Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Psaume 91:1-16

LI TI ATËNË NI

  • Guengo na ndo so Nzapa ayeke dä ti bata terê

    • Lo zi zo na tïtî zo ti gbungo ndeke (3)

    • Duti na gbe ti akpangbi ti Nzapa (4)

    • Mo ngbâ ti mo atâa azo saki mingi atï ti ala (7)

    • Nzapa amû yanga na a-ange ti bata mo (11)

91  Zo so aduti na ndo ti Lo so ayeke na nduzu na ndö ti aye kue,+ so azo ahinga ni pëpe, ayeke duti na gbe ti dê ti Lo so ngangu ti lo ahon angangu kue.+   Mbi yeke tene na Jéhovah: “Mo yeke ndo ti batango terê ti mbi nga ngangu gbagba ti mbi,+ Nzapa ti mbi so mbi zia bê ti mbi na ndö ti mo.”+   Lo yeke zi mo na yâ ti kûkû ti zo ti gbungo ndeke, na yâ ti sioni kobela so afâ azo mingi.   Lo yeke zia mo na gbe ti akpangbi ti lo,* na mo yeke kpe ti bata terê ti mo na gbe ni.+ So lo yeke lakue be-ta-zo,+ lo yeke duti ande kota vala+ ti mo nga gbagba so abata mo.*   Mo yeke sara pëpe mbeto ti aye so ayeke mû mbeto mingi na zo na bï,+ wala alê ti kokora so ayeke kpe na kota lâ,+   wala sioni kobela so ayeke hara na yâ ti bingo si ayeke fâ azo mingi wala ye ti futingo so ayeke buba ndo na midi.   Azo saki oko ayeke tï na sese na terê ti mo nga azo saki bale-oko ayeke tï na sese na mbage ti maboko ti mo ti koli; me aye so ayeke si nduru na mo pëpe.+   Ti mo, na ngoi so a yeke punir azo ti sioni,* mo yeke bâ ni gï bango na lê.   So mo tene: “Jéhovah ayeke ndo ti batango terê ti mbi,” mo sara si Lo so ayeke na nduzu na ndö ti aye kue aga ndo ti duti*+ ti mo; 10  ye ti ngangu ayeke wara mo pëpe,+ nga ye ti sioni ayeke si nduru na tente ti mo pëpe, 11  ndali ti so lo yeke mû yanga na a-ange+ ti lo na ndö ti mo si ala bata mo na yâ ti alege ti mo kue.+ 12  Ala yeke yô mo na maboko ti ala,+ si mo pika gere ti mo na tênë pëpe.+ 13  Mo yeke tambela na ndö ti bamara so akono awe nga na cobra; mo yeke dö na gbe ti gere ti mo bamara so kuä ti go ti lo asigi awe nga na kota ngbo.+ 14  Nzapa atene: “So lo ye mbi mingi so,* mbi yeke sö lo.+ Mbi yeke bata lo ndali ti so lo hinga iri ti mbi.+ 15  Lo yeke iri ndo na mbi, na mbi yeke kiri tënë na lo.+ Na ngoi ti vundu, mbi yeke duti ande na terê ti lo.+ Mbi yeke sö lo na mbi yeke sara si lo wara gloire. 16  Mbi yeke sara si lo te gigi,+ na mbi yeke sara si lo bâ aye so mbi sara ti sö zo.”*+

Kete tënë

Wala “kanga lege si ye asi nduru na mo pëpe.”
Wala “ngangu gbagba.”
Na Hébreu: “a yeke kiri na ala peko ti ye so ala sara.”
A lingbi nga ti tene “ngangu gbagba; ndo ti batango terê.”
Na Hébreu: “lo ga na terê ti mbi si e bungbi oko.”
Wala “bâ salut so alondo na mbi.”