Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Ruth 2:1-23

LI TI ATËNË NI

  • Ruth aro alê ti kobe na yaka ti Boaz (1-3)

  • Ruth na Boaz atingbi terê (4-16)

  • Ruth asara tënë ti nzoni bê ti Boaz na Naomi (17-23)

2  Mbeni fami ti koli ti Naomi ayeke dä so lo yeke na mosoro mingi; iri ti lo ayeke Boaz,+ lo yeke na yâ ti fami ti Élimélek.  Ruth, wali ti kodro ti Moab, atene na Naomi: “Pardon, zia mbi gue na yaka na peko ti mbeni zo so alingbi ti sara nzoni bê na mbi, mbi ro+ alê ti kobe na popo ti ati so angbâ.” Naomi atene na lo: “Molenge ti mbi ti wali, mo gue.”  Tongaso, lo gue, lo komanse ti ro alê ti kobe na mbeni yaka na peko ti azo ti kongo lê ti kobe ni. Gï tongaso, lo si na yaka so ayeke ti Boaz,+ fami ti Élimélek.+  Mo ye ti bâ, Boaz alondo na Bethléhem aga, lo bara azo ti kongo lê ti kobe ni, lo tene: “Jéhovah aduti na ala.” Ala nga atene: “Jéhovah asara tufa na ndö ti mo.”  Na pekoni, Boaz ahunda maseka-koli so ayeke na ndö ti azo ti kongo lê ti kobe ni, lo tene: “Maseka-wali so ayeke ti zo wa?”  Maseka-koli so ayeke na ndö ti azo ti kongo lê ti kobe ni atene: “Maseka-wali so ayeke zo ti Moab;+ lo na Naomi la alondo na sese ti Moab ala kiri ge.+  Lo tene: ‘Pardon, mbi peut ti ro+ alê ti kobe na popo ti ati so angbâ* na peko ti azo ti kongo alê ti kobe ni so, mbi bungbi ni?’ Ngbene ye so lo si ge na ndapre so, lo yeke gï na nduzu; gï fafadeso la lo duti na gbe ti dê ti wu terê ti lo kete so.”  Tongaso, Boaz atene na Ruth: “Molenge ti mbi ti wali, mä mbi si. Gue mo ro alê ti kobe na mbeni yaka nde pëpe, nga gue na mbeni ndo nde pëpe; ngbâ gï na terê ti amaseka-wali so ayeke azo ti kua ti mbi.+  Bâ gï yaka so ala ko alê ti kobe dä, na mo mû peko ti ala. Mbi hunda na amaseka-koli so ti ndu mo pëpe.* Tongana nzara ti ngu asara mo, gue na terê ti ata ti ngu na mo nyon ngu so amaseka-koli so atö.” 10  Hio lo kuku, lo kpo li ti lo na sese, na lo tene na Boaz: “Mbi so mbi yeke wande so, nyen la apusu mo ti sara nzoni bê na mbi? Nyen la asara si lê ti mo atï na ndö ti mbi so?”+ 11  Boaz atene na lo: “A fa na mbi ye kue so mo sara ndali ti kogara ti mo na peko ti kuâ ti koli ti mo, nga tongana nyen mo zia babâ na mama ti mo nga na kodro ti afami ti mo ti gue na ndo ti azo so mo hinga ala kozo pëpe.+ 12  Zia si Jéhovah afuta mo ndali ti ye so mo sara,+ nga zia si mo wara futa so ayeke mbilimbili-kue* na mbage ti Jéhovah Nzapa ti Israël, so mo ga na gbe ti kpangbi ti lo ti bata terê ti mo.”+ 13  Ruth atene: “Seigneur ti mbi, zia si mbi nzere na lê ti mo, ndali ti so mo dë bê ti mbi awe, nga tënë ti mo amû ngangu na* mbi wakua ti mo, atâa so mbi yeke nga oko ti awakua ti mo pëpe.” 14  Tongana ngoi ti tengo ye alingbi awe, Boaz atene na lo: “Ga, mo te mapa, nga mo yôro ni na yâ ti vinaigre.” Tongaso, lo duti na terê ti azo ti kongo lê ti kobe. Na pekoni Boaz amû na lo lê ti kobe so a yôro ni, lo te ni, yâ ti lo asi me tanga ni angbâ. 15  Tongana lo londo ti ro+ alê ti kobe, Boaz atene na amaseka-koli ni: “Ala zia lo ti ro même alê ti kobe na popo ti ati so a fâ ni awe,* nga ala sara sioni na lo pëpe.+ 16  Ala girisa pëpe ti gboto ambeni lê ti kobe na popo ti ati so a kanga gere ni awe so, ala zia na sese si lo ro ni; ala tene mbeni tënë ti kanga lege na lo pëpe.” 17  Tongaso, lo ngbâ ti ro alê ti kobe juska lakui.+ Tongana lo pika alê ti kobe so lo ro, a yeke nduru na épha oko* ti orge. 18  Lo mû ni lo gue na ni na kodro, na kogara ti lo abâ alê ti kobe so lo ro. Nga, Ruth asigi na tanga ti kobe so lo te si angbâ,+ lo mû ni na kogara ti lo. 19  Kogara ti lo ahunda lo, atene: “Mo ro fade alê ti kobe na ndo wa laso? Mo sara kua na ndo wa? Zia tufa aga na ndö ti lo so lê ti lo atï na ndö ti mo.”+ Tongaso, lo tene na kogara ti lo tënë ti zo so lo na lo asara kua, lo tene: “Iri ti koli so mbi na lo e sara kua laso ayeke Boaz.” 20  Naomi atene na kogara ti lo: “Zia tufa ti Jéhovah, lo so angbâ lakue ti fa tâ ndoye na mbage ti azo so angbâ na fini nga na akuâ, aga na ndö ti lo.”+ Naomi akiri atene: “Koli so ayeke mbeni fami ti e.+ Lo yeke oko ti ala so ayeke na droit ti futa ye ti zi e.”*+ 21  Ruth, wali ti kodro ti Moab, atene: “Lo tene na mbi nga, lo tene: ‘Ngbâ gï na terê ti amaseka ti mbi juska ala ko alê ti kobe ni kue.’”+ 22  Naomi atene na kogara ti lo Ruth: “Molenge ti mbi ti wali, a yeke nzoni ti tene mo na amaseka-wali so ayeke sara kua na lo ague ahon ti tene mo gue na yâ ti mbeni yaka nde si azo ason li ti mo kâ.” 23  Tongaso, lo ngbâ gï na terê ti amaseka-wali so ayeke sara kua na Boaz, na lo ro alê ti kobe juska ngoi ti kongo alê ti orge+ na ti blé ahunzi kue. Lo ngbâ ti lango ndo oko na kogara ti lo.+

Kete tënë

A lingbi nga ti tene “akobe so a kanga gere ni.”
Wala “ti zia mo kpô.”
Wala “futa kue.”
Na Hébreu: “mo sara tënë na bê ti.”
A lingbi nga ti tene “akobe so a kanga gere ni.”
Litre 22 tongaso. Bâ na B14.
Wala “mbeni fami ti e so ayeke na droit ti vo e (ti zi e).”