Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Psaume 50:1-23

LI TI ATËNË NI

  • Nzapa ayeke fâ ngbanga na popo ti abe-ta-zo nga na azo ti sioni

    • Mbele so Nzapa ate na lege ti mbeni sandaga (5)

    • “Nzapa wani ayeke Juge” (6)

    • Anyama kue ayeke ti Nzapa (10, 11)

    • Nzapa asigi na nda ti azo ti sioni (16-21)

Bia ti Asaph.+ 50  Jéhovah,* Nzapa ti anzapa,+ asara tënë; lo iri sese ti ga, a komanse na ndo so lâ asigi dä juska na ndo so lâ alinda dä.*   Na Sion, so ayeke tâ pendere mingi,+ Nzapa asigi tongana lâ lo su.   Nzapa ti e ayeke ga, lo lingbi ti duti kpô pëpe.+ Mbeni wâ so ayeke gbi ye ayeke na gbele lo,+ na mbeni kota pupu so aga na ngu-nzapa angoro lo kue.+   Lo iri yayu na sese+ ti ga si lo fâ ngbanga ti azo ti lo;+ lo tene:   “Ala bungbi azo ti mbi so ayeke be-ta-zo ala ga na ala na mbi, azo so ate mbele na mbi na lege ti mbeni sandaga.”+   Yayu afa tënë ti mbilimbili ti lo, teti Nzapa wani ayeke Juge.+ (Sélah)   “Ala mä mbi si, ala azo ti mbi, mbi yeke sara tënë; Israël, mä mbi, mbi yeke fa na mo sioni ti mo.+ Mbi yeke Nzapa, Nzapa ti mo.+   Mbi suku na mo pëpe ndali ti asandaga so mo mû wala ndali ti asandaga ti mo so a zö ni agbi kue, so ayeke na gbele mbi lakue.+   Mbi yeke na bezoin pëpe ti mû mbeni koli-bagara ti da ti mo wala angasa* so ayeke na yâ ti gbagba so mo leke ndali ti ala.+ 10  Anyama ti ngonda kue so ayeke na yâ ti gbako ayeke ti mbi,+ même anyama so ayeke na ndö ti ahoto saki oko. 11  Mbi hinga andeke kue ti ahoto;+ gbâ ti anyama ti ngonda so zo alingbi ti diko wungo ni pëpe ayeke ti mbi. 12  Tongana nzara asara mbi, mbi yeke tene nga na mo pëpe, ndali ti so sese so kobe ayeke sigi dä nga na ye kue so ayeke na yâ ni ayeke ti mbi.+ 13  Mbi yeke te nyama ti akoli-bagara? Mbi yeke nyon mênë ti angasa?+ 14  Mû singila na Nzapa tongana sandaga,+ nga sara ye alingbi na azendo so mo mû na Lo so ayeke na nduzu na ndö ti aye kue;+ 15  Iri mbi na ngoi ti vundu.+ Mbi yeke sö mo, na mo yeke mû gloire na mbi.”+ 16  Me Nzapa ayeke tene na zo ti sioni: “Zo wa la amû na mo droit ti fa andia ti mbi+ wala ti sara tënë ti mbele ti mbi?+ 17  Mo ke ti tene a fa lege na mo,* nga mo ngbâ ti tourné peko na atënë ti mbi.*+ 18  Tongana mo bâ zo ti nzi, mo yeda na ye so lo sara;+ nga mo ngbâ ti sara kamarade na azo so agi wali wala koli nde. 19  Na yanga ti mo, mo yeke kangbi asioni tënë; tënë ti handa agbu yanga ti mo ngangu.+ 20  Mo duti, mo diko tënë na terê ti ita ti mo wani,+ mo sigi na afaute ti* molenge ti mama ti mo. 21  Na ngoi so mo sara aye so, mbi zi yanga pëpe, tongaso mo pensé so mbi yeke ga tongana mo. Me fadeso, mbi yeke suku na mo, na mbi yeke fa atënë so mbi yeke na ni na terê ti mo.+ 22  Ala so agirisa Nzapa,+ pardon, ala gbu li ti ala na ndö ti tënë so, si mbi suru yâ ti ala kete kete pëpe, na zo oko ti sö ala ayeke dä pëpe. 23  Zo so amû singila tongana sandaga amû gloire na mbi;+ ti zo so angbâ gï na ndö ti oko lege, mbi yeke sara si lo bâ salut so alondo na Nzapa.”+

Kete tënë

Wala “Nzapa, Jéhovah.”
Wala “ti londo na est ti si na ouest.”
Na Hébreu: “akoli-ngasa.”
Wala “Mo ke fango ye.”
Na Hébreu: “ngbâ ti bi atënë ti mbi na peko ti mo.”
Wala “buba iri ti.”