Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Zacharie 7:1-14

LI TI ATËNË NI

  • Jéhovah ake mungo jeûne ti handango lê ti azo (1-14)

    • “Eskê a yeke biani ndali ti mbi la ala mû jeûne ni so?” (5)

    • ‘Fâ ngbanga na lege ni, sara ye na tâ ndoye nga na nzoni bê’ (9)

7  Na yâ ti osio ngu ti komandema ti Gbia Darius, na lango osio ti nze gumbaya ni, so ti tene nze ti Kislev,* Jéhovah asara tënë na Zacharie.+  Azo ti gbata ti Béthel atokua Sharézer, Réguem-Mélek nga na azo ti lo ti tene ala gue avoro yanga na Jéhovah ti sara nzoni bê na ala,*  nga ti hunda aprêtre ti da* ti Jéhovah ti aturugu na aprophète, ala tene: “A yeke nzoni e* toto nga e ke kobe na oku nze,+ tongana ti so e sara na yâ ti angu mingi so?”  Jéhovah ti aturugu akiri asara tënë na mbi, atene:  “Tene na azo kue ti kodro ni nga na aprêtre, mo tene: ‘Na ngoi so ala mû lani jeûne nga ala toto na oku nze nga na mbasambala nze+ na yâ ti ngu 70,+ eskê a yeke biani ndali ti mbi la ala mû jeûne ni so?  Ala te ye nga ala nyon ye gï ndali ti nzoni ti ala wani ape?  Azo asara lani kodro na Jérusalem nga na agbata so angoro ni na ala yeke na siriri, nga azo asara kodro na Négueb nga na Séphélah. Na ngoi ni so, Jéhovah asara tënë na azo ni na lege ti aprophète ti giriri.+ A yeke nzoni ala sara ye alingbi na atënë ni so ape?’”  Jéhovah akiri asara tënë na Zacharie, atene:  “Jéhovah ti aturugu atene: ‘Ala fâ ngbanga tâ na lege ni,+ nga ala sara ye na tâ ndoye+ nga na nzoni bê na popo ti ala. 10  Ala sara ye ti likisi pëpe na awali-mua, na amolenge so babâ ti ala ayeke dä pëpe,*+ na awande+ nga na awayere.+ Ala leke pëpe na bê ti ala ti sara ye ti sioni na amba ti ala.’+ 11  Me ala ngbâ ti sara sanka,+ ala sara ngangu-li, ala tourné peko ala hon+ nga ala kanga mê ti ala si ala mä tënë pëpe.+ 12  Ala sara si bê ti ala akpengba tongana diamant,*+ ala ke ti sara ye alingbi na ndia* nga na atënë ti Jéhovah ti aturugu so yingo ti lo afa ni na aprophète ti giriri+ ti ga ti fa peko ni na ala. Ni la bê ti Jéhovah ti aturugu ason ngangu.”+ 13  Jéhovah ti aturugu atene: “‘Legeoko tongana ti so ala mä mbi* pëpe na ngoi so mbi iri ala lani,+ mbi nga kue mbi mä ala pëpe na ngoi so ala iri mbi.+ 14  Mbi sara si kota pupu ti ngu akangbi yâ ti ala na popo ti amara kue so ala hinga ala pëpe,+ na kodro ni angbâ na bubango ni tongaso na peko ti ala. Zo oko ahon dä pëpe nga zo oko akiri kâ pëpe,+ ndali ti so a sara si ndo so ayeke pendere aga mbeni ye so amû mbeto na zo.’”

Kete tënë

Bâ na B15.
Wala “ala gue ti gi ti dë bê ti Jéhovah.”
Wala “temple.”
Na Hébreu: “mbi.”
Wala “anyindu.”
A lingbi nga ti tene “kpengbango tênë,” tongana tênë ti lekengo na yanga ti aye.
Wala “fango ye.”
Na Hébreu: “lo.”