Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Jonas 4:1-11

LI TI ATËNË NI

  • Jonas asara ngonzo na lo ye ti kui (1-3)

  • Jéhovah afa na Jonas sarango nzoni bê (4-11)

    • “Eskê mo yeke na raison ti sara ngonzo tongaso?” (4)

    • A mû kete keke ti kangu ti fa ye na Jonas (6-10)

4  Me ye so anzere na bê ti Jonas oko pëpe, si lo sara ngonzo ngangu.  Tongaso, lo sambela Jéhovah, lo tene: “Aï, Jéhovah, tënë so mbi yeke gi bê ti mbi lani dä tongana mbi yeke na kodro ti mbi so la ape? A yeke ndali ni la si mbi tara ti kpe lani ti gue na Tarsis+ so; ngbanga ti so mbi hinga mbi tene mo yeke Nzapa so ayeke bâ mawa ti zo,* mo yeke Nzapa so asara nzoni bê na zo, mo sara ngonzo hio hio pëpe nga mo si singo na tâ ndoye,+ mo yeke nduru ti zia lege ti ye ti vundu so mo ye ti ga na ni na ndö ti azo.  Fadeso, Jéhovah, mo zi fini* ti mbi; a yeke nzoni mbi kui ahon ti tene mbi ngbâ na fini.”+  Jéhovah ahunda lo, atene: “Eskê mo yeke na raison ti sara ngonzo tongaso?”  Jonas asigi na yâ ti gbata ni na lo duti na mbage ti est. Lo sara mbeni kpangba, lo duti na gbe ni ti bâ ye so ayeke si na gbata ni.+  Na pekoni, Jéhovah asara si mbeni kete keke ti kangu asigi ahon li ti Jonas ti tene lo duti na gbe ti dê ni si bê ti lo adë ndali ti pasi so lo bâ. Terê ti Jonas anzere mingi ndali ti kete keke ti kangu ni so.  Me na ndade ni na kota ndapre, tâ Nzapa atokua mbeni makongo, na makongo ni ate keke ti kangu ni na keke ni ahule.  Tongana lâ asu awe, Nzapa akiri atokua mbeni pupu ti mbage ti est so ayeke chauffé mingi, na lâ asu ngangu na li ti Jonas na lo komanse ti évanouir. Lo iri kuâ na ndö ti lo,* na lo yeke tene: “A yeke nzoni mbi kui, ahon ti ngbâ na fini.”+  Nzapa ahunda Jonas, atene: “Eskê mo yeke na raison ti sara ngonzo tongaso ndali ti kete keke ti kangu so?”+ Jonas akiri tënë, atene: “Mbi yeke na raison ti sara ngonzo, mbi sara ngonzo ngangu ni la si mbi ye ti kui so.” 10  Me Jéhovah atene: “Mawa asara mo ndali ti kete keke ti kangu so, keke so mo sara mbeni kua oko ndali ni pëpe, mo nga la mo sara si keke ni asigi akono so pëpe; a sigi na bï oko na a kui nga na bï oko. 11  Ka mbi, mbi doit ti bâ mawa ti Ninive, kota gbata so ape?+ gbata so na yâ ni a yeke wara azo ahon 120 000, na so ala hinga même ti sara kangbi pëpe na popo ti ye ti nzoni na ye ti sioni,* gbata so na yâ ni nga a yeke wara anyama ti ala mingi mingi dä so.”+

Kete tënë

Wala “Nzapa ti grâce.”
Wala “âme.”
Wala “Lo hunda ti tene âme ti lo akui.”
Wala “ala hinga maboko ti ala ti koli na maboko ti ala ti wali pëpe.”