SO TÂ PENDERE GIGI TI KEKEREKE! Zo so acréé e amû zendo so lo yeke mû na e fini ti lakue lakue, ge na ndö ti sese. Me, a yeke ngangu na gbâ ti azo ti mä na bê na tënë so. Ala tene: ‘A ye wala a ye ape zo ayeke kui. Kuâ ayeke mbeni mbage ti gigi ti zo.’ Ambeni apensé so zo apeut ti duti na fini ti lakue lakue, me na ndö ti sese ge ape. Ala tene so fini ti lakue lakue ayeke mbeni ye so zo ayeke wara ni gï na peko ti so lo kui na lo gue na yayu. Ka mo, mo tene ti mo nyen?

Kozo si mo kiri tënë na hunda so, e wa mo ti bâ kiringo tënë ti Bible na ahundango tënë ota so: Tongana nyen la fason so a créé na zo afa so lo peut ti ngbâ na fini aninga? Ye so Nzapa aleke lani na bê ti lo ti sara ndali ti sese nga na azo ayeke nyen? Ngbanga ti nyen la azo ayeke kui?

ZO AYEKE NDE MINGI

Na popo ti aye so kue Nzapa acréé na ndö ti sese, zo la ayeke tâ nde mingi. Nyen la afa ni? Bible afa so gï azo la Nzapa acréé ala na “image ti lo” na ala “kpa” lo (Genèse 1:26, 27). Tënë so aye ti tene nyen? A ye ti tene so gï azo la ayeke na asarango ye ti terê ti Nzapa, na tapande ndoye nga na sarango ye mbilimbili.

Na ndö ni, a créé azo na ngangu ti gbungo li, ti hinga popo ti ye ti nzoni na sioni nga na nzara ti hinga Nzapa na ti duti na nzoni songo na lo. A yeke ndali ni la e peut ti hinga kota ti dunia nga na pendere ti aye so ayeke na yâ ni, me nga ti aye tongana abia, aye so azo asara na kode nga na apendere tënë so azo asû. Na ndö ti aye so kue, gï azo la apeut ti voro Nzapa. Aye ni so kue afa so azo ayeke tâ nde mingi na tanga ti aye kue so ayeke na fini na ndö ti sese.

Ni la, gbu li na ndö ti hunda so: Tongana fade Nzapa aleke e ti vivre gï teti kete ngoi, eskê lo peut ti mû fade na e mara ti apendere sarango ye tongaso so e peut ti maï ni ti gue na ni so? Tâ tënë ni ayeke so, Nzapa amû na e azo aye ni so ti tene e hinga nzerengo ti gigi ge na sese teti lakue lakue.

YE SO NZAPA ALEKE LANI NA BÊ TI LO TI SARA

Ambeni zo atene so Nzapa aleke ti tene azo angbâ na fini na ndö ti sese lakue lakue ape. Ala tene so e azo e ga gï gene na sese; e ga dä ti tene a tara e ti bâ wala zo wa la alingbi biani ti gue na yayu ti vivre na terê ti Nzapa lakue lakue. Tongana ayeke vrai, andâ ye so apeut ti fa so Nzapa la ayeke na gunda ti asioni ye so ayeke na ndö ti sese. Me Nzapa ayeke sara  ka ye tongaso ape. Bible atene: “Teti asarango ye ti lo kue ayeke mbilimbili. Lo yeke Nzapa so ayeke be-ta-zo, lo sara ye lakue mbilimbili. Lo yeke mbilimbili na lo yeke sara ye na lege ni.”—Deutéronome 32:4.

Bible afa polele ye so Nzapa aleke na bê ti lo ndali ti sese, a tene: “Yayu ayeke ti Jéhovah, me sese, lo mû ni na amolenge ti azo.” (Psaume 115:16). Ni la, Nzapa asara sese ti tene a duti mbeni pendere ndo so azo asara kodro dä teti lakue lakue, na lo sara si sese asi singo na aye so e yeke na bezoin ni ti duti na fini so ayeke tâ fini nga so ayeke hunzi lâ oko ape.—Genèse 2:8, 9.

“Yayu ayeke ti Jéhovah, me sese, lo mû ni na amolenge ti azo.”​—Psaume 115:16

Bible afa nga polele ye so Nzapa aleke na bê ti lo ti sara ndali ti azo. Lo tene lani na kozo koli na wali lo tene: “Ala si ndö ti sese na ala sara si sese ni aga na gbe ti ala . . . na anyama oko oko kue so ayeke na fini si ayeke tambela na ndö ti sese.” (Genèse 1:28). So tâ pasa la ala yeke lani na ni ti bâ lege ti ndo ti ala so ayeke lani paradis nga ti sara si amû ndo kue! Tongaso, ye so Nzapa aleke ndali ti Adam na Ève nga na amolenge ti ala ayeke ti vivre lakue lakue na ndö ti sese, me pëpe ti tene ala gue na yayu.

NGBANGA TI NYEN E YEKE KUI?

Ka ngbanga ti nyen la e yeke kui? Bible atene so mbeni oko ti a-ange so Nzapa aleke, so na pekoni a hinga lo na iri ti Satan Zabolo, agi ti buba yâ ti ye so Nzapa aleke na Éden. Lo sara ni tongana nyen?

Satan ahanda Adam na Ève ti tene ala kue asara kpengbango-li na Nzapa. Na ngoi so Satan atene so Nzapa agbanzi mbeni ye ti nzoni na ala so ti tene droit ti tene ala hinga ye ti nzoni na ye ti sioni, ala yeda ti mû peko ti Satan na ala ke Nzapa. Ye ti pekoni ayeke nyen? Ambeni ngoi na pekoni ala kui, gï tongana ti so Nzapa atene. Ala perdre pasa so ala yeke lani na ni ti duti na fini ti lakue lakue na yâ ti paradis na ndö ti sese.—Genèse 2:17; 3:1-6; 5:5.

Kengo yanga ti Adam na Ève so aga na ye ti sioni na ndö ti azo kue juska laso. Bible atene: “Na lege ti zo oko [Adam] siokpari alï na yâ ti dunia so, na lege ti siokpari kuâ aga, tongaso kuâ amû azo kue.” (aRomain 5:12). E yeke kui ndali ti so e wara siokpari nga na kuâ na lege ti kozo babâ na mama ti e, Adam na Ève, me pëpe ngbanga ti so a yeke ‘plan’ ti Nzapa.

MO LINGBI TI NGBÂ NA FINI LAKUE LAKUE NA NDÖ TI SESE

Kengo yanga so asi lani na yaka ti Éden achangé pëpe ye so Nzapa aleke ti sara ndali ti azo nga na sese. So Nzapa ayeke na tâ ndoye nga lo yeke sara ye mbilimbili asara si lo leke ti zi e na gbe ti siokpari nga na kuâ. Bazengele Paul atene: “Futa ti peko ti siokpari ayeke kuâ, me matabisi so Nzapa amû ayeke fini ti lakue lakue na lege ti Christ Jésus Seigneur ti e.” (aRomain 6:23). Na ndoye, Nzapa “amû gï oko Molenge ti lo [Jésus Christ] si zo kue so amä na bê na lo, a lingbi ti futi lo pëpe, me lo yeke na fini ti lakue lakue.” (Jean 3:16). So Jésus amû fini ti lo na bê ti lo wani, tongana mbeni ye so a futa ti zi e, amû lege na e ti kiri ti wara aye kue so Adam aperdre ni lani. *

Na yâ ti kete ngoi zendo so Nzapa amû ti sara si sese aga paradis ayeke ga ande tâ tënë. Mo peut ti wara pendere gigi ti kekereke so tongana mo sara ye alingbi na tënë ti Jésus so: “Ala lï na kete yanga ti gbagba, ndali ti so lê ti lege so ayeke gue na futingo akono nga yanga ti gbagba ni ayeke kota, na gbâ ti azo si ayeke hon dä; me lê ti lege so ague na fini ayeke kete nga yanga ti gbagba ni ayeke kete mingi, na azo mingi pëpe ayeke wara ni.” (Matthieu 7:13, 14). Biani, gigi ti mo ti kekereke ayeke na maboko ti mo. Nyen la mo yeke sara ande?

^ par. 17 Ti hinga tënë mingi na ndö ti aye ti nzoni so mo lingbi ti wara grâce na sandaga ti kuâ ti Jésus, bâ chapitre 5 ti buku Bible alingbi ti fa nyen na e?, so aTémoin ti Jéhovah asigi na ni. A yeke nga na ndö ti www.jw.org.