Nyen la asara si disciple Étienne agi lani bê ti lo ape na ngoi so a yeke sara ye ti ngangu na lo?

ÉTIENNE ayeke lani na devant ti groupe ti ambeni koli so ngonzo asara ala na terê ti lo mingi. So ala yeke amembre ti kota da-ngbanga na Israël, so ti tene Sanhédrin, ajuge 71 so ayeke lani na popo ti akoli so ayeke na kota komandema na yâ ti kodro ni. Kota Prêtre Caïphe la abungbi lani ala, lo la lo mû li ni lani na ndö ti da-ngbanga ni asara ambeni nze awe na ngoi so a fâ ngbanga ti kuâ na li ti Jésus (Mat. 26:57, 59; Kus. 6:8-12). Na ngoi so ala yeke ga na azo so abi tënë ti mvene na li ti Étienne na peko ti terê na da-ngbanga ni, ala bâ mbeni ye so ahon gbungo li ti ala na ndö ti Étienne: lê ti lo “akpa lê ti mbeni ange.”—Kus. 6:13-15.

Nyen la asara si Étienne agi bê ti lo ape nga lo duti na siriri na yâ ti ye so amû mbeto na zo so? Kozo ti tene azo agbu Étienne na ngangu ague na lo na devant ti Sanhédrin, lo mû lani terê ti lo kue ti sara kua so lo yeke sara ndali ti azo na gbe ti ngangu yingo ti Nzapa (Kus. 6:3-7). Na ngoi so lo yeke na devant ti da-ngbanga, oko yingo so ayeke sara kua na ndö ti lo tongana zo ti dengo bê ti zo nga tongana zo ti dango bê ti zo na mbeni ye (Jean 14:16, kete tënë na gbe ni). Na ngoi so na da-ngbanga ni na mbeto ape Étienne ayeke fa lani tënë ti lo, so a sû ni na Kusala chapitre 7, yingo vulu asara si lo dabe ti lo na aversê 20 tongaso so ayeke na yâ ti Mbeti ti Nzapa so a sû ândö na Hébreu (Jean 14:26). Me mabe ti Étienne akiri akpengba na ngoi so, na yâ ti mbeni vision, lo bâ Jésus ayeke luti na terê ti Nzapa na mbage ti koli.—Kus. 7:54-56, 59, 60.

Peut-être mbeni lâ, a yeke tene na e atënë ti ziango mbeto na yâ ti zo wala a yeke sara ye ti ngangu na e (Jean 15:20). Tongana e diko Bible lakue nga e ngbâ ti fa tënë, e yeke zia lege na yingo ti Jéhovah ti sara kua na ndö ti e. E yeke wara nga ngangu ti luti na ngoi so a gi ti kanga lege na e nga na oko ngoi ni e yeke ngbâ ti duti na siriri ti bê.—1 Pi. 4:12-14.