Gue na tënë ti yâ ni

Gue na li ti atënë ni

Tongana nyen la mo peut ti wara mbeni nzoni gigi?

Tongana nyen la mo peut ti wara mbeni nzoni gigi?

LASO, lege so e yeke vivre na ni ayeke tongana ti so Nzapa aye lani ape. A doit fade ti wara na ndö ti sese, azo so aye si Nzapa la aduti Gbia ti ala, so azia si lo la lo fa lege na ala, nga so asara ye na ndoye tongana lo. Nzapa aye lani si ala duti na ngia tongana ala yeke bâ lege ti sewa ti ala, tongana ala yeke manda afini ye, nga tongana ala yeke leke sese kue si aga paradis.

NZAPA AMÛ ZENDO TI TENE GIGI AKIRI ADUTI TONGANA TI SO LO YE LANI

  • “Lo yeke sara si abira ahunzi na ndö ti sese kue.”​—Psaume 46:9.

  • “Ngoi so a fa . . . alingbi awe, . . . ti futi azo so ayeke futi sese.”​—Apocalypse 11:18.

  • “Zo ti kodro ni ayeke tene ande pëpe: ‘Terê ti mbi ason.’”​—Ésaïe 33:24.

  • “Azo so mbi soro ala ayeke wara ngia na yâ ti kua so ala sara na maboko ti ala.”​—Ésaïe 65:22.

Tongana nyen la aprophétie so ayeke ga ande tâ tënë? Nzapa azia Jésus tongana Gbia ti mbeni gouvernement so ayeke na yayu, na so ayeke komande ande na ndö ti sese. Bible airi gouvernement ni so Royaume ti Nzapa (Daniel 2:44). Bible atene na ndö ti Jésus atene: “Nzapa ayeke mû ande na lo trône . . . Lo yeke komande tongana Gbia.”​—Luc 1:32, 33.

Na temps so Jésus ayeke lani na sese, lo sara gbâ ti amiracle ti fa so tongana lo ga Gbia, lo yeke sara ande si fini ti azo aduti nzoni ahon ti laso.

JÉSUS AFA AYE TI NZONI SO LO YEKE SARA ANDE NA AZO SO AMÄ YANGA

  • Lo sava lani amara ti kobela nde nde nga na ambage ti terê nde nde kue so abuba ti fa so aye ni so ayeke duti ande dä ape.​—Matthieu 9:35.

  • Lo sara lani si kota ngu aduti kpô ti fa tongana nyen la lo yeke bata ande azo si aye tongana pupu, kota ngu so apika asara sioni na zo ape.​—Marc 4:36-39.

  • Lo mû kobe lani na azo saki mingi ti fa so lo yeke mû ande na azo aye so ala bezoin ni.​—Marc 6:41-44.

  • Lo sara lani si ngu aga vin na temps ti mbeni matanga ti mariage, ye so afa so lo yeke sara ande si gigi anzere na azo.​—Jean 2:7-11.

Tongana nyen la mo peut ti wara mara ti fini so Nzapa aye ti mû na azo so andoye lo so? Mbeni ye ayeke dä so mo doit ti sara. Bible atene so mo doit ti wara “lege so ague na fini . . . [so] azo mingi pëpe [si] ayeke wara ni.”​—Matthieu 7:14.

MÛ LEGE SO AGUE NA MBENI NZONI GIGI

Lege ti fini ayeke nyen? Nzapa atene: “Mbi Jéhovah, mbi yeke Nzapa ti mo. Mbi la mbi yeke fa ye na mo ti tene mo bâ nzoni dä. Mbi la mbi yeke fa na mo lege so a yeke nzoni mo mû ni.” (Ésaïe 48:17). Tongana mo mä wango so na mo sara ye alingbi na ni gigi ti mo ayeke ga ande tâ nzoni mingi.

 Jésus atene: “Mbi yeke lege ni, tâ tënë na fini.” (Jean 14:6). Tongana e sara ye so Jésus afa nga e mû tapande ti lo, e yeke ga nduru na Jéhovah na fini ti e ayeke ga nzoni.

Tongana nyen la mo lingbi ti mû lege so ayeke gue na fini? Abungbi ti nzapa ayeke mingi, me Jésus atene: “A yeke pëpe zo kue so atene na mbi, ‘Seigneur, Seigneur,’ si ayeke lï ande na yâ ti Royaume ti yayu. Me gï zo so asara ye so bê ti Babâ ti mbi so ayeke na yayu aye si ayeke lï ande dä.” (Matthieu 7:21). Lo tene nga lo tene: “Ala yeke hinga [ala] na lege ti alengo ti ala.” (Matthieu 7:16). Bible apeut ti aidé mo ti hinga bungbi wa la ayeke tâ bungbi ti Nzapa.​—Jean 17:17.

Tongana nyen la mo peut ti komanse ti tambela na ndö ti lege so? A lingbi mo manda ti hinga Nzapa, lo so amû fini na azo kue. Na tapande: Lo yeke zo wa? Iri ti lo ayeke nyen? Asarango ye ti terê ti lo ayeke so wa? Nyen la lo ngbâ ti sara ndali ti e? Nyen la lo ye ti tene e sara? *

Nzapa aye si azo asara gï kua, ate ye, asara ngia, nga abata gï sewa ti ala awe ape. E peut ti hinga Nzapa nzoni nga ti ga kamarade ti lo. E peut ti fa so e ye lo na lege so e sara ye so bê ti lo aye. Jésus atene: “Ti wara fini ti lakue lakue, a lingbi ala gi ti hinga mo, mo oko tâ Nzapa.”​—Jean 17:3.

NA LEGE TI BIBLE, NZAPA AYEKE FA YE NA MO TI TENE “MO BÂ NZONI DÄ.”​​ÉSAÏE 48:17

KOZO YE TI SARA TI KOMANSE TAMBELA NI

Tongana e hinga ye so Nzapa aye ti tene e sara, peut-être ambeni achangement ayeke dä so e doit ti sara ni. A peut ti duti ngangu. Me ti vrai ni, gigi ti e ayeke ga nzoni tongana e komanse ti tambela na ndö ti lege so ague na fini. Ti aidé mo ti wara akiringo tënë na ahundango tënë na ndö ti Nzapa, aTémoin ti Jéhovah ayeke duti ande na ngia ti manda Bible senge senge na mo na place nga na l’heure ti bê ti mo. Mo peut ti wara e tongana mo gue na ndö ti site www.jw.org.