Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Luc 3:1-38

LI TI ATËNË NI

  • Ngoi ti tongo nda ti kua ti Jean (1, 2)

  • Jean asara tënë ti batême (3-20)

  • Batême ti Jésus (21, 22)

  • Molongo ti akotara ti Jésus Christ (23-38)

3  Na yâ ti ngu 15 ni ti komandema ti Tibère César, tongana Ponce Pilate ayeke gouverneur ti Judée, na Hérode*+ ayeke komanda* ti Galilée, ita ti lo Philippe ayeke komanda ti kodro ti Iturée na ti Trachonitide, na Lysanias ayeke komanda ti Abilène,  na lâ ti prêtre-mokonzi Anne na ti Caïphe,+ tënë ti Nzapa asi na Jean,+ molenge ti Zacharie, tongana lo yeke na yâ ti benyama.+  Lo gue na ando kue so ayeke na terê ti Ngu ti Jourdain, lo yeke fa tënë ti batême so ayeke fä ti changengo bê, tongaso si a pardonné asiokpari ti ala,+  gï tongana ti so a sû na yâ ti mbeti ti atënë ti prophète Ésaïe, a tene: “Go ti mbeni zo ayeke dekongo na yâ ti benyama, atene: ‘Ala leke lege ti Jéhovah,* ala sara si alege ti lo aduti droit.+  Ala tuku sese na yâ ti apopo-hoto kue asi, ala kpaka ahoto nga na akete hoto kue si aga kpangbala; ala sara si alege so aba aga droit nga ala sara si ando kue so kûtu ayeke dä aga pendere.  Azo kue* ayeke bâ ande salut so Nzapa aga na ni.’”*+  Tongaso, lo komanse ti tene na gbâ ti azo so ayeke ga ti tene lo batize ala, lo tene: “Ala, amolenge ti asioni ngbo, zo wa la afa na ala lege ti kpe kota ngonzo so ayeke ga so?+  Tongaso, zia ala lë alengo so alingbi biani na changengo bê. Zia ala komanse ti tene na bê ti ala pëpe: ‘Babâ ti e ayeke Abraham,’ ndali ti so mbi tene na ala so Nzapa alingbi ti mû atênë so ti sara si aga amolenge ti Abraham.  Biani, dö ayeke na gunda ti akeke awe. Tongaso, keke oko oko kue so alë nzoni lengo pëpe, a yeke dë ni ande na sese na a bi ni na wâ.”+ 10  Gbâ ti azo ni ayeke hunda lo, atene: “Ka a yeke nzoni e sara nyen?” 11  Lo kiri tënë na ala: “Zia zo so ayeke na bongo use* amû oko na zo so ayeke na ni pëpe, nga zia zo so ayeke na ye ti tengo ni asara nga tongaso.”+ 12  Même azo ti rongo nginza ti impôt aga ti tene lo batize ala,+ na ala hunda lo, atene: “Maître, a yeke nzoni e sara nyen?” 13  Lo tene na ala: “Ala hunda pëpe na azo ti mû wungo ti nginza ti impôt* ahon ti so ndia afa.”+ 14  Nga, ala so ayeke sara kua ti turugu ahunda lo, atene: “Ka ti e, a yeke nzoni e sara nyen?” Lo tene na ala: “Ala sara ye ti ngangu na mbeni zo pëpe* wala ala bi tënë ti wataka na li ti mbeni zo pëpe.+ Me ala zia bê ti ala gï na ye so a yeke mû na ala na peko ti kua ti ala.”* 15  So azo ayeke ku Christ kungo, ala kue ayeke sara tënë so na bê ti ala na ndö ti Jean: “Âmanke Christ ni la ape?”+ 16  Jean akiri tënë na ala kue, lo tene: “Ti mbi, mbi batize ala na ngu. Me lo so ayeke ngangu ahon mbi ayeke ga, lo so mbi kpa pëpe ti zi kamba ti poro ti gere ti lo.+ Lo yeke batize ande ala na yingo vulu nga na wâ.+ 17  Ye ti lo ti pengo na alê ti kobe ayeke na maboko ti lo, ti sara si ndo ti pikango lê ti kobe ti lo avuru kue na ti bungbi blé ti lo na yâ ti gogoro ti lo. Me poro ti peko ni, lo yeke gbi ni na wâ so a lingbi ti mingo ni pëpe.” 18  Lo mû nga ambeni wango mingi na azo ni na lo ngbâ ti fa nzoni tënë na ala. 19  Me Jean asuku na Hérode, so ayeke komanda ti sese ni, ndali ti Hérodiade wali ti ita ti Hérode nga ndali ti aye ti sioni kue so Hérode asara. Ndani la, Hérode 20  akiri azia mbeni ye na ndö ti asioni ye kue so lo sara kozo: lo bi Jean na da ti kanga.+ 21  Na peko ti so a batize azo kue awe, a batize Jésus nga,+ na tongana lo yeke sambela, yayu azi+ 22  na yingo vulu aga na yâ ti mbeni terê so akpa kolokoto na adescend na ndö ti lo, na mbeni go asara tënë na yayu, atene: “Mo yeke Molenge ti mbi so mbi ndoye mo mingi, bê ti mbi anzere na mo mingi.”+ 23  Tongana Jésus+ ato nda ti kusala ti lo, lo yeke lani na ngu 30 tongaso.+ Azo abâ lo tongana molenge ti Joseph,+ molenge ti Héli, 24  molenge ti Matthat, molenge ti Lévi, molenge ti Melki, molenge ti Jannaï, molenge ti Joseph, 25  molenge ti Mattathias, molenge ti Amos, molenge ti Nahum, molenge ti Esli, molenge ti Naggaï, 26  molenge ti Maath, molenge ti Mattathias, molenge ti Sémeïn, molenge ti Josek, molenge ti Joda, 27  molenge ti Joanan, molenge ti Rhésa, molenge ti Zorobabel,+ molenge ti Shéaltiel,+ molenge ti Néri, 28  molenge ti Melki, molenge ti Addi, molenge ti Kosam, molenge ti Elmadam, molenge ti Er, 29  molenge ti Jésus, molenge ti Éliézer, molenge ti Jorim, molenge ti Matthat, molenge ti Lévi, 30  molenge ti Syméon, molenge ti Judas, molenge ti Joseph, molenge ti Jonam, molenge ti Éliakim, 31  molenge ti Méléa, molenge ti Menna, molenge ti Mattatha, molenge ti Nathan,+ molenge ti David,+ 32  molenge ti Jessé,+ molenge ti Obed,+ molenge ti Boaz,+ molenge ti Salmon,+ molenge ti Nahshon,+ 33  molenge ti Aminadab, molenge ti Arni, molenge ti Hesron, molenge ti Pérès,+ molenge ti Juda,+ 34  molenge ti Jacob,+ molenge ti Isaac,+ molenge ti Abraham,+ molenge ti Térah,+ molenge ti Nahor,+ 35  molenge ti Serug,+ molenge ti Réu,+ molenge ti Péleg,+ molenge ti Éber,+ molenge ti Shélah,+ 36  molenge ti Caïnan, molenge ti Arpacshad,+ molenge ti Sem,+ molenge ti Noé,+ molenge ti Lamek,+ 37  molenge ti Métushélah,+ molenge ti Hénok, molenge ti Jarèd,+ molenge ti Mahalaléel,+ molenge ti Caïnan,+ 38  molenge ti Énosh,+ molenge ti Seth,+ molenge ti Adam,+ molenge ti Nzapa.

Kete tënë

So ti tene Hérode Antipas. Bâ na kete bakari.
Na Grec: “tétrarque.” Mbeni mokonzi so akomande mbeni ndo na iri ti Kodro-togbia ti Rome.
Bâ na A5.
Na Grec: “Mitele kue.”
Wala “ye so Nzapa asara kua na ni ti sö na azo.”
Wala “mbeni bongo nde.”
Wala “Ala ro pëpe impôt.”
Wala “Ala mû ye ti zo na likisi pëpe.”
Wala “nginza ti kua ti ala.”