“MBI NGBÂ LAKUE TI HUNDA TERÊ TI MBI: NZAPA AYEKE NA NDO WA?”​—So ayeke tënë ti Pape Benoît XVI, na temps so lo gue na mbeni place so a fâ lani azo dä mingi na Auschwitz, na kodro ti Pologne.

TONGANA AKOTA KPALE ASI, ESKÊ ASI NA MO AWE TI HUNDA TERÊ TI MO: ‘NZAPA AYEKE NA NDO WA’? WALA TONGANA YE TI NGANGU ASI NA MO, ESKÊ ASI NA MO TI HUNDA WALA NZAPA AYEKE PENSÉ NA MO LA?

Eskê pensé ti mo ayeke tongana ti Sheila, so akono na yâ ti mbeni sewa so azo ni aye Nzapa mingi? Lo tene: “Depuis kete ti mbi, mbi ye Nzapa teti so Lo la lo sara e. Me lâ oko mbi sentir terê ti mbi nduru na lo ape. Mbi hinga so lo yeke bâ mbi, me gï yongoro kâ. Mbi hinga nga so lo ke mbi ape, me mbi bâ so lo pensé na mbi ape.” Sheila ayeke na kite ni so ndali ti nyen? Lo tene: “Sewa ti mbi awara lani akpale na peko ti terê, nga na bango ni Nzapa a-aidé e kete na yâ ni ape.”

Tongana ti Sheila, peut être mo kue mo yeke sûr so Nzapa ayeke dä. Me, mo peut ti hunda wala eskê lo yeke pensé biani na mo? Job, so ayeke lani mbeni zo ti mbilimbili, ayeke nga lani na mara ti kite so atâa so lo mä na bê so Nzapa so acréé e ayeke na ngangu nga na ndara (Job 2:3; 9:4). Na peko ti so lo wara aye ti ngangu na peko ti terê, Job ahunda Nzapa lo tene: “Ngbanga ti nyen mo honde lê ti mo na mo bâ mbi tongana wato ti mo?”—Job 13:24.

Bible atene ti lo nyen? Tongana kpale asi, eskê e doit ti bi tënë ni na li ti Nzapa? Nyen la afa biani so Nzapa ayeke pensé na azo? Nyen la afa nga so lo yeke pensé na zo oko oko kue? Eskê mbeni zo apeut ti hinga so Nzapa ayeke bâ lo, lo yeke comprendre lo, lo hinga apasi ti lo nga lo yeke aidé lo na yâ ti akpale?

Na yâ ti ambage so aga na peko, e yeke bâ tongana nyen la fason so Nzapa acréé na zo afa biani so lo yeke pensé na e (aRomain 1:20). E yeke bâ nga tongana nyen la Bible afa so Nzapa ayeke pensé na e. Tongana ‘mo hinga Nzapa’ nzoni na lege ti aye so lo créé nga na lege ti Bible, a yeke mû lege na mo encore ti hinga biani so ‘lo yeke bi bê ti lo na ndö ti mo.’—1 Jean 2:3; 1 Pierre 5:7.