Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Job 42:1-17

LI TI ATËNË NI

  • Job akiri tënë na Jéhovah (1-6)

  • Nzapa asara ngonzo na terê ti akamarade ti Job ota so (7-9)

  • Jéhovah akiri na aye ti Job na Job (10-17)

    • Amolenge ti Job ti koli na ti wali (13-15)

42  Tongaso Job akiri tënë na Jéhovah, atene:   “Fadeso, mbi hinga so mo lingbi ti sara ye kue, nga mbeni ye so mo pensé ti sara si akara mo ayeke dä pëpe.+   Mo tene: ‘Zo wa la ayeke sara si zo abâ polele pëpe ye so mbi leke ti sara so?’+ Ni la, mbi sara tënë, me mbi hinga li ti mbi na tënë so mbi tene so pëpe; mbi sara tënë na ndö ti aye so ahon gbungo li ti mbi, aye so mbi hinga ni pëpe.+   Mo tene: ‘Pardon, mo mä mbi, na mbi yeke sara tënë. Mbi yeke hunda mo, na mo yeke fa na mbi.’+   Mbi mä tënë ti mo lani mango na mê ti mbi, me fadeso mbi bâ mo na lê ti mbi.   Ndani la mbi zia tënë so mbi tene kozo so awe,+ na mbi changé bê ti mbi na dutingo na yâ ti fuku ti sese nga na mburu ti wâ.”+  Tongana Jéhovah atene atënë so na Job awe, Jéhovah atene na Éliphaz, zo ti Théman, lo tene: “Ngonzo asara mbi ngangu na terê ti mo na akamarade ti mo use,+ ndali ti so ala tene tâ tënë na ndö ti mbi pëpe,+ tongana ti so wakua ti mbi Job asara.  Fadeso, ala mû akoli-bagara mbasambala na akoli-taba mbasambala, ala gue na ni na wakua ti mbi Job, ala mû ni na sandaga so a zö ni agbi kue ngbanga ti ala wani. Wakua ti mbi Job ayeke sambela ndali ti ala.+ Tongana lo hunda na mbi ti sara ye na ala alingbi na buba ti ala pëpe, mbi yeke mä tâ lo,* ndali ti so ala tene tâ tënë na ndö ti mbi pëpe, tongana ti so wakua ti mbi Job asara.”  Tongaso Éliphaz, zo ti Théman, Bildad, zo ti mara ti Shuah, na Zophar, zo ti Naama ague, ala sara ye so Jéhovah atene na ala ti sara. Na Jéhovah ayeda na sambela ti Job. 10  Tongana Job asambela ndali ti akamarade ti lo+ awe, Jéhovah azi pasi+ ti Job na lo kiri na lo mosoro ti lo.* Ye so lo yeke na ni kozo,+ Jéhovah akiri na ni na lo fani use. 11  Aita ti lo kue ti koli na ti wali nga na angbene kamarade ti lo+ kue aga na ndo ti lo, lo na ala ate kobe na yâ ti da ti lo. Ala kangbi vundu na lo nga ala dë bê ti lo na peko ti aye ti ngangu kue so Jéhovah azia si aga na ndö ti lo. Zo oko oko amû na lo mbeni nginza nga na bague ti lor. 12  Tongaso, Jéhovah airi tënë nzoni na ndö ti atanga ti ngu ti Job ahon même ati kozoni;+ lo yeke na ataba 14 000, achameau 6 000, abagara so ayeke yô joug 2 000 nga na amama ti kororo 1 000.+ 13  Lo kiri lo dü nga amolenge-koli mbasambala na amolenge-wali ota.+ 14  Kozo molenge-wali ni, lo zia iri ti lo Jémimah, ti use ni ayeke Kéziah na ti ota ni ayeke Keren-Happuk. 15  Na yâ ti kodro ni, mbeni wali so ayeke pendere tongana amolenge ti Job ayeke dä pëpe; na babâ ti ala amû na ala mbeni héritage, tongana ti aita ti ala ti koli. 16  Na peko ti aye so, Job angbâ na fini ngu 140, lo bâ amolenge ti lo, a-âta ti lo, amolenge ti a-âta ti lo nga na a-âta ti a-âta ti lo. 17  Job akui na peko ti so lo te gigi alingbi na lo.*

Kete tënë

Na Hébreu: “mbi yeke yô ande tâ lê ti lo na nduzu.”
Na Hébreu: “Jéhovah azi Job na yâ ti kanga ti lo ni.”
Na Hébreu: “lo ga mbakoro nga lo te gigi.”