Tongana mo ye ti hinga mbeni zo, kozoni kue mo yeke hunda peut-être zo ni mo tene: “Iri ti mo ayeke nyen?” Ka tongana ayeke Nzapa la mo hunda lo tongaso, lo yeke tene nyen na mo?

Mbi yeke Jéhovah. So ayeke iri ti mbi la.”​Ésaïe 42:8.

Eskê hingango ti mo iri ni so la? Peut-être hingango ni la ndali ti so mingi ti azo so asû peko ti Bible asara kua na iri ni so mingi ape. Mingi ni ala zi ni na ala zia “SEIGNEUR” na place ni. Me iri ti Nzapa asigi fani 7 000 na yâ ti vrai Bible ni so a sû ândö. A sû iri ni so na agere-mbeti osio ti yanga ti Hébreu so alingbi na alettre YHWH wala JHVH na so a di ni “Jéhovah” na yanga ti Sango.

Iri ti Nzapa ayeke na yâ ti Mbeti ti Nzapa so a sû ândö na Hébreu nga ayeke na yâ ti atraduction ti Bible mingi

Rouleau ti Psaume ti Mer Morte Ngoi ti akozo Chrétien, na yanga ti HÉBREU

Bible ti Tyndale 1530, na yanga ti ANGLAIS

Bible ti Reina-Valera 1602, na yanga ti ESPAGNOL

Union Version 1919, na yanga ti CHINOIS

NGBANGA TI NYEN LA A YEKE KOTA YE TI HINGA IRI TI NZAPA?

Iri ti Nzapa ayeke kota ye mingi na lê ti lo. Nzapa wani la azia iri ni so na ndö ti lo. Jéhovah atene: “So ayeke iri ti mbi la, a yeke ngbâ lakue lakue, azo ti angoi nde nde kue ayeke hinga mbi na iri so.” (Exode 3:15). Na yâ ti Bible, iri ti Nzapa asigi fani mingi ahon tanga ti ambeni iri so a mû na lo, na tapande a-iri tongana Lo so ngangu ti lo ahon angangu kue, Babâ, Seigneur wala Nzapa. Nga iri ti Jéhovah asigi mingi na yâ ti Bible ahon ambeni iri tongana Abraham, Moïse, David wala Jésus. Na mbage, Jéhovah aye si azo ahinga iri ti lo. Bible atene: “Zia si azo ahinga so, mo so iri ti mo ayeke Jéhovah, Mo oko la mo yeke Lo so ayeke na nduzu na ndö ti aye kue, na ndö ti sese kue.”​—Psaume 83:18.

Iri ti Nzapa ayeke kota ye na lê ti Jésus. Na yâ ti sambela so azo airi ni Babâ ti e so ayeke na yayu, Jésus afa na adisciple ti lo ti sambela Nzapa ala tene: “Zia a sara si iri ti mo aga nzoni-kue.” (Matthieu 6:9). Jésus wani asambela Nzapa atene: “Babâ, mû gloire na iri ti mo.” (Jean 12:28). Ti mû gloire na iri ti Nzapa ayeke ye so Jésus azia na kozo ndo na yâ ti fini ti lo, nga a yeke ndali ni la lo sambela lo tene: “Mbi sara si ala hinga iri ti mo, na mbi yeke sara si a hinga ni.”​—Jean 17:26.

 Iri ti Nzapa ayeke kota ye na lê ti azo so ahinga Lo. Ândö, azo ti Nzapa ahinga so a yeke ndali ti iri ti lo la lo bata ala nga lo sö ala. “Iri ti Jéhovah ayeke mbeni ngangu tour. Zo ti mbilimbili akpe lo lï na yâ ni, na a bata lo.” (aProverbe 18:10). “A yeke sö ande zo kue so adi iri ti Jéhovah.” (Joël 2:32). Bible afa so a yeke hinga azo so avoro Nzapa na lege ti iri ti lo so ayeke na ndö ti ala. “Amara oko oko kue ayeke tambela na iri ti anzapa ti ala, me ti e, e yeke tambela ande na iri ti Jéhovah Nzapa ti e lakue lakue nga kpu na kpu.”​—Michée 4:5; Kusala 15:14.

IRI TI NZAPA AFA NYEN NA NDÖ TI LO?

Iri ni so alingbi gï na Nzapa oko. Awandara mingi atene so nda ti iri ti Jéhovah aye ti tene “Lo so asara si ye aga mbeni ye wala ye abâ gigi.” Jéhovah afa polele nda ti iri ti lo na ngoi so lo sara tënë na ndö ti lo wani na Moïse lo tene: “Fade mbi ga ye so mbi ye ti ga.” (Exode 3:14). Iri ti Nzapa afa so lo la lo sara aye kue, me afa nga na e aye mingi encore na ndö ti lo. Iri ti lo afa ngangu so lo yeke na ni ti ga ye so lo ye ti ga nga ti sara kua na aye so lo créé ti tene aga ye kue so lo ye, tongaso si lo sara ye so bê ti lo aye. Atâa so ambeni iri so a zia na ndö ti lo afa kota ndo ti lo, komandema so lo yeke na ni wala ngangu ti lo, gï iri ti lo Jéhovah oko la afa aye kue na ndö ti lo nga ye so lo peut ti ga ni.

Iri ti Nzapa afa so lo yeke pensé na e. Nda ti iri ti Nzapa aye ti fa so lo ye aye so lo créé na lo ye e azo nga kue. Na ndö ni, so Nzapa afa iri ti lo afa so lo ye si e hinga lo. Lo fa iri ti lo na e kozo si e hunda ni na lo. A yeke polele so Nzapa aye ti tene e bâ lo pëpe tongana mbeni zo ti yingo so ayo mingi na e, me lo ye si e bâ lo tongana vrai Zo na lê ti e, so e peut ti ga nduru na lo.​—Psaume 73:28.

Ti di iri ti Nzapa afa so e pensé na lo. Zia e mû mbeni tapande. Bâ so mo hunda na mbeni zo so mo ye ti tene lo ga kamarade ti mo ti iri mo na iri ti mo. A yeke sara mo tongana nyen tongana zo ni aye lakue ti iri mo na iri ti mo ape? Tongana ngoi ayeke hon, peut-être mo yeke komanse ti hunda terê ti mo wala lo ye biani ti ga kamarade ti mo. Ti Jéhovah nga ayeke tongaso. Lo fa iri ti lo na e, na lo ye si e iri lo na iri ni so. Tongana e iri lo na iri ti lo, e yeke fa biani so e ye ti ga kamarade ti lo. A yeke nda ni la lo hinga “ala so ayeke gbu li na ndö ti iri ti lo [“wala ala so abâ na nene ni,” kete tënë na gbe ni]”.​—Malachie 3:16.

Tongana e ye ti hinga Nzapa nzoni, kozo ye so e doit ti sara ayeke ti hinga iri ti lo. Me e doit ti ngbâ gï ge ape. A yeke nzoni e hinga wa ti iri ni so, so ti tene ti hinga asarango ye ti terê ti lo.

IRI TI NZAPA AYEKE NYEN? Iri ti Nzapa ayeke Jéhovah. Iri ni so afa Nzapa tongana Zo so apeut ti sara si aye so lo leke ti sara asi biani