Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Job 4:1-21

LI TI ATËNË NI

  • Kozo tënë ti Éliphaz (1-21)

    • Lo he sarango ye ti mbilimbili ti Job (7, 8)

    • Lo tene tënë ni alondo na mbeni yingo (12-17)

    • ‘Nzapa azia bê ti lo na awakua ti lo ape’ (18)

4  Éliphaz,+ zo ti Théman, atene na lo:   “Tongana mbeni zo agi ti sara tënë na mo, bê ti mo ayeke son? Zo wa la alingbi ti kanga yanga ti lo si lo sara tënë ape?   Ti tâ tënë ni, mo mû wango na azo mingi,na mo kpengba azo so maboko ti ala awoko.   Tënë ti yanga ti mo amû ngangu na azo so aye ti tï,na mo kpengba azo so gere ti ala awoko.   Me fadeso, ye ti ngangu asi na mo, na mo hinga ye ti sara pëpe;*ye ni asi na mo, na li ti mo akpe kue.   So mo kpe mbeto ti Nzapa, mo yeke na confiance ape? So mo sara ye mbilimbili,+ mo yeke na beku ape?   Pardon, dabe ti mo na tënë so: A futi lâ oko awe zo so tënë ayeke na li ti lo ape? A futi lâ oko awe zo so asara ye mbilimbili?   Ye so mbi bâ ni ayeke so azo so aleke ti sara* ye ti sioninga na azo so ayeke bi kpale ayeke wara gï oko mara ti ye ni.   Pupu ti yanga ti Nzapa asara si ala kui,na ngonzo ti Nzapa so lo tuku na ndö ti ala asara si ala hunzi. 10  Bamara ayeke toto, na bamara so akono awe ayeke toto,me même pembe ti angangu bamara* ayeke fâ. 11  Bamara akui ndali ti so lo wara nyama ti tengo ni pëpe,na yâ ti amolenge ti bamara ni akangbi kirikiri. 12  Mbeni tënë atï na mê ti mbi na hondengo ni;a tene tënë ni yeke na mê ti mbi. 13  Atënë ti gingo bê aga na yâ ti li ti mbi na yâ ti avision na bï,na ngoi so azo atï na kota lango, 14  a sara si terê ti mbi adö ngangu mingi,nga mbeto alï mbi juska na yâ ti bio ti mbi kue. 15  Mbeni yingo ahon na gbele mbi;kuä ti terê ti mbi alondo. 16  Fadeso yingo ni aluti kpô,me mbi bâ lo nzoni pëpe;mbeni ye aluti na devant ti mbi;ndo adë ngii, na pekoni mbi mä mbeni go atene: 17  ‘Senge zo ayeke mbilimbili ahon Nzapa? Bê ti mbeni zo alingbi ti vuru ahon ti Zo so asara lo?’ 18  Bâ, lo zia bê ti lo na awakua ti lo pëpe,na lo bâ afaute ti a-ange* ti lo. 19  Si âdu ti azo so ayeke lango na yâ ti da so a leke na popoto,ala so gunda ti ala ayeke na yâ ti fuku ti sese,+so hio tongaso a yeke neka yâ ti ala tongana makongo ti tengo bongo. 20  Ti londo na ndapre ti si na lakui, a neka yâ ti ala kue;ti ala ahunzi biani biani, na zo oko azia bê ti lo dä pëpe. 21  Ala yeke tongana tente so a zi kamba ni awe. Ala kui, na ndara ayeke na yâ ti ala pëpe.

Kete tënë

Na Hébreu: “na mo woko kue.”
Na Hébreu: “adë yaka ti.”
Wala “koli-bamara so akono awe.”
Wala “awatokua.”