Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Mbeti ti Bungbi—Kusala ti e nga na gigi ti e ti Chrétien  |  Juin 2017

 GIGI TI E TI CHRÉTIEN

Sara ye alingbi na andia ti Jéhovah na ndö ti nzoni sarango ye

Sara ye alingbi na andia ti Jéhovah na ndö ti nzoni sarango ye

Jéhovah amû na azo andia na ndö ti nzoni sarango ye. Na tapande, lo fa so mariage ayeke mbeni songo so ayeke ngbâ lakue na popo ti koli na wali (Mt 19:4-6, 9). Lo fâ ngbanga na ndö ti alege nde nde kue ti lango-sioni (1aC 6:9, 10). Lo mû même amama-ndia so andu yungo bongo nga na lekengo terê pendere so afa so azo ti lo ayeke nde.—De 22:5; 1Tm 2:9, 10.

Na yâ ti dunia ti laso, azo mingi ake andia ti Jéhovah (aRm 1:18-32). Ala zia si bango ndo ti azo na ndö ti yungo bongo, lekengo terê nga na sarango ye ti ala asara ngangu na ndö ti ala. Azo mingi ayeke sara kota siokpari vîi vîi na ala kasa ala so sarango ye ti ala ayeke nde.—1Pi 4:3, 4.

E aTémoin ti Jéhovah, a lingbi e sara mbeto ape ti sara ye alingbi na andia ti Nzapa na ndö ti nzoni sarango ye (aRm 12:9). E yeke sara ni tongana nyen? A lingbi e fa na azo na kode aye so lo yeda na ni. Me e nga kue e a lingbi e ngbâ ti sara ye alingbi na andia ti Jéhovah na yâ ti fini ti e. Na tapande, tongana e yeke soro afason ti yungo bongo nga na ti lekengo terê ti e, e lingbi ti hunda terê ti e: ‘Ye so mbi soro so ague oko na amama-ndia ti Bible wala na bango ndo ti dunia so? Eskê yungo bongo nga na lekengo terê ti mbi afa so mbi yeke mbeni Chrétien so akpe mbeto ti Nzapa?’ Wala tongana e yeke soro mbeni ye na télé wala mbeni film ti bâ, e lingbi ti hunda terê ti e: ‘Jéhovah ayeke yeda na ye ni so mbi yeke soro so? Aye ni so ayeke pusu mbi ti duti na asarango ye ti zo wa? Ngia so mbi yeke soro alingbi ti buba yâ ti anzoni sarango ye ti mbi? (Ps 101:3). A lingbi ti kanga lege na azo ti sewa ti mbi wala na ambeni zo?’—1aC 10:31-33.

Ngbanga ti nyen a yeke kota ye mingi ti sara ye alingbi na andia ti Jéhovah? Na yâ ti kete ngoi, Jésus Christ ayeke futi ande amara nga na azo ti sioni kue (Éz 9:4-7). Gï azo so asara ye so bê ti Jéhovah aye la ayeke ngbâ ande (1Jn 2:15-17). Tongaso, zia e ngbâ ti sara ye alingbi na andia ti Jéhovah tongaso si azo so abâ anzoni sarango ye ti e alingbi ti mû gloire na Nzapa.—1Pi 2:11, 12.

Bongo so mbi soro nga na lekengo terê ti mbi afa nyen na ndö ti asarango ye ti mbi?

BÂ VIDÉO GA KAMARADE TI JÉHOVAH: KOLI OKO, WALI OKO, NA PEKONI GBU LI NA NDÖ TI AHUNDANGO TËNË SO GE:

  • Ngbanga ti nyen a yeke nzoni ti sara ye alingbi na andia ti Jéhovah?

  • Ngbanga ti nyen a lingbi ababâ na amama ato nda ti fa na amolenge ti ala andia ti Jéhovah na ngoi so ala de kete?

  • Tongana nyen la amaseka wala akangba alingbi ti mû maboko na azo ti wara ye ti nzoni na lege ti nzoni bê ti Nzapa?