Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Zacharie 8:1-23

LI TI ATËNË NI

  • Jéhovah amû siriri nga na tâ tënë na Sion (1-23)

    • Jérusalem, “gbata ti tâ tënë” (3)

    • “Ala tene tâ tënë na mba” (16)

    • A komanse na mungo jeûne a hunzi na matanga (18, 19)

    • ‘E gue e gi Jéhovah’ (21)

    • Akoli bale-oko agbu yongoro bongo ti mbeni Juif (23)

8  Jéhovah ti aturugu akiri asara tënë na mbi, atene:  “Mbi Jéhovah ti aturugu, mbi tene: ‘Tënë ti Sion ayeke gbu bê ti mbi ande mingi,+ nga, na yâ ti kota ngonzo ti mbi, mbi yeke gbu koko ti lo.’”  “Jéhovah atene: ‘Mbi yeke kiri na mbage ti Sion+ na mbi yeke duti na Jérusalem.+ A yeke iri ande Jérusalem gbata ti tâ tënë*+ nga a yeke iri hoto ti Jéhovah ti aturugu hoto so ayeke nzoni-kue.’”+  “Jéhovah ti aturugu atene: ‘Ambakoro-koli na ambakoro-wali ayeke kiri ti duti na ando ti yâ ti Jérusalem so azo ayeke gue ka dä mingi, zo oko oko ayeke na keke ti lo so lo yeke gbu ti tambela na ni, ndali ti so ngu ti lo ague na li ni mingi.*+  Ando ti yâ ti gbata ni so azo ayeke gue ka dä mingi ayeke si singo na amolenge-koli nga na amolenge-wali so ayeke sara ngia kâ.’”+  “Jéhovah ti aturugu atene: ‘Atâa so, na yâ ti ngoi ni so, a lingbi ti duti mbeni ye so ayeke ngangu mingi na lê ti tanga ti azo so angbâ, a yeke mbeni ye so a yeke ngangu na mbi ti sara?’ Tënë ti yanga ti mbi Jéhovah ti aturugu la.”  “Jéhovah ti aturugu atene: ‘Mbi yeke sigi na azo ti mbi na ando so ayeke na est nga na ouest.*+  Mbi yeke ga na ala na Jérusalem,+ na ala yeke sara kodro dä; ala yeke ga azo ti mbi, na mbi yeke ga Nzapa ti ala,+ Nzapa ti tâ tënë* nga Nzapa so ayeke mbilimbili.’”  “Jéhovah ti aturugu atene: ‘Zia maboko ti ala awara ngangu,*+ ala so ayeke mä fadeso atënë so asigi lani na yanga ti aprophète,+ a-oko tënë so a tene na ngoi so a zia na sese gere ti da ti Jéhovah ti aturugu ti tene a leke temple dä. 10  Kozo na ngoi ni so, a yeke futa ye pëpe na zo wala na nyama ndali ti kua so lo sara.+ Nga zo alingbi pëpe ti hon wala ti kiri na siriri ndali ti awato, ngbanga ti so mbi sara si azo kue ake terê na popo ti ala.’ 11  “Jéhovah ti aturugu atene: ‘Me ti fadeso, mbi yeke sara ye pëpe na tanga ti azo so angbâ tongana ti so mbi sara giriri.+ 12  A yeke lu ngongoa ti siriri; keke ti vigne ayeke lë lengo ni nga alê ti kobe ayeke sigi na yâ ti sese.+ Ngu ti pere ayeke tuku na ndö ti sese. Mbi yeke sara si aye so kue aga ti tanga ti azo so angbâ.+ 13  Ahale ti Juda nga na ti Israël, legeoko tongana ti so ala ga lani mbeni ye so a deba ni awe na lê ti amara,+ legeoko nga mbi yeke sö ala, na ala yeke ga ye so aga na aye ti nzoni na azo.+ Ala sara mbeto pëpe!+ Zia maboko ti ala awara ngangu.’*+ 14  “Jéhovah ti aturugu atene: ‘“Mbi mû lani desizion ti ga na ye ti ngangu na ndö ti ala ndali ti so akotara ti ala ason bê ti mbi, na mbi regretté ni pëpe.” Tënë ti yanga ti Jéhovah ti aturugu la.+ 15  “Legeoko nga, fadeso, mbi mû desizion ti sara nzoni na Jérusalem nga na ahale ti Juda.+ Ala sara mbeto pëpe!”’+ 16  “‘A yeke nzoni ala sara aye so: Ala tene tâ tënë na mba,+ nga ala zia si angbanga so a fâ na ayanga ti gbagba ti agbata ti ala asara si tâ tënë na siriri amaï.+ 17  Ala leke pëpe na bê ti ala ti sara sioni na amba ti ala,+ nga ala ndoye pëpe dengo bä ti mvene,+ ndali ti so mbi ke aye so kue.’+ Tënë ti yanga ti mbi Jéhovah la.” 18  Jéhovah ti aturugu akiri asara tënë na mbi, atene: 19  “Jéhovah ti aturugu atene: ‘Jeûne so ala mû na osio nze ni,+ na oku nze ni,+ na mbasambala nze ni+ nga na nze bale-oko ni+ ayeke ga ande angoi ti nzerengo terê nga na ti ngia ndali ti ahale ti Juda, so ti tene angoi ti matanga so anzere na zo mingi.+ Tongaso, ala ndoye tâ tënë nga na siriri.’ 20  “Jéhovah ti aturugu atene: ‘A yeke si ande so azo nde nde nga na azo ti agbata mingi ayeke ga; 21  azo ti mbeni gbata ayeke gue na ndo ti azo ti mbeni gbata nde na ala tene: “E gue e voro yanga na Jéhovah ti sara nzoni bê na e* nga e gi Jéhovah ti aturugu. E nga kue e yeke gue.”+ 22  Gbâ ti azo ti ando nde nde nga na amara so ayeke ngangu mingi ayeke ga na Jérusalem ti gi Jéhovah ti aturugu+ nga ti voro yanga na Jéhovah ti sara nzoni bê na ala.’ 23  “Jéhovah ti aturugu atene: ‘Na ngoi ni so, azo bale-oko so ayeke ti ayanga ti kodro nde nde kue+ ayeke gbu yongoro bongo* ti mbeni Juif* nzoni, na ala tene: “E ye ti tene e na mo e gue,+ ndali ti so e mä a tene Nzapa ayeke na ala.”’”+

Kete tënë

Wala “gbata so ayeke be-ta-zo.”
Na Hébreu: “ndali ti so lango ti lo ayeke mingi.”
Wala “na ndo so lâ ayeke sigi dä nga na ndo so lâ ayeke linda dä.”
Wala “Nzapa so ayeke be-ta-zo.”
Wala “ala sara mbeto pëpe.”
Wala “Ala sara mbeto pëpe.”
Wala “ti tene bê ti lo adë na terê ti e.”
Wala “yanga ti bongo.”
Na Hébreu: “mbeni koli so ayeke Juif.”