Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Zacharie 10:1-12

LI TI ATËNË NI

  • Hunda na Jéhovah ti sara si ngu apika, me na anzapa ti wataka ape (1, 2)

  • Jéhovah akiri abungbi azo ti lo (3-12)

    • Kota mokonzi so alondo na mara ti Juda (3, 4)

10  “Ala hunda Jéhovah ti sara si ngu apika na ngoi ti tanga ti ngu-nzapa. Jéhovah la asara ambinda so asara si ngu apika ngangu, lo sara si ngu apika ndali ti azo+ nga lo sara si kobe ti yaka asigi ndali ti azo kue.   Anzapa ti yâ ti sewa* atene mvene;* azo ti bango mbadi abâ aye so ayeke gï mvene. Ala fa peko ti abango li so ayeke gï asenge senge ye, nga ala yeke gi ti dë bê ti azo, me ala sara gbä. Ndani la ala yeke fono kirikiri tongana ataba. Ala yeke bâ pasi, ndali ti so berger ayeke dä pëpe.   Mbi sara ngonzo ngangu na terê ti aberger, nga mbi yeke hunda na amokonzi so asara pasi na azo ni* ti kiri tënë na mbi, ndali ti so Jéhovah ti aturugu abi lê ti lo na ndö ti ataba ti lo,+ ahale ti Juda, na lo sara si ala ga ye ti gloire nga ala kpengba tongana mbarata ti lo na yâ ti bira.   Kota mokonzi* alondo na mara ti Juda, zo ti komande so ayeke mû maboko* alondo na lo, kokora ti sarango na bira alondo na lo nga azo kue ti bango ndo na ndö ti azo ti kua* alondo na lo; ala kue alondo na lo.   Ala yeke ga tongana angangu turugu; na ngoi ti bira, ala yeke dö yâ ti popoto na ndö ti alege. Ala yeke sara bira, ndali ti so Jéhovah ayeke na ala.+ Kamene ayeke gbu awato ti ala so ayeke kpe na ambarata.+   Mbi yeke sara si ahale ti Juda aga kota ahon atanga ti amba ti ala, nga mbi yeke sö ahale ti Joseph.+ Mbi yeke sara si ala kiri aga tongana ti kozo, ndali ti so mbi yeke sara nzoni bê na ala.+ A yeke mo bâ mo tene mbi ke ala lâ oko pëpe,+ ndali ti so mbi Jéhovah mbi yeke Nzapa ti ala, na mbi yeke kiri tënë na ala.   Azo ti Éphraïm ayeke ga tongana mbeni ngangu zo ti bira, nga bê ti ala ayeke duti na ngia tongana ti zo so anyon vin.+ Amolenge ti ala ayeke bâ ni, na terê ti ala anzere; bê ti ala ayeke duti na ngia ndali ti Jéhovah.+   ‘Mbi yeke hûru yanga ti mbi na ala, na mbi yeke bungbi ala kue oko, ndali ti so mbi yeke zi ala,+ na ala yeke ga gbani; ala yeke ngbâ gï ti ga gbani gbani.   Atâa so mbi kangbi yâ ti ala na popo ti azo nde nde tongana ti so zo ayeke tuku yâ ti ngongoa ti kobe, ala yeke dabe ti ala na mbi na ayongoro ndo. Ala na amolenge ti ala ayeke kiri ti wara ngangu nga ala yeke kiri. 10  Mbi yeke sara si ala londo na Égypte akiri, nga mbi yeke bungbi ala so ayeke na Assyrie.+ Mbi yeke sara si ala kiri na sese ti Galaad+ nga na Liban; ndo ayeke lingbi ala kue pëpe.+ 11  Na ngoi so ngu-ingo akanga lege na ala, mbi yeke hon na yâ ni ti sara si amapo ni akaï.+ Mbi yeke sara si Ngu ti Nil so alï ahule. Ye so Assyrie apika kate ti lo dä ayeke tï, nga mbi yeke sara si keke ti gbia ti Égypte ahon.+ 12  Mbi Jéhovah, mbi yeke sara si ala ga ngangu mingi,+ nga sarango ye ti ala ayeke mû nengo na iri ti mbi,’+ tënë ti yanga ti Jéhovah la.”

Kete tënë

Wala “astatue ti téraphim; ayanda.”
Wala “ti sara tënë ti ye ti ndima.”
Na Hébreu: “akoli-ngasa.”
Na Hébreu: “tour so ayeke na coin ti gbagba.” A ye ti fa kota ti zo ni; mokonzi.
Na Hébreu: “pointe.” A ye ti sara tënë ti zo so ayeke mû maboko ti tene mba ti lo atï pëpe; zo ti komande.
Wala “zo so ayeke forcé azo ti sara kua.”