Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Psaume 38:1-22

LI TI ATËNË NI

  • Sambela ti zo so achangé bê ti lo me mawa angbâ ti sara lo

    • “Vundu ahon ndö ti mbi nga bê ti mbi anze kue” (6)

    • Jéhovah ayeke mä azo so ayeke ku lo (15)

    • “Siokpari ti mbi asara si mbi yeke lani kpô ape” (18)

       (18)

Bia ti David, so ayeke bia ti dango bê. 38  Jéhovah, suku na mbi na lê ti ngonzo pëpe, wala kiri na mbi na nzoni lege na kota ngonzo na bê pëpe.+   Alê ti kokora ti mo alï mbi ngangu mingi, nga maboko ti mo apete mbi na sese ngangu.+   Terê ti mbi kue ayeke gï kobela* ndali ti ngonzo ti mo na terê ti mbi. Siriri ayeke na yâ ti abio ti mbi pëpe ndali ti siokpari ti mbi,+   ndali ti so afaute ti mbi ayeke lakue na ndö ti li ti mbi;+ a yeke tongana mbeni nengo kungba so mbi lingbi ti yô ni pëpe.   Akä ti mbi afun nga asara sanzo ndali ti ye ti buba so mbi sara.   Vundu ahon ndö ti mbi nga bê ti mbi anze kue; mbi tambela na vundu na bê na yâ ti lango ni kue.   Yâ ti terê ti mbi kue ayeke gï wâ, terê ti mbi kue ayeke gï kobela.+   Amembre ti terê ti mbi kue akui nga mbi woko kue; vundu ti bê ti mbi asara si mbi dema na kota go.*   Jéhovah, aye kue so mbi sara nzara ni ayeke na gbele mo, nga dema ti mbi ahonde na lê ti mo pëpe. 10  Bê ti mbi apika ngangu, ngangu ti mbi ahunzi; lumière ti lê ti mbi amingo awe.+ 11  Akamarade ti mbi na amba ti mbi so mbi na ala ndo oko ayeke kpe mbi kpengo, ndali ti ye ti ngangu so asi na mbi, nga azo so mbi hinga ala nzoni aduti yongoro na terê ti mbi. 12  Azo so agi ti mû fini ti mbi azia agbanda ti gbu mbi; azo so agi ti sara sioni na mbi asara tënë ti futingo mbi;+ na yâ ti lango ni kue, ala yeke tene atënë ti handango zo. 13  Me mbi ke ti mä ala, mo bâ mo tene mê ti mbi akanga,+ mbi zi yanga pëpe, mo bâ mo tene mbi yeke buburu.+ 14  Mbi ga tongana mbeni zo so mê ti lo alingbi ti mä tënë pëpe, na so ayeke na tënë ti tene pëpe ti gbu koko ti lo wani. 15  Mbi ku mo, Jéhovah,+ na mo kiri tënë na mbi, Jéhovah, Nzapa ti mbi.+ 16  Mbi tene: “Zia pëpe si terê ti ala anzere ndali ye so asi na mbi, wala ala pika kate ti ala tongana gere ti mbi aglissé ti tene mbi tï.” 17  A ngbâ lani kete mbi tï, nga ye ason mbi lakue.+ 18  Mbi fa faute ti mbi na gigi;+ siokpari ti mbi asara si mbi yeke lani kpô pëpe.+ 19  Me awato ti mbi akpengba* nga ala yeke ngangu mingi,* azo so ake mbi senge senge aga mingi. 20  Ala kiri na mbi sioni na place ti nzoni; ala dö sese na mbi ndali ti so mbi ye gï ti sara ye so ayeke nzoni. 21  Jéhovah, dö mbi mo zia mbi pëpe. Nzapa ti mbi, mo ngbâ yongoro na mbi pëpe.+ 22  Ga hio mo mû maboko na mbi, Jéhovah, salut ti mbi.+

Kete tënë

Na Hébreu: “Na yâ ti terê ti mbi, mbeni ndo so ason pëpe ayeke dä pëpe.”
Wala “mbi toto tongana bamara.”
Na Hébreu: “ayeke na fini.”
A lingbi nga ti tene “Me awato so ake mbi senge senge ayeke mingi.”