Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Psaume 68:1-35

LI TI ATËNË NI

  • ‘Zia si yâ ti awato ti Nzapa akangbi kirikiri’

    • “Babâ ti amolenge so babâ ti ala ayeke dä ape” (5)

    • Nzapa amû da na zo so ayeke gï lo oko (6)

    • Awali ayeke fa nzoni tënë (11)

    • Nzapa amû akoli tongana amatabisi (18)

    • ‘Lâ na lâ, Jéhovah ayô aye so ane e’ (19)

Na mokonzi ti azo ti pikango mozoko. Psaume ti David. Bia. 68  Zia Nzapa alondo, zia si yâ ti awato ti lo akangbi kirikiri nga zia si ala so ake lo akpe na gbele lo.+   Tongana ti so pupu ahon na guru ti wâ, zia si mo tomba ala; tongana ti so wâ asara si cire aga ngu, zia si azo ti sioni akui na gbele Nzapa.+   Me zia si azo ti mbilimbili aduti na ngia,+ zia si ala duti na ngia mingi na gbele Nzapa nga zia terê ti ala anzere na ngia.   Ala he bia na Nzapa, ala he bia* ti sepela iri ti lo.+ Ala he bia na Lo so ayeke hon na yâ ti kpangbala ndo ti désert.* Iri ti lo ayeke Jah.*+ Ala duti na ngia na gbele lo!   Nzapa, so ayeke na ndo ti lo so ayeke nzoni-kue,+ ayeke babâ ti amolenge so babâ ti ala ayeke dä pëpe nga zo ti batango* awali-mua.+   Azo so ayeke gï ala oko, Nzapa amû na ala da ti lango;+ lo zi azo ti kanga, na lo sara si aye ti ala amaï.+ Me ti azo ti kpengba-li, ala yeke sara kodro na ndo so ahule.+   Nzapa, na ngoi so mo yeke fa lani lege na* azo ti mo,+ na ngoi so mo yeke tambela lani na yâ ti désert, (Sélah)   sese ayengi,+ ngu alondo na yayu apika ngangu* ndali ti Nzapa; Hoto ti Sinaï ayengi ndali ti Nzapa, Nzapa ti Israël.+   Nzapa, mo sara si ngu apika mingi; mo sara si azo* ti mo so awoko kue akiri awara ngangu. 10  Ala lango na yâ ti camp ti mo na gbe ti atente;+ Nzapa, na nzoni bê ti mo, mo mû na awayere ye so ala yeke na bezoin ni. 11  Jéhovah amû yanga awe; awali so ayeke fa nzoni tënë ayeke gbani gbani.+ 12  Agbia ti aturugu akpe!+ Ala kpe! Wali so angbâ na kodro, lo nga lo wara mbage ti aye so a gbu na bira.+ 13  Atâa so ala akoli alango na terê ti awâ so a tingo na yâ ti camp,* a yeke wara ande mbeni kolokoto so a zia argent na terê ti akpangbi ti lo nga so a zia lor ti nzoni ni* na terê ti ayanga ti kuä ti terê ti lo. 14  Na ngoi so Lo so ngangu ti lo ahon angangu kue asara si yâ ti agbia ni akangbi kirikiri,+ neige atï na ndö ti Zalmon.* 15  Hoto ti Basan+ ayeke mbeni hoto ti Nzapa;* hoto ti Basan ayeke mbeni hoto so ali ni ayeke nde nde nde. 16  Ala ahoto so ali ni ayeke nde nde nde, ngbanga ti nyen bê asara ala na ngoi so ala yeke bâ hoto so Nzapa asoro* ni ti ga ndo ti duti ti lo?+ Biani, Jéhovah ayeke duti kâ lakue lakue.+ 17  Apuse ti bira ti Nzapa ayeke saki na saki, saki mingi mingi.+ Jéhovah alondo na Sinaï, lo ga na ndo ti lo so ayeke nzoni-kue.+ 18  Mo monté na nduzu;+ mo gue na azo so a gbu ala na ngbâa; mo mû akoli tongana matabisi,+ même ala so li ti ala akpengba mingi,+ ti tene mo duti na popo ti ala, mo Jah Nzapa. 19  Zia si a sepela Jéhovah, lo so, lâ na lâ, ayeke yô aye so ayeke ne e,+ tâ Nzapa ti salut ti e. (Sélah) 20  Tâ Nzapa ni ayeke Nzapa so asö e;+ Jéhovah, Seigneur ti dunia kue, azi zo na yanga ti kuâ.+ 21  Nzapa ayeke neka ande yâ ti li ti awato ti lo; zo kue so angbâ na yâ ti* siokpari ti lo si tënë ayeke na li ti lo,+ Nzapa ayeke neka bê ti li ti lo so gbâ ti kuä ti li ayeke dä. 22  Jéhovah atene: “Mbi yeke mû ala kâ na Basan,+ mbi kiri na ala; mbi yeke mû ala na gbe ti ngu-ingo, mbi sigi na ala, 23  si mênë ti awato ti mo amû terê ti gere ti mo kue,+ na ambo ti mo asu mênë ti ala.” 24  Nzapa, azo abâ molongo ti azo ti mo so ayeke hon, molongo ti azo ti Nzapa ti mbi nga na Gbia ti mbi, so ayeke gue na ndo so ayeke nzoni-kue.+ 25  Azo ti hengo bia la ayeke na devant; azo ti pikango aye ti mozoko so ayeke na kamba aga na peko ti ala;+ na milieu, a yeke wara amaseka-wali so ayeke pika tambourin.+ 26  Ala sepela Nzapa na popo ti gbâ ti azo so abungbi,* ala sepela Jéhovah, ala so fini ti ala alondo na Lo so asara si Israël abâ gigi.+ 27  Bâ, tanga ni, Benjamin,+ so asö benda na ndö ti azo, lo na amokonzi ti Juda na azo ti ala so ayeke dekongo nga na amokonzi ti Zabulon na amokonzi ti Nephtali. 28  Nzapa ti mo amû yanga lani awe so mo yeke duti ngangu. Nzapa ti e so mo sara ye ndali ti e awe, fa ngangu ti mo.+ 29  Ndali ti temple ti mo so ayeke na Jérusalem,+ agbia ayeke ga na amatabisi na mo.+ 30  Suku na anyama ti ngonda so aduti na yâ ti asosongo nga na gbâ ti akoli-bagara+ na amolenge ti ala so abungbi, juska azo ti amara aga akuku na gbele mo na alê ti nginza ti argent so ala ga na ni.* Me azo so a nzere na ala ti tiri bira, lo kangbi yâ ti ala kirikiri. 31  A yeke sigi na aye ti Égypte+ so a sara ni na cuivre, a ga na ni;* azo ti Cush ayeke mû amatabisi hio na Nzapa. 32  Ala aroyaume ti sese, ala he bia na Nzapa,+ ala he bia ti sepela* Jéhovah, (Sélah) 33  lo so atambela na ndö ti yayu, même yayu so ayo kâ,+ so ayeke dä ngbene ye ândö. Bâ, go ti lo atoto tongana bekpa, a toto ngangu mingi. 34  Zia ala yeda so Nzapa ayeke na ngangu.+ Gloire ti lo ayeke na ndö ti Israël, ngangu ti lo asi juska na lê ti nduzu.* 35  Na ngoi so Nzapa ayeke sigi na yâ ti pendere ndo ti lo* so ayeke nzoni-kue,+ lo pika bê ti azo. Lo yeke Nzapa ti Israël so amû ngangu nga na komandema na azo ti lo.+ Zia a sepela Nzapa.

Kete tënë

Wala “pika mozoko.”
A lingbi nga ti tene “na ndö ti ambinda.”
“Jah” ayeke nduru iri ti Jéhovah.
Na Hébreu: “juge ti.”
Na Hébreu: “mo sigi mo hon kozo na.”
Na Hébreu: “ayuru.”
Na Hébreu: “héritage.”
A lingbi nga ti tene “agbagba ti ataba.”
Wala “so ayeke jaune si aye ti gue vert.”
Wala “a yeke mo bâ mo tene neige atï na Zalmon.”
Wala “kota hoto.”
Wala “aye.”
Wala “ti tambela na yâ ti.”
Na Hébreu: “na yâ ti akota bungbi.”
A lingbi nga ti tene “ala dö argent ni na gbe ti gere ti ala.”
A lingbi nga ti tene “Alembe ayeke sigi na Égypte ti ga.”
Wala “pika mozoko na.”
Na Hébreu: “ambinda.”
Na Hébreu: “mo.”