Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Psaume 53:1-6

LI TI ATËNË NI

  • Sarango ye ti zo ti buba

    • “Jéhovah ayeke dä ape” (1)

    • “Zo oko ti sara nzoni ye ayeke dä ape” (3)

Na mokonzi ti azo ti pikango mozoko, ti tene a pika ni alingbi na Mahalath.* Maskil.* Psaume ti David. 53  Zo ti buba* atene na bê ti lo, atene: “Jéhovah ayeke dä pëpe.”+ Aye so ala sara ayeke sioni mingi nga ayeke mbilimbili pëpe; zo oko ti sara nzoni ye ayeke dä pëpe.+   Me Nzapa angbâ na yayu kâ lo bâ amolenge ti azo+ ti bâ wala mbeni zo ahinga ti bâ yâ ti aye nzoni, wala mbeni zo ayeke gi Jéhovah.+   Ala kue amû mbeni lege nde, sarango ye ti ala kue aga sioni awe; zo oko ti sara nzoni ye ayeke dä pëpe, même zo oko tongaso ayeke dä pëpe.+  Mbeni zo na popo ti azo ti sioni so ahinga ndo ayeke dä ape? Ala hunzi azo ti mbi tongana ti so ala te mapa ahunzi. Ala di iri ti Jéhovah pëpe.+   Me mbeto ayeke gbu ala ngangu, mara ti mbeto so ade ti gbu ala pëpe;* ndali ti so azo so atiri na mo,* Nzapa ayeke kangbi yâ ti abio ti ala kirikiri. Mo yeke zia kamene na lê ti ala, ndali ti so Jéhovah ake ala awe.   Zia si salut ti Israël alondo na mbage ti Sion aga!+ Na ngoi so Jéhovah akiri abungbi azo ti lo so a gue na ala na ngbâa, zia si Jacob aduti na ngia, nga zia si Israël asara ngia.

Kete tënë

Wala “Zo so li ti lo ayeke dä pëpe.”
A lingbi nga ti tene “mbeto ayeke sara ala atâa so ye ti mungo mbeto na zo ayeke dä pëpe.”
Na Hébreu: “so ayeke sara camp na terê ti mo ti tiri na mo.”