Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Zo-ti-fa-tene 6:1-12

LI TI ATËNË NI

  • Dutingo na ye sân ti tene mo zo mo wara ngia dä (1-6)

  • Duti na ngia na ye so mo yeke na ni fadeso (7-12)

6  Mbeni ye so amû vundu na zo so mbi bâ na gbe ti lâ nga so asi na azo ayeke so:  Tâ Nzapa amû mosoro, akungba nga na gloire na mbeni zo, tongaso zo ni ayeke na aye kue so lo sara nzara ni;* ye oko, tâ Nzapa amû lege na lo ti bâ nzoni dä pëpe, atâa so mbeni wande la alingbi ti bâ nzoni dä. So ayeke senge senge nga ye ti pasi mingi.  Tongana mbeni koli adü fani ngbangbo oko, lo te gigi juska lo ga mbakoro, me lo bâ* nzoni pëpe na lege ti anzoni ye so lo yeke na ni kozo si lo gue na yâ ti dû ti kuâ,* ti tâ tënë ni, molenge so a dü lo na kuâ ni ayeke nzoni ahon lo,+  ndali ti so a yeke gï senge senge la lo sigi na yâ ti mama ti lo, lo hon na yâ ti vukongo ndo, nga iri ti lo angbâ gï na yâ ti vukongo ndo.  Atâa so lo bâ lâ wala lo hinga mbeni ye pëpe, lo yeke nzoni ahon* koli so.+  Tongana zo aduti na fini ngu saki use me lo wara ngia dä pëpe, nzoni ni ayeke so wa? Azo kue ayeke gue na oko ndo ape?+  Angangu kua kue so zo ayeke sara ayeke ti wara ye ti tengo ni,+ me nzara ti kobe ayeke hunzi lâ oko na yâ ti lo pëpe.  Zo ti ndara ahon zo ti buba+ na nyen? Wala tongana wayere ahinga tongana nyen ti sö kuâ,* nzoni ni ayeke so wa?  A yeke nzoni ti bâ nzoni na lege ti aye so lê ti mo abâ ahon ti tambela gï tongaso na peko ti aye so mo sara nzara ni.* So kue ayeke senge senge nga ayeke tombango peko ti pupu senge. 10  Ye kue so abâ gigi awe, a zia iri na ndö ni kozo awe, nga a hinga ye nzoni na ndö ti zo; lo lingbi pëpe ti papa* na zo so ayeke ngangu ahon lo. 11  Tongana zo adiko tënë gbani,* asenge senge ye nga ayeke ga gbani. Nzoni ti nyen la zo ayeke wara na pekoni nyen? 12  So gigi ti zo aninga pëpe, a si singo na asenge senge ye nga a yeke hon hio tongana gbe ti dê, zo wa la ahinga tâ nzoni ye so zo alingbi ti sara na yâ ti gigi ti lo?+ Zo wa la alingbi ti fa na zo ye so ayeke si ande na peko ti lo na gbe ti lâ?

Kete tënë

Wala “ye oko amanke âme ti zo ni pëpe.”
Wala “âme ti lo abâ.”
Wala “même dû ti kuâ aga ndo ti lo pëpe.”
Na Hébreu: “lo wu terê ti lo nzoni ahon.”
Na Hébreu: “ti tambela na gbele azo so ayeke na fini.”
Wala “ahon âme so atambela gï tongaso.”
Wala “ti gbu koko ti lo.”
A lingbi nga ti tene “zo ayeke na gbâ ti aye.”