Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Psaume 40:1-17

LI TI ATËNË NI

  • Singila na Nzapa so mbeni Nzapa tongana lo ayeke dä ape

    • Akusala ti Nzapa ayeke gbani gbani (5)

    • Asandaga ayeke pëpe kozo ye so agbu bê ti Nzapa (6)

    • “A nzere na mbi mingi ti sara ye so bê ti mo aye!” (8)

Na mokonzi ti azo ti pikango mozoko. Psaume ti David. Bia. 40  Mbi zia bê ti mbi kue ti ku* Jéhovah, na lo dengi mê ti lo,* lo mä toto ti mbi ti wara mungo maboko.+   Lo sigi na mbi na yâ ti dû so a yeke mä bruit ti ye so ayeke toto ngangu dä, na yâ ti popoto so alï lingo. Lo zia gere ti mbi na ndö ti kota tênë; lo sara si gere ti mbi aluti nzoni.   Na pekoni, lo zia fini bia na yanga ti mbi,+ bia ti gonda na Nzapa ti e. Azo mingi ayeke bâ ye so, bê ti ala ayeke pika, na ala yeke zia bê ti ala na ndö ti Jéhovah.   Ngia ayeke na zo so azia bê ti lo na ndö ti Jéhovah, na lo zia bê ti lo pëpe na ndö ti azo ti kpengba-li wala azo ti mvene.   Jéhovah, Nzapa ti mbi, aye so mo sara ayeke mingi, akusala ti mo so adö bê nga na abibe ti mo na mbage ti e ayeke mingi.+ Zo oko ti lingbi na mo ayeke dä pëpe;+ tongana mbi gi ti sara tënë ti akusala ti mo nga ti fa peko ni, mbi peut ti diko ni kue pëpe, ndali ti so a yeke mingi mingi.+   Mo ye* sandaga ti anyama wala ambeni sandaga nde pëpe;+ me mo zi mê ti mbi ti tene mbi mä tënë.+ Mo hunda pëpe asandaga so a zö ni agbi kue wala asandaga ndali ti siokpari.+   Tongaso mbi tene: “Bâ, mbi ga awe! A sû tënë na ndö ti mbi na yâ ti rouleau.*+   Nzapa ti mbi, a nzere na mbi mingi* ti sara ye so bê ti mo aye!+ Ndia ti mo ayeke na yâ ti bê ti mbi kâ.+   Mbi fa nzoni tënë ti mbilimbili ti mo na yâ ti kota congrégation.+ Jéhovah, tongana ti so mo hinga, mbi gbanzi terê ti mbi pëpe ti sara tënë.+ 10  Mbi honde mbilimbili ti mo na yâ ti bê ti mbi pëpe. Mbi fa na azo so mo yeke be-ta-zo nga mo sö zo. Tongana mbi yeke na yâ ti kota congrégation, mbi honde tâ ndoye ti mo nga na tâ tënë ti mo pëpe.”+ 11  Jéhovah, gbanzi mbi na nzoni bê ti mo pëpe. Zia si tâ ndoye ti mo nga na tâ tënë ti mo abata mbi lakue.+ 12  Aye ti ngangu so angoro mbi ayeke mingi, na zo apeut ti diko ni pëpe;+ afaute ti mbi ahon ndö ti mbi, a sara si mbi lingbi pëpe ti bâ lege so mbi yeke mû;+ a yeke mingi ahon kuä ti li ti mbi, na bê ti mbi anze kue. 13  Pardon Jéhovah, duti nduru ti sö mbi.+ Jéhovah, ga hio mo mû maboko na mbi.+ 14  Azo kue so agi ti zi fini* ti mbi so, zia si kamene agbu ala nga a bi nengo ti ala na sese. Zia si azo so terê ti ala anzere ndali ti ye ti ngangu so awara mbi azi terê ti ala ala hon na kamene na lê. 15  Azo so ayeke tene na mbi, atene: “A lingbi mo!” zia si li ti ala ane ndali ti kamene so asara ala. 16  Me zia si azo so agi mo + asara ngia nga aduti na ngia ndali ti mo.+ Zia si azo so andoye aye so mo sara ti sö zo atene lakue: “Zia a gonda kota ti Jéhovah!”+ 17  Me zo ti mungo maboko na mbi ayeke dä pëpe nga mbi yeke wayere; zia si Jéhovah abi bê ti lo na mbi. Mo yeke zo ti mungo maboko na mbi nga zo ti sö mbi.+ Nzapa ti mbi, mo ku pëpe.+

Kete tënë

Wala “Mbi kanga bê ti ku.”
Wala “lo kuku ti mä.”
Wala “Mo wara ngia na yâ ti.”
Na Hébreu: “mbeti so ayeke rouleau.”
Wala “mbi ye mingi.”
Wala “âme.”