abâ mbeni vidéo ti e na yanga ti kodro ti ala alingbi ti sara nyen na ndö ti ala? Fa ambeni tapande ni.

15 Na tapande, mbeni ita-wali atingbi na mbeni wali so alondo na Micronésie so yanga ti kodro ti lo ayeke Yap. Ita-wali ni afa na lo vidéo Ndani nyen ti manda Bible? na yanga ti Yap. Tongana vidéo ni akomanse, wali ni atene: “Yanga ti kodro ti mbi la. Vrai ye la? Sarango tënë ti lo asara si mbi hinga so lo yeke zo ti zoa ti mbi. Lo tene yanga ti kodro ti mbi.” Na pekoni, lo tene so lo yeke gue ti diko nga ti bâ  aye kue so ayeke na yanga ti kodro ti lo na ndö ti site jw.org. (Bâ Kusala 2:8, 11.) Mbeni tapande ni ayeke ti mbeni ita-wali so ayeke na États-Unis so molenge ti ita ti lo alango na Amérique ape. Lo tokua na lo lien ti site jw.org so ague na ndö ti même vidéo ni na yanga ti kodro ti lo. Lo bâ vidéo ni nga lo tokua e-mail na ita-wali ni, lo tene: “Mbage ni so asara tënë ti mbeni sioni zo so ayeke na ngangu so akomande dunia andu mbi mingi. Mbi sû mbeti mbi hunda ti tene a ga a manda Bible na mbi.” A nzere na e mingi ndali ti so lo yeke na mbeni kodro so a kanga lege na kua ti e dä.

AGBAKURU TI FANGO NA TÂ TËNË

16. Fa mbilimbili raison so a sigi na brochure oko oko so: (a) Mä Nzapa si mo wara fini ti lakue lakue. (b) Nzoni tënë so alondo na Nzapa! (c) Azo wa la ayeke sara laso ye so Jéhovah aye?

16 Abrochure. Tongana nyen la mo lingbi ti fa tâ tënë na mbeni zo so adiko mbeti nzoni ape wala so ambeti ti e ayeke na yanga ti kodro ti lo ape? E lingbi ti sara kua na brochure Mä Nzapa si mo wara fini ti lakue lakue. * Brochure Nzoni tënë so alondo na Nzapa! ayeke mbeni nzoni gbakuru ti komanse ti manda na Bible na azo. Mo lingbi ti fa na mbeni zo aye ti manda 14 so ayeke na peko ti brochure ni na hunda lo ti fa na mo so wa la agbu bê ti lo mingi. Na pekoni, komanse étude ni na ye ti manda so. Mo sara kua na kode so awe na ngoi so mo sara avizite na azo? Mbeni ota brochure so ayeke na popo ti agbakuru ti e ti fango na ye ayeke Azo wa la ayeke sara laso ye so Jéhovah aye? A sigi na brochure so ti fa aye na ndö ti bungbi ti Jéhovah na azo so e yeke manda Bible na ala. Ti hinga tongana nyen ti sara kua na ni na ngoi ti étude oko oko, bâ Mbeti ti bungbi: Kusala ti e nga na gigi ti e ti Chrétien ti mars 2017.

17. (a) Mbilimbili raison so a sigi na buku oko oko so e yeke manda na Bible na azo ayeke nyen? (b) A lingbi azo kue so awara batême asara nyen? Ngbanga ti nyen?

17 Abuku. Na peko ti so mo komanse ti manda Bible na mbeni zo na lege ti mbeni brochure, mo lingbi ti changé na mbeni ngoi ti mû buku Bible alingbi ti fa nyen na e? Gbakuru so alingbi ti mû maboko na azo ti hinga akozo fango ye ti Bible mingi. Tongana zo ni ague na li ni nga lo hunzi buku ni, mo lingbi ti ngbâ ti manda Bible na lo na yâ ti buku “Zia ala ngbâ na yâ ti ndoye ti Nzapa”. * Gbakuru so ayeke fa na lo tongana nyen ti sara kua na amama-ndia ti Bible na yâ ti fini ti lo lâ oko oko. Girisa ape so même na peko ti batême ti mbeni zo, lo bezoin ti ngbâ ti manda Bible juska lo hunzi abuku use so. Ye so ayeke mû maboko na lo ti duti na mbeni kpengba mabe na Jéhovah na ti ngbâ be-ta-zo na lo.—Diko aColossien 2:6, 7.

18. (a) So e yeke fa tâ tënë na azo, nyen la 1 Timothée 4:16 awa e ti sara? Tongana e sara ni, nyen la ayeke ga na pekoni? (b) Na ngoi so e yeke sara kua na agbakuru ti e ti fango na ye na azo, nyen la e yeke gi?

18 A mû na e aTémoin ti Jéhovah kua ti fango na azo “tâ tënë ti nzoni tënë” so alingbi ti gue na ala na fini ti lakue lakue. (aCol. 1:5; diko 1 Timothée 4:16.) Ti mû maboko na e ti sara ni, e yeke na agbakuru ti fango na aye na azo so e yeke na bezoin ni. (Bâ encadré “ Agbakuru so e yeke fa na ye na azo.”) Zia e sara kua na ni nzoni. Zo oko oko alingbi ti soro agbakuru so lo ye ti sara kua na ni nga na ngoi so lo yeke sara kua na ni. Me girisa ape so ye so e yeke gi ayeke pëpe gï ti kangbi ambeti, nga azo so tënë so e fa agbu bê ti ala ape e yeke mû ambeti ti e na ala ape. Ye so e yeke gi ayeke ti sara si azo so aye ti sara ye na lege ni, so ayeke sara terê ti ala kete nga so ayeke na nzara ti aye ti yingo aga adisciple, so ti tene azo so ayeke “nduru ti yeda na tënë [so e fa] ti wara fini ti lakue lakue”.—Kus. 13:48; Mat. 28:19, 20.

^ par. 5 Bâ article “Le charpentier” nga na encadré “La boîte à outils du charpentier” na yâ ti Tour ti Ba Ndo ti lango 1 ti août 2010, na Français.

^ par. 16 Tongana zo ni ahinga ti diko mbeti ape, mo lingbi ti fa ye na lo na lege ti brochure Mä Nzapa, so afoto ayeke na yâ ni mingi.

^ par. 17 Tongana a sigi na buku Lege ti ngbâ na yâ ti ndoye ti Nzapa ande awe, a lingbi a sara kua na ni na place ti buku “Zia ala ngbâ na yâ ti ndoye ti Nzapa”.