Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ruth 3:1-18

LI TI ATËNË NI

  • Naomi afa ye so Ruth adoit ti sara (1-4)

  • Ruth na Boaz na ndo ti pikango alê ti kobe (5-15)

  • Ruth akiri na terê ti Naomi (16-18)

3  Kogara ti lo Naomi atene na lo: “Molenge ti mbi ti wali, a yeke nzoni mbi gi mbeni ndo* na mo,+ si ye aga nzoni na mo ape?  Boaz ayeke fami ti e ape?+ Lo la mo yeke sara kua na terê ti amaseka-wali so ayeke sara kua na lo so. Na bï so, lo yeke pe lê ti orge ti lo na ndo ti pikango lê ti kobe.  Tongaso mo sukula ngu, mo sara mafuta so afun pendere na terê ti mo, mo yü bongo nzoni* na mo descend na ndo ti pikango lê ti kobe ni. Mo sara si koli ni ahinga pëpe so mo yeke kâ juska lo te ye na lo nyon ye awe si.  Tongana lo lango awe, mo bâ ndo so lo lango dä; mo gue mo zi bongo na ndö ti gere ti lo na mo lango. Lo yeke fa na mo ye so a lingbi mo sara.”  Ruth atene: “Ye kue so mo tene na mbi so, mbi yeke sara ni.”  Tongaso, lo descend na ndo ti pikango lê ti kobe ni na lo sara ye kue so kogara ti lo afa na lo.  Boaz ate ye na lo nyon ye, nga bê ti lo ayeke na ngia. Na pekoni, lo gue lo lango na terê ti gbâ ti alê ti kobe ni. Tongaso, Ruth aga, yeke, lo zi bongo na gere ti Boaz na lo lango.  A si na bê ti bï, koli ni adö na lo zingo; lo yô li ti lo na nduzu na lo bâ so mbeni wali ayeke lango na terê ti gere ti lo.  Lo hunda ndo, lo tene: “Zo wa la?” Wali ni atene: “Mbi wakua ti mo Ruth la. Mo gbara bongo* ti mo na ndö ti wakua ti mo, ndali ti so mo yeke zo so ayeke na droit ti futa ye ti zi zo.”+ 10  Koli ni atene: “Molenge ti mbi ti wali, zia Jéhovah airi tufa na ndö ti mo. Tâ ndoye so mo fa so ayeke nzoni ahon ti so mo fa kozo,+ ndali ti so mo gue na peko ti amaseka-koli pëpe, atâa ala yeke awayere wala azo ti mosoro. 11  Molenge ti mbi ti wali, sara mbeto pëpe. Ye kue so mo tene, mbi yeke sara ni na mo,+ ndali ti so azo kue na yâ ti gbata ni* ahinga so mo yeke nzoni wali mingi. 12  Tâ tënë, mbi yeke zo so ayeke na droit ti futa ye ti zi zo,+ me mbeni fami ayeke dä so popo ti lo na fami ni ayo pëpe; lo la lo yeke na droit ti sara ni kozo na mbi.+ 13  Mo lango ge na bï so, na tongana a si na ndapre si lo ye ti futa ye ti zi mo, so nzoni. Zia lo sara ni.+ Me ti tâ tënë ni, so Jéhovah ayeke na fini, tongana lo ye ti sara ni pëpe, mbi la mbi yeke sara ni. Ngbâ mo lango ge juska na ndapre.” 14  Tongaso, lo ngbâ lo lango na terê ti gere ti Boaz juska na ndapre, kozo ti tene ndo ahan kue, ngoi so zo alingbi ti bâ mba ti lo ti hinga lo pëpe. Boaz atene: “Zia zo oko ahinga pëpe so mbeni wali aga na bï so ge na ndo ti pikango lê ti kobe ni.” 15  Lo tene nga: “Ga na kota bongo so ayeke na terê ti mo so, mo gbara yâ ni.” Tongaso, lo gbara yâ ni, na Boaz afû orge fani omene* na yâ ti bongo ni si lo mû ni na Ruth ti yô ni; na pekoni Boaz akiri na kodro. 16  Ruth akiri na ndo ti kogara ti lo, na kogara ni ahunda lo, atene: “Molenge ti mbi ti wali, ye ni apassé na mo kâ tongana nyen?”* Ruth afa na lo ye kue so koli so asara na lo. 17  Lo kiri lo tene: “Lo fû orge fani omene na mbi, na lo tene: ‘Mo kiri maboko bale-oko na ndo ti kogara ti mo pëpe.’” 18  Naomi atene na lo: “Molenge ti mbi ti wali, duti ge juska mo bâ ye so ayeke si. Koli so ayeke wu terê ti lo pëpe juska lo hunzi tënë so laso si.”

Kete tënë

Na Hébreu: “ndo ti wungo terê.”
Wala “yü ambeni bongo ti mo so mo yeke yü ka na ndö ti ambeni.”
Wala “yanga ti bongo.”
Na Hébreu: “yanga ti gbagba kue ti azo ti mbi.”
Peut-être séa omene, wala litre 44 tongaso. Bâ na B14.
Na Hébreu: “mo yeke zo wa?”