Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Job 9:1-35

LI TI ATËNË NI

  • Kiringo tënë ti Job (1-35)

    • Zo ti sese apeut ti lingbi terê na Nzapa ape (2-4)

    • ‘Nzapa asara ye so zo alingbi ti gi ndani ape’ (10)

    • Zo alingbi ti dë gaba na Nzapa ape (32)

9  Job akiri tënë, atene:   “Mbi hinga so a yeke tongaso biani. Me zo ti sese alingbi ti duti na raison tongana lo na Nzapa ayeke na ngbanga?+   Tongana mbeni zo aye ti dë gaba na Nzapa,*+ na Nzapa ahunda lo na atënë saki oko, lo lingbi même pëpe ti kiri tënë na mbeni oko.   Nzapa ayeke na ndara* nga lo yeke na ngangu mingi.+ Zo wa la alingbi ti sara kpengba-li na Nzapa na lo wara sioni ape?+   Lo changé place ti* ahoto sân ti tene zo ahinga; na yâ ti ngonzo ti lo, lo kinda ahoto ni.   Lo sara si sese ayengi na angbâ na place ni pëpe, na apilier ni adö.+   Lo mû yanga na lâ ti tene lo su pëpe, nga lo kanga lege ti lumière ti atongoro;+   lo oko lo gbara yâ ti yayu,+ nga lo tambela na ndö ti amapo ti ngu-ingo so alondo mingi.+   lo sara abungbi ti atongoro tongana Ash,* Késil,*+ Kimah* nga na ala so ayeke na mbage ti sud;* 10  lo sara akota ye mingi so a lingbi ti gi ndani pëpe,+ aye ti dongo bê so a lingbi ti diko wungo ni pëpe.+ 11  Lo hon nduru na mbi, me mbi bâ lo pëpe, lo hon mbi hongo, me mbi hinga mbi tene a yeke lo pëpe. 12  Tongana lo mû ye na ngangu, zo wa la alingbi ti ke na lo? Zo wa la alingbi ti tene na lo: ‘Nyen la mo yeke sara so?’+ 13  Nzapa ayeke kanga ngonzo ti lo pëpe;+ même azo ti mungo maboko na Rahab*+ ayeke kuku na gbe ti lo. 14  So ye ni ayeke tongaso, a lingbi mbi soro yâ ti tënë ti mbi nzoni tongana mbi ye ti kiri tënë na lo. 15  Même tongana mbi yeke na raison, mbi yeke kiri tënë na lo pëpe.+ Ye so mbi lingbi ti sara ayeke gï ti toto na juge ti mbi* ti sara nzoni bê na mbi. 16  Tongana mbi dekongo na lo, lo yeke kiri tënë na mbi? Mbi pensé lo yeke mä go ti mbi pëpe; 17  ndali ti so lo sara si kota pupu aneka mbi nga lo zia akä gbani gbani na terê ti mbi senge senge.+ 18  Lo zia nga mbi ti wu pupu pëpe, lo ngbâ gï ti zia aye so ason mingi na ndö ti mbi. 19  Tongana a yeke tënë ti ngangu, lo la lo yeke ngangu.+ Tongana a yeke tënë ti fango ngbanga, lo tene: ‘Zo wa la alingbi ti hunda mbi ti kiri tënë ndali ti ye so mbi sara?’* 20  Tongana fade mbi la mbi yeke na raison, yanga ti mbi wani ayeke fâ ngbanga na li ti mbi; même tongana mbi ngbâ ti sara ye lakue mbilimbili,* lo yeke tene so tënë ayeke na li ti mbi.* 21  Même tongana mbi ngbâ ti sara ye lakue mbilimbili,* mbi yeke na confiance na mbi wani pëpe;* mbi ke* fini ti mbi. 22  Ye ni kue ayeke gï oko. Ndani la mbi tene: ‘Azo so tënë ayeke na li ti ala pëpe* nga na azo ti sioni, lo futi ala futingo.’ 23  Tongana ngu asuku gï hio tongaso si afâ azo, lo yeke he dema ti azo so tënë ayeke na li ti ala pëpe. 24  A zia sese na maboko ti azo ti sioni;+ lo kanga lê* ti ajuge ti sese. Tongana a yeke lo pëpe, ka a yeke zo wa? 25  Fadeso lango ti mbi ahon hio mingi ahon zo ti mungo loro;+ a hon hio, me mbi bâ nzoni dä pëpe. 26  A kpe tongana ngö so a sara ni na sosongo, a kpe tongana a-aigle so adescend na loro ti gbu nyama ti ala ti tengo ni. 27  Tongana mbi tene: ‘Mbi yeke zia ti dema terê, mbi yeke sara si lê ti mbi ayeke na vundu mbeni pëpe me a yeke duti na ngia,’ 28  mbeto ayeke ngbâ ti sara mbi ndali ti apasi kue so mbi bâ;+ na mbi hinga so mo yeke tene so tënë ayeke na li ti mbi. 29  A yeke tene so tënë ayeke na li ti mbi.* Tongaso, ndani nyen ti buba ngangu ti mbi senge senge?+ 30  Tongana mbi sukula terê ti mbi na neige so aga ngu, na mbi sukula maboko ti mbi na mokpakpa,*+ 31  mo yeke yôro mbi na yâ ti dû, si même bongo ti mbi ayeke ke mbi bê oko. 32  Teti Nzapa ayeke zo tongana mbi pëpe si mbi lingbi ti kiri tënë na lo, si mbi na lo e lingbi ti gue na gbele ngbanga.+ 33  Mbeni zo so alingbi ti fâ yâ ti tënë* na popo ti mbi na lo, mbeni zo so alingbi ti duti juge ti e,* ayeke dä pëpe. 34  Tongana fade lo zia ti pika mbi,* nga lo zia si mbeto ti lo ahon ndö ti mbi pëpe,+ 35  ka mbi yeke sara tënë na lo sân mbeto, ndali ti so mbi ye ti mbi ti sara tënë na yâ ti mbeto pëpe.

Kete tënë

Wala “ti gue na Nzapa na ngbanga.”
Na Hébreu: “Nzapa ayeke na ndara na yâ ti bê ti lo.”
Wala “Lo zi.”
Peut-être groupe ti atongoro so a iri ni Kota Ours.
Peut-être groupe ti atongoro so a iri ni Orion.
Peut-être groupe ti atongoro so a iri ni aPléiade so ayeke na yâ ti mbeni groupe ni so a iri ni Taurus.
Na Hébreu: “achambre so ayeke na mbage ti sud.” Azo apensé so a ye ti sara tënë ti abungbi ti atongoro so ayeke na gbe ti équateur.
Peut-être mbeni kota nyama ti ngu.
A lingbi nga ti tene “zo so ague na mbi na ngbanga.”
Na Hébreu: “iri mbi ti hunda mbi?”
Wala “même tongana tënë ayeke na li ti mbi pëpe.”
Na Hébreu: “so mbi yeke zo ti kirikiri.”
Wala “Même tongana tënë ayeke na li ti mbi pëpe.”
Wala “mbi hinga âme ti mbi wani pëpe.”
Wala “na bê ti mbi oko, mbi ke.”
Wala “Azo so ayeke sara ye mbilimbili.”
Na Hébreu: “face.”
Na Hébreu: “so mbi yeke zo ti sioni.”
Wala “soude.”
Wala “walekengo-songo.”
Na Hébreu: “ti zia maboko ti lo na ndö ti e use kue.”
Na Hébreu: “zi keke ti lo na terê ti mbi.”