Gue na tënë ti yâ ni

Gue na li ti atënë ni

Ngbanga ti nyen la e yeke ga mbakoro nga e yeke kui?

Ngbanga ti nyen la e yeke ga mbakoro nga e yeke kui?

NZAPA aleke lani azo ti tene ala kui ape. A créé akozo babâ na mama ti e, Adam na Ève, na sioni oko na terê ti ala ape; terê ti ala nga na apensé ti ala ayeke mbilimbili-kue. Ala peut fade ti ngbâ na fini juska laso. A yeke duti tongaso ndali ti tënë so Jéhovah atene na Adam na ndö ti mbeni keke so ayeke lani na yâ ti yaka ti Éden.

Nzapa atene lani na Adam atene: “Na lango so mo te [lê ti keke ni], ti tâ tënë ni mo yeke kui.” (Genèse 2:17). Tongana fade Nzapa acréé Adam ti ga mbakoro nga ti kui, lo yeke mû fade na lo commandement so ape. Adam ahinga lani so tongana lo te lê ti keke so ape, lo yeke kui ape.

NZAPA ALEKE LANI TI TENE AZO AKUI APE

Adam na Ève abezoin pëpe ti te lê ti keke so si ala ngbâ na fini, ndali ti so gbâ ti alê ti keke ayeke lani na yâ ti yaka ni (Genèse 2:9). Tongana ala te lani lê ti keke so ape, ala yeke fa so ala mä yanga ti Zo so acréé ala. Ala yeke fa nga so gï Nzapa la ayeke na droit ti fa na ala ye so ala doit ti sara.

NGBANGA TI NYEN LA ADAM NA ÈVE AKUI?

Ti hinga ye so asara si ala kui, zia e kiri na ndö ti mbeni lisoro so apassé lani si aye ti peko ni andu e kue laso so. Satan Zabolo asara kua na mbeni ngbo ti tene atënë ti handa. Bible atene: “Na popo ti anyama kue ti ngonda so Jéhovah Nzapa asara, ngbo la asara ye na hange ahon atanga ni kue. Tongaso, lo tene na wali ni: ‘Tâ tënë, Nzapa atene ala te lê ti akeke kue ti yaka so ape?’”​—Genèse 3:1.

Ève akiri tënë na lo atene: “E lingbi ti te lê ti akeke ti yaka ni. Me ti lê ti keke so ayeke na milieu ti yaka ni, Nzapa atene na e, atene: ‘Ala te ni pëpe, ala ndu nga ni pëpe ngbanga ti ala kui.’” Ngbo ni angbâ atene na lo atene: “Ti tâ tënë ni, ala yeke kui pëpe. Nzapa ahinga so gï na lango so ala yeke te ni, lê ti ala ayeke zi, na ala yeke ga tongana Nzapa, ala yeke hinga ye ti nzoni na ye ti sioni.” Na lege ti atënë so Satan afa so Jéhovah ayeke zo ti mvene, nga so lo gbanzi nzoni ye na Adam na Ève.​—Genèse 3:2-5.

Ève ayeda na atënë so lo mä so. Lo bâ keke ni ngbii, lo bâ so lê ni ayeke pendere mingi. Lo yôro maboko ti lo, lo ko ni na lo komanse ti te ni. Bible atene: “Na pekoni, lo mû mbeni nga na koli ti lo na ngoi so koli ni aga na terê ti lo, na koli ni ate ni.”​—Genèse 3:6.

Nzapa atene lani na Adam atene: “Na lango so mo te ni, ti tâ tënë ni mo yeke kui.”​​GENÈSE 2:17

A doit ti sara Jéhovah vundu mingi ti bâ tongana nyen la amolenge ti lo, so lo ye ala mingi so, ake yanga ti lo na bê ti ala wani. Nyen la lo sara lani? Jéhovah atene na Adam atene: “Mo yeke . . . kiri na sese, teti a sara mo na sese. Mo yeke fuku ti sese, na mo yeke kiri ande na fuku ti sese.” (Genèse 3:17-19). Ndani la, “ngu ti Adam kue ayeke ngu 930, na lo kui.” (Genèse 5:5). Adam ague lani na yayu ape, wala lo gue na ndo ti ayingo ape. Kozo si Jéhovah acréé lani lo na fuku ti sese, lo yeke lani na fini ape. Na temps so lo kui, fini ti lo ahunzi na lo ga fuku ti sese. So ye ti mawa!

 NGBANGA TI NYEN LA E YEKE MBILIMBILI-KUE APE?

So Adam na Ève ake yanga ti Nzapa na mbana, ala yeke mbilimbili-kue encore ape nga ala perdre beku ti ala ti ngbâ na fini teti lakue lakue. Ala bâ so aye akomanse ti changé na terê ti ala; ala ga awasiokpari. Me gï ala oko la awara ye ti peko ti kengo yanga ni ape, amolenge kue so ala dü ayeke awasiokpari. A-Romain 5:12 atene: “Na lege ti zo oko siokpari alï na yâ ti dunia so, na lege ti siokpari kuâ aga, tongaso kuâ amû azo kue ngbanga ti so ala kue asara fade siokpari.”

Bible asara tënë ti siokpari tongana “tissu ti marakani so aroulé terê ti azo ti amara kue nga na bongo so a kpo ni kpongo so ayeke na ndö ti azo ti amara kue.” (Ésaïe 25:7). Tissu ti marakani so aroulé azo ti dunia kue ayeke tongana mbeni sioni guru so zo apeut ti kpe ni ape. Biani, ‘na yâ ti Adam azo kue ayeke kui.’ (1 aCorinthien 15:22). Hundango tënë so alondo ayeke mara ni la bazengele Paul ahunda lani atene: “Zo wa la ayeke sö mbi ande na yâ ti terê so ayeke gue na mbi ti wara kuâ so?” Mbeni zo apeut?​—aRomain 7:24.