Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Job 41:1-34

LI TI ATËNË NI

  • Nzapa asara tënë na ndö ti Léviathan, nyama so apika bê (1-34)

41  “Mo lingbi ti gbu Léviathan*+ na lê ti yango? Wala ti kanga yanga ti lo na kamba?   Mo lingbi ti yôro kamba* na hôn ti lo? Wala ti kôro bio ti ngbangba ti lo na lê ti yango?*   Lo yeke voro yanga na mo? Wala lo yeke sara tënë na mo yeke?   Lo yeke te mbele na mo si mo sara si lo ga ngbâa ti mo na yâ ti fini ti lo kue?   Mo yeke sara ngia na lo tongana ti so zo asara ngia na ndeke? Wala mo yeke kanga kamba na go ti lo si lo zia ngia na bê ti amolenge ti mo ti wali?   Azo ti dengo buze ayeke gi ti sara ngere ti lo? Azo so agbu lo ayeke kangbi yâ ti lo na popo ti azo ti dengo buze?   Mo lingbi ti kpo poro ti terê ti lo na likongo+ wala li ti lo na likongo ti kpongo na susu?   Zia maboko ti mo na ndö ti lo mo bâ! Bira so lo yeke sara na mo, mo yeke girisa ni pëpe, na mo yeke kiri ti sara ni lâ oko pëpe.   Azo agi gbä ti sara si lo woko terê ti lo na ala. Gï senge bango lo ayeke sara si mo woko kue.* 10  Zo alingbi pëpe ti sara mvene ti sara si lo londo. Tongaso, zo wa la alingbi ti luti na gbele mbi?+ 11  Zo wa la amû ye na mbi kozo, si mbi doit ti kiri na ni na lo?+ Ye kue so ayeke na gbe ti yayu ayeke ti mbi.+ 12  Mbi yeke zi yanga ti sara tënë na ndö ti aye ti terê ti lo, na ndö ti ngangu ti lo nga na terê ti lo so ayeke pendere mingi. 13  Zo wa la alingbi ti zi poro ti terê ti lo? Zo wa la ayeke lï na yâ ti yanga ti lo so lo zi ni? 14  Zo wa la akpa ti zi yâ ti yanga ti lo na ngangu? Pembe ti lo kue amû mbeto na zo. 15  Peko ti lo ayeke gï molongo ti a-écaille;* a gbu terê ngangu. 16  Ala oko oko kue agbu terê ngangu, a sara si pupu alingbi ti hon na popo ni pëpe. 17  Ala gbu terê na popo ti ala; ala gbu terê ngangu na zo alingbi ti zi yâ ni pëpe. 18  Tongana lo ngasi, lumière aza; lê ti lo ayeke tongana lumière ti lâ ti kota ndapre. 19  Wâ ti bekpa asigi na yanga ti lo; akete kete wâ asigi dä. 20  Gbâ ti guru asigi na hôn ti lo tongana wâ ti four so a tingo ni na ngala. 21  Pupu ti yanga ti lo asara si charbon amû wâ, nga wâ asigi na yanga ti lo. 22  Kota ngangu ayeke na yâ ti peko ti go ti lo, mbeto amû ndo na devant ti lo. 23  Poro ti yâ ti lo agbu terê ngangu; a gbu terê ti lo tongana wen, na a lingbi ti yengi ni pëpe. 24  Bê ti lo akpengba tongana tênë, a kpengba tongana tênë ti nekango na ye. 25  Tongana lo londo, mbeto ayeke gbu même awangangu; sarango damba ti lo asara si li ti zo aga kirikiri. 26  Épée so akpo lo ayeke sara ye oko na lo pëpe; likongo, kete likongo na lê ti kokora nga kue asara ye oko na lo pëpe.+ 27  Lo bâ wen tongana saleté ti peko ti alê ti kobe, lo bâ cuivre tongana keke so afun awe. 28  Lo bâ kokora lo kpe pëpe; tênë so a bi ni ti tene a mû lo aga gï hulengo pere. 29  Lo bâ nduru keke ti pikango na zo tongana hulengo pere; nga lo he toto ti kota likongo hengo. 30  Poro ti yâ ti lo ayeke tongana fango ta so yanga ni aza; lo gbara terê ti lo na yâ ti popoto tongana keke so abagara agboto ni ti pika na alê ti kobe.+ 31  Lo sara si ngu so alï akporo mo bâ mo tene a yeke na yâ ti tawa; lo sara si ngu-ingo alondo tongana ta so a yeke sara mafuta na yâ ni. 32  A yeke bâ mousse na place ti ndo so lo hon dä, zo ayeke pensé so ngu so alï ayeke na vuru kuä ti li. 33  Mbeni nyama tongana lo na ndö ti sese ayeke dä pëpe, a sara lo ti tene lo sara mbeto pëpe. 34  Lê ti lo abe na terê ti nyama kue so abâ so lo yeke na ngangu. Lo yeke gbia na ndö ti angangu nyama kue ti ngonda.”

Kete tënë

Peut-être ngunde.
Na Hébreu: “ngala.”
Na Hébreu: “mbeni kî.”
Wala “ayeke bi mo na sese na ngangu.”
A lingbi nga ti tene “Ye ti lo so lo yeke pika na kate ayeke molongo ti a-écaille ti lo.”