Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Psaume 55:1-23

LI TI ATËNË NI

  • Sambela na peko ti so mbeni kamarade ti lo akä lo

    • Mbeni kota kamarade agi yanga ti lo (12-14)

    • “Aye so ane mo, mo bi ni na ndö ti Jéhovah” (22)

Na mokonzi ti azo ti pikango mozoko; ti pika ni na aye ti mozoko so ayeke na kamba. Maskil.* Psaume ti David. 55  Nzapa, mä sambela ti mbi;+ sara sanka pëpe na ngoi so mbi hunda mo ti sara nzoni bê na mbi.*+   Dengi mê mo mä mbi, na kiri tënë na mbi.+ Gingo bê ti mbi asara si mbi duti gbä,+ nga li ti mbi ayeke kpô pëpe   ndali ti tënë so awato ti mbi ayeke tene nga na ngangu so zo ti sioni ayeke sara na ndö ti mbi. Ala ga na gbâ ti akpale na mbi, nga na ngonzo, ala ngbâ ti bata mbi na bê ti ala.+   Bê ti mbi ayeke na vundu mingi na yâ ti mbi+ kâ, nga mbeto ti kuâ ahon ndö ti mbi.+   Mbeto asara mbi, terê ti mbi ayeke dö, terê ti mbi ayeke dö ngangu mingi.   Mbi yeke tene: “Tongana fade mbi yeke na kpangbi tongana kolokoto, ka mbi huru mbi hon mbi duti na siriri.   Ka mbi kpe mbi hon ayo.+ Ka mbi lango na yâ ti benyama.+ (Sélah)   Ka mbi kpe hio na mbeni ndo ti bata terê ti mbi yongoro na pupu so aya ngangu, yongoro na kota pupu ti ngu.”   Jéhovah, bi tomboka na li ti ala, buba yâ ti aye so ala leke ti sara,*+ ndali ti so mbi bâ sarango ye ti ngangu na zo nga na tiri na yâ ti gbata ni. 10  Bï na lâ ala ngoro na li ti agbagba ni; sarango mbana na zo nga na kpale ayeke na yâ ni.+ 11  Bubango ye ayeke na yâ ni; sarango ye ti ngangu na zo na handango zo angbâ ngbango na ndo so azo ayeke gue ka dä mingi.+ 12  A yeke pëpe mbeni wato la agi yanga ti mbi;+ tongana a yeke tongaso, ka mbi kanga bê ti mbi. A yeke pëpe mbeni zo so ake mbi la alondo na terê ti mbi; tongana a yeke tongaso, ka mbi honde terê ti mbi si lo bâ mbi pëpe. 13  Me a yeke mo, mbeni zo tongana mbi,*+ mo kamarade ti mbi wani so mbi hinga mo nzoni.+ 14  Mbi na mo e yeke lani akota kamarade; mbi na mo e yeke tambela lani ti gue na da ti Nzapa, e na gbâ ti azo. 15  Zia si a futi awato ti mbi!+ Zia si ala gue na Dû ti kuâ* na fini lê ti ala; ndali ti so sioni ye ayeke na popo ti ala nga na yâ ti bê ti ala. 16  Ti mbi, mbi yeke iri ndo na Jéhovah Nzapa, na lo yeke sö mbi.+ 17  Na lakui, na ndapre nga na midi, mbi gi bê ti mbi na mbi yeke dema,*+ na lo mä go ti mbi.+ 18  Lo yeke sö* mbi na maboko ti azo so ayeke tiri na mbi, na lo mû siriri na mbi,* ndali ti so gbâ ti azo la si alondo na terê ti mbi.+ 19  Nzapa ayeke mä mbi, na lo yeke londo na terê ti ala,+ Lo so aduti na ndö ti trône ngbene ye giriri.+ (Sélah) Azo so akpe Nzapa pëpe,+ ala yeke ke ti changé. 20  Lo* londo na terê ti azo so lo na ala ayeke na siriri;+ lo sara ye alingbi na mbele ti lo pëpe.+ 21  Atënë ti yanga ti lo awoko ahon beurre,+ me bê ti lo ayeke gï na ndö ti tiri. Atënë ti yanga ti lo awoko zo ahon mafuta, me ala yeke tongana a-épée so a gboto ni na yâ ti bozo ni awe.+ 22  Aye so ane mo, mo bi ni na ndö ti Jéhovah,+ na lo yeke mû ngangu na mo.+ Lo yeke zia lâ oko pëpe si zo ti mbilimbili atï.*+ 23  Me mo, Nzapa, mo yeke gue na azo ni so na yâ ti dû so alï ahon atanga ni.+ Azo so ngbanga ti mênë ayeke na li ti ala nga na azo ti handa ayeke si na ndambo ti lango ti fini ti ala pëpe.+ Me mbi, mbi yeke zia bê ti mbi na ndö ti mo.

Kete tënë

Wala “honde terê ti mo pëpe na ngoi so mbi sambela ti tene mo mû maboko na mbi.”
Na Hébreu: “kangbi yâ ti langue ti ala.”
Wala “mbeni zo, mbi na lo e lingbi terê.”
Wala “Shéol,” so ti tene dû ti kuâ so azo kue ayeke gue dä. Bâ na kete bakari.
Wala “mbi duti kpô gbä.”
Na Hébreu: “zi.”
Wala “âme ti mbi.”
So ti tene ngbene kamarade ti zo ti sungo Psaume so lo sara tënë ti lo na versê 13 nga na 14.
Wala “atambela tongana zo so asoulé.”