Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Psaume 18:1-50

LI TI ATËNË NI

  • A sepela Nzapa ndali ti salut ti lo

    • “Jéhovah ayeke tênë ti mbi so ayo na nduzu” (2)

    • Jéhovah ayeke be-ta-zo na zo so ayeke be-ta-zo na lo (25)

    • Lege ti Nzapa alingbi kue (30)

    • “So mo sara terê ti mo kete, a sara si mbi ga kota” (35)

Na mokonzi ti azo ti pikango mozoko. Atënë so David, wakua ti Jéhovah, ahe na bia na Jéhovah na lango so Jéhovah azi lo na tïtî awato ti lo kue nga na tïtî Saül. Lo tene:+ 18  Jéhovah, ngangu ti mbi, mbi ye mo mingi.+   Jéhovah ayeke tênë ti mbi so ayo na nduzu, ngangu gbagba ti mbi nga Zo so azi mbi.+ Nzapa ti mbi ayeke kota tênë+ so mbi kpe dä ti bata terê ti mbi, lo yeke vala ti mbi, ngangu sauveur* ti mbi nga nzoni ndo ti batango terê ti mbi.*+   Mbi iri ndo na Jéhovah, lo so lo lingbi na gonda, na lo yeke sö mbi na tïtî awato ti mbi.+   Akamba ti kuâ angoro mbi;+ azo so li ti ala ayeke dä pëpe, so ayeke tongana ngu so asuku, azia kota mbeto na yâ ti mbi.+   Akamba ti Dû ti kuâ* angoro mbi; agbanda ti kuâ ayeke na devant ti mbi.+   Na yâ ti vundu ti mbi, mbi iri ndo na Jéhovah, mbi ngbâ ti toto na Nzapa ti mbi ti mû maboko na mbi. Lo mä go ti mbi na yâ ti temple ti lo;+ toto so mbi toto ti tene lo mû maboko na mbi so atï na mê ti lo.+   Na pekoni, sese akomanse ti dö na ayeke yengi mbage na mbage;+ gere ti ahoto ayengi, nga a yengi mbage na mbage ndali ti so a zia ngonzo na bê ti lo.+   Guru asigi na hôn ti lo, na wâ so agbi ye asigi na yanga ti lo;+ charbon so amû wâ ngangu alondo na lo.   Lo sara si yayu aba na ngoi so lo yeke descend,+ na bingo so avuko ngangu ayeke na gbe ti gere ti lo.+ 10  Lo duti na ndö ti mbeni chérubin na lo yeke huru ti ga,+ lo descend na loro na ndö ti kpangbi ti mbeni yingo.*+ 11  Na pekoni, lo sara si bingo angoro terê ti lo,+ a ngoro lo tongana mbeni ndo so zo aduti dä ti bata terê ti lo; ambinda+ ti ngu so avuko nga ane ayeke nga na yâ ni. 12  Na yâ ti lumière so aza na gbele lo, glason na charbon so amû wâ mingi asigi na yâ ti ambinda ni. 13  Go ti Jéhovah akomanse ti toto tongana bekpa na yayu,+ Lo so ayeke na nduzu na ndö ti aye kue asara si azo amä go ti lo,+ glason na charbon so amû wâ mingi ayeke dä nga. 14  Lo pika alê ti kokora ti lo, na yâ ti awato ti mbi akangbi kirikiri;+ lo tokua wâ ti bekpa ti lo, na li ti ala aga kirikiri.+ 15  A bâ gbe ti angu* polele,+ a bâ gere ti sese polele ndali ti so mo Jéhovah mo suku ngangu nga ndali ti so pupu asigi na hôn ti mo.+ 16  Lo ngbâ kâ na nduzu, lo yôro maboko ti lo, lo gbu mbi na gbe ti ngu so alï, lo gboto mbi na gigi.+ 17  Lo sö mbi na tïtî wato ti mbi+ so ayeke ngangu, lo sö mbi na tïtî azo so ake mbi, ala so ayeke ngangu ahon mbi.+ 18  Ala londo na terê ti mbi na lâ ni so ye ti vundu asi na mbi,+ me Jéhovah amû maboko na mbi. 19  Lo gue na mbi na mbeni ndo so ayeke nzoni;* lo sö mbi ndali ti so mbi sara ye so anzere na lo.+ 20  Jéhovah afuta mbi alingbi na mbilimbili ti mbi;+ lo futa mbi alingbi na maboko ti mbi so avuru,+ 21  ndali ti so mbi ngbâ na alege ti Jéhovah, nga mbi sara ye ti sioni pëpe, so ayeke ti zia Nzapa ti mbi. 22  Ambela ti lo kue ayeke na gbele mbi, nga mbi yeke sara sanka ti andia ti lo pëpe. 23  Tënë ayeke duti ande na li ti mbi na gbele lo pëpe,+ na mbi yeke sara ande faute pëpe.+ 24  Zia si Jéhovah afuta mbi alingbi na mbilimbili ti mbi,+ alingbi na maboko ti mbi so avuru na gbele lo.+ 25  Zo so ayeke be-ta-zo, mo yeke be-ta-zo na lo;+ zo so tënë ayeke na li ti lo pëpe, mo sara ye na lo na lege ni;+ 26  Na zo so bê ti lo avuru, mo fa so bê ti mo avuru nga;+ me na zo ti kirikiri, mo sara ye na mayele.+ 27  Mo sö azo ti mawa;*+ me mo sara si azo ti fandara* aga kete.+ 28  Jéhovah, mo la mo sara si lampe ti mbi aza; Nzapa ti mbi so asara si wâ aza na yâ ti bingo so angoro mbi.+ 29  Na ngangu ti mo, mbi lingbi ti sara bira na azo so ayeke gbu ka aye ti azo na ngangu;+ na ngangu ti Nzapa, mbi lingbi ti huru gbagba.+ 30  Lege ti tâ Nzapa ayeke mbilimbili-kue;+ ye ti sioni ayeke na yâ ti tënë ti Jéhovah pëpe.+ Lo yeke vala ti azo kue so akpe na mbage ti lo ti bata terê ti ala.+ 31  Nde na Jéhovah, mbeni Nzapa ayeke dä?+ Nde na Nzapa ti e, mbeni kota tênë+ ayeke dä? 32  Tâ Nzapa la ayü na mbi ngangu tongana bongo,+ na lo yeke sara si lege ti mbi aga mbilimbili-kue.+ 33  Lo sara si gere ti mbi aga tongana gere ti lekpa; lo sara si mbi luti na ando so ayeke na nduzu.+ 34  Lo fa na mbi kode ti tiringo bira na maboko ti mbi; maboko ti mbi alingbi ti gboto yâ ti kokora so a sara ni na cuivre. 35  Mo sö mbi na vala ti mo,+ maboko ti mo ti koli agbu mbi na nduzu;* nga so mo sara terê ti mo kete, a sara si mbi ga kota.+ 36  Mo sara si lê ti lege so mbi tambela dä akono, tongaso si mbi glissé pëpe.+ 37  Mbi yeke tomba peko ti awato ti mbi, na mbi wara ala; mbi yeke kiri pëpe juska mbi hunzi ala kue si. 38  Mbi yeke neka yâ ti ala, tongaso si ala lingbi ti londo pëpe;+ ala yeke tï na gbe ti gere ti mbi. 39  Mo yeke mû na mbi ngangu si mbi tiri bira na ni; mo yeke sara si awato ti mbi atï na gbe ti mbi.+ 40  Mo yeke sara si awato ti mbi so aga ti tiri na mbi azi terê ti ala, ala hon; azo so ake mbi, mbi yeke hunzi* ala kue.+ 41  Ala toto ti hunda mungo maboko, me mbeni zo ti sö ala ayeke dä pëpe; ala toto même na Jéhovah, me lo kiri tënë na ala pëpe. 42  Mbi yeke neka yâ ti ala si ala ga tongana fuku ti sese na yâ ti pupu; mbi yeke tuku ala na ngonda tongana popoto na ndö ti lege. 43  Mo yeke zi mbi na tïtî azo so akasa mbi.+ Mo yeke zia mbi ti komande na ndö ti amara.+ Azo so mbi hinga ala pëpe ayeke sara ande kua na mbi.+ 44  Tënë so ala mä na ndö ti mbi ayeke sara si ala mä yanga ti mbi; terê ti awande ayeke dö na mbeto na ngoi so ala ga na gbele mbi.+ 45  Bê ti awande ayeke woko kue;* terê ti ala ayeke dö ande dongo na ngoi so ala sigi na yâ ti angangu gbagba ti ala. 46  Jéhovah ayeke na fini! Zia a sepela Kota tênë ti mbi!+ Zia a gonda Nzapa so asö mbi.+ 47  Sioni so azo asara na mbi, tâ Nzapa akiri peko ni na ala;+ lo zia azo na gbe ti mbi. 48  Lo zi mbi na tïtî awato ti mbi so ayeke na ngonzo; mo zia mbi na nduzu na ndö ti azo so atiri na mbi;+ mo sö mbi na tïtî zo so asara ye ti ngangu na zo. 49  Ndani la, Jéhovah, mbi yeke mû gloire na mo na popo ti amara,+ na mbi yeke he bia* ti sepela iri ti mo.+ 50  Lo sara akota ye ti sö* zo so lo zia lo gbia;+ lo fa tâ ndoye na zo ti lo so lo soro lo,+ na mbage ti David na ahale* ti lo lakue lakue.+

Kete tënë

Na Hébreu: “didi ti salut.” Bâ na kete bakari.
Wala “nzoni ndo ti batango terê so ayeke na nduzu.”
Wala “Shéol,” so ti tene dû ti kuâ so azo kue ayeke gue dä. Bâ na kete bakari.
Wala “pupu.”
Wala “acanal ti ngu.”
Wala “ndo so akono.”
Wala “azo so a yeke sara pasi na ala.”
Na Hébreu: “lê so abâ ndo na baba.”
Wala “amû ngangu na mbi.”
Na Hébreu: “kanga yanga ti.”
Wala “Awande ayeke woko.”
Wala “pika mozoko.”
Wala “Lo mû akota songo benda na.”
Na Hébreu: “ngongoa.”