Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Job 6:1-30

LI TI ATËNË NI

  • Kiringo tënë ti Job (1-30)

    • Lo tene so dema ti lo ayeke na lege ni (2-6)

    • Azo so aga ti dë bê ti lo asara ye na handa (15-18)

    • “Tënë so ayeke na lege ni ason bê ti zo ape” (25)

6  Job akiri tënë, atene:   “Tâ tongana a hinga fade nengo ti pasi+ ti mbi kue, na a zia ni na ndö ti kilo legeoko na aye ti vundu ti mbi, ka a yeke nzoni!   Fadeso pasi ti mbi ane mingi ahon mbutu ti angu-ingo, ni la mbi diko tënë gï kirikiri*+ so.   Alê ti kokora ti Lo so ngangu ti lo ahon angangu kue alï yâ ti terê ti mbi, na mbi nyon poison ti alê ti kokora ni;+ aye ti mungo mbeto so alondo na Nzapa aleke terê ti ala ti sara sioni na mbi.   Tongana kororo ti ngonda+ ayeke na pere ti te, lo yeke toto? Wala tongana koli-bagara ayeke na kobe ti te, lo yeke toto?   Kobe so anzere pëpe, zo ayeke te ni sân ingo? Wala ngu ti mbeni keke so ayeke dongo dongo* anzere?   Mbi ke* ti ndu mara ti aye tongaso. A yeke sara si kobe ti mbi abuba.   Tongana mbi wara fade ye so mbi hunda, nga tongana Nzapa amû na mbi ye so mbi ye, ka a yeke nzoni!   Tongana fade Nzapa ayeda ti neka yâ ti mbi, si lo yôro maboko ti lo lo fâ mbi, ka a yeke nzoni!+ 10  A lingbi même ti sara si bê ti mbi adë; mbi lingbi ti sara ngia atâa ngangu pasi so mbi yeke lakue na yâ ni, teti mbi ke pëpe atënë ti Nzapa so ayeke nzoni-kue.+ 11  Mbi yeke na ngangu ti ngbâ ti ku?+ Nyen la ayeke ku mbi nyen, si a yeke nzoni mbi ngbâ na fini?* 12  Ngangu ti mbi ayeke tongana ti kota tênë? Wala nyama ti terê ti mbi ayeke tongana cuivre? 13  Mbeni lege ti tene mbi mû maboko na mbi wani ayeke dä? so aye ni kue so alingbi ti mû maboko na mbi ahon awe so. 14  Zo kue so ayeke na tâ ndoye na mbage ti mba ti lo pëpe,+ lo yeke zia ti kpe mbeto ti Lo so ngangu ti lo ahon angangu kue.+ 15  Aita ti mbi wani asara ye na handa+ tongana ngu so asuku na ngoi ni, tongana ngu so ahule tongana ngoi ni ahon. 16  Ngu ni avuko ndali ti glace so ayeke na yâ ni, nga aneige so aga ngu ayeke na yâ ni. 17  Me na ngoi ti ndowa, ngu ni ayeke dä pëpe; na ngoi so lâ asu mingi, ngu ni ahule. 18  Ngu ni azia ndo so lo yeke sua ka dä; a sua na yâ ti désert na a yeke dä encore ape. 19  Azo ti Téma+ so ayeke tambela na ndö ti anyama ti ala agi ngu, nga azo so alondo na Séba*+ aku ti wara ngu so. 20  Kamene asara azo ni ndali ti so ala zia bê ti ala na ndö ti ngu ni; ala si kâ me ala wara ngu pëpe. 21  Ala yeke tongaso na lê ti mbi;+ ala bâ aye ti ngangu so asi na mbi, na mbeto agbu ala.+ 22  Mbi hunda ala, mbi tene: ‘Ala mû na mbi mbeni ye’? Wala mbi hunda ala ti mû na mbi mbeni ye ti mosoro ti ala tongana matabisi? 23  Mbi hunda ti tene a zi mbi na maboko ti wato? Mbi hunda ti tene ala sö* mbi na maboko ti azo so ayeke sara ye ti ngangu na mbi? 24  Fa ye na mbi, na mbi yeke duti kpô;+ mû maboko na mbi ti hinga faute ti mbi. 25  Tënë so ayeke na lege ni ason bê ti zo pëpe;+ me nzoni ti nyen la mbi yeke wara na yâ ti atënë so ala tene ti suku na mbi?+ 26  Ala leke na mayele ti kasa atënë ti mbi? atënë ti yanga ti mbeni zo so bê ti lo anze kue,+ so pupu ahon na ni. 27  Ala sara nga mbeni ye ti soro nyindu+ ti bâ wala lo yeke ga ti zo wa, nga ala kä* kamarade ti ala wani!+ 28  Fadeso, ala tourné ala bâ mbi si, ndali ti so mbi yeke tene mvene na lê ti ala pëpe. 29  Pardon, ala kiri ala gbu li ti ala si; ala fâ ngbanga ti kirikiri na ndö ti mbi pëpe; ala kiri ala gbu li ti ala si, ndali ti so mbilimbili ti mbi angbâ na place ni. 30  Tënë ti kirikiri asigi na yanga ti mbi? Mbi lingbi pëpe ti hinga ngangu kpale ti mbi?

Kete tënë

Wala “mbi zi yanga hio hio, sân ti pensé na ndö ti ye ti peko ni.”
Wala “vuru ngu ti yâ ti para.”
Wala “Âme ti mbi ake.”
Wala “si mbi gboto yâ ti fini (âme) ti mbi.”
Wala “groupe ti azo ti Saba so ayeke gue na ando nde nde.”
Na Hébreu: “sara mbeni ye ti zi.”
Wala “sara ngere ti.”