Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Job 38:1-41

LI TI ATËNË NI

  • Jéhovah afa na Job so zo ayeke kete mingi (1-41)

    • ‘Mo yeke lani na ndo wa na ngoi so a sara sese?’ (4-6)

    • Amolenge ti Nzapa adekongo ti sepela Nzapa (7)

    • Nzapa ahunda Job na ndö ti ngangu so sese ayeke na ni (8-32)

    • ‘Andia ayeke fa lege na aye so ayeke na yayu’ (33)

38  Na pekoni, Jéhovah asara tënë na Job na yâ ti kota pupu,+ lo tene:   “Zo wa la ayeke sara si zo abâ polele pëpe ye so mbi leke ti sara so? Nga lo sara tënë sân ti hinga ye so?+   Pardon, leke terê ti mo tongana koli; mbi yeke hunda mo, na mo yeke fa na mbi.   Mo yeke lani na ndo wa na ngoi so mbi zia gere ti sese?+ Tongana mo bâ so mo hinga ni, tene na mbi.   Mo hinga zo so afa amesure ni? Wala mo hinga zo so agboto kamba na ndö ni ti mû mesure ni?   A lu gere ti sese na ndö ti nyen? Wala zo wa la azia kozo tênë ti gere ni?+   Na ngoi so lani atongoro ti ndapre+ adekongo na ngia legeoko, nga amolenge ti Nzapa*+ kue ato nda ti dekongo ti sepela lo.   Nga, zo wa la azia barrière+ ti kanga lege na ngu-ingo zo wa, na ngoi so ngu-ingo ato nda ti sua na ngangu mo bâ mo tene lo sigi na yâ ti mama ti lo?   na tango so mbi zia mbinda na terê ni tongana bongo na mbi roulé bingo so avuko ngangu na terê ni; 10  na tango so mbi zia mbeni ye ti kanga lege na lo si mbi zia abarre nga na porte na terê ti lo;+ 11  na mbi tene: ‘Mo lingbi ti ga juska ge, me mo hon ni pëpe, amapo ti mo so asara baba so ayeke ngbâ ande gï ge.’+ 12  A si awe so* mo mû yanga ti tene ndapre aduti dä? Wala a si awe so mo sara si kota ndapre ahinga place ti lo?+ 13  si lo gbu agunda ti sese na lo yengi ni ti tene azo ti sioni asigi dä?+ 14  Sese achangé akpa popoto so a kpo cachet na ndö ni, nga apendere ye ti lo asigi polele tongana apendere ye so ayeke na terê ti bongo. 15  Me a gbanzi azo ti sioni na lumière, nga a kungbi maboko ti ala so ala yôro ni na nduzu. 16  Mo gue juska mo si na li ti ngu-ingo awe? Wala mo fono na gbe ti ngu so alï ti bâ ni awe?+ 17  A fa na mo ayanga ti gbagba ti kuâ+ awe? Wala mo bâ ayanga ti gbagba ti kota bingo* awe?+ 18  Mo hinga ye nzoni na ndö ti konongo ti lê ti sese?+ Tongana mo hinga ye so kue, tene na mbi. 19  Lumière alango na mbage wa?+ Ndo so bingo aduti dä ayeke na ndo wa, 20  si mo lingbi ti mû lo ti gue na lo na ndo ti lo na mo hinga lege ti yanga-da ti lo? 21  A dü mo awe si aye ni so abâ gigi si mo hinga ni? Wala mo hinga ni ndali ti so ngu* ti mo ayeke mingi mingi? 22  Mo lï na yâ ti agogoro ti neige+ awe? wala mo bâ agogoro ti akota glason+ awe? 23  so mbi bata ni ndali ti ngoi ti ye ti vundu nga ndali ti ngoi ti tiri nga na ti bira.+ 24  Lumière* alondo na ndo wa si ayeke za na ando nde nde so? Nga pupu ti mbage ti est alondo na ndo wa si ayeke ya na ndö ti sese so?+ 25  Zo wa la aleke lege ti tene ngu-nzapa apika si asuku ahon dä nga lo leke lege ndali ti mbinda ti ngu-nzapa so apika na sungbango ni?+ 26  ti tene a pika na ndo so zo asara kodro dä pëpe, na yâ ti benyama, ndo so zo oko ayeke dä pëpe,+ 27  ti sara si ndo so ayeke benyama anyon ngu nzoni nga a sara si apere asigi?+ 28  Babâ ti ngu-nzapa ayeke dä?+ Wala zo wa la adü ngu ti pere?+ 29  Wali wa la glace asigi na yâ ti lo? Zo wa la adü akete kete glason ti yayu?+ 30  Na ngoi so lê ti ngu akpengba tongana tênë, nga lê ti ngu so alï akpengba aga glace.+ 31  Mo peut ti tingbi atongoro ti yâ ti Kima* si ala ngbâ ndo oko? Wala mo peut ti zi akamba ti atongoro ti yâ ti Késil*+ si yâ ti ala akangbi? 32  Mo peut ti sigi na mbeni groupe ti atongoro* tongana ngoi ti ala asi? Wala mo peut ti fa lege na groupe ti atongoro ti yâ ti Ash, legeoko na amolenge ti lo? 33  Mo hinga andia so ayeke fa lege na aye so ayeke na yayu?+ Wala mo lingbi ti gbu sese na ngangu ti kpe andia so?* 34  Mo peut ti dekongo na ambinda ti tene ala sara si kota ngu-nzapa atï na ndö ti mo?+ 35  Mo peut ti tokua awâ ti bekpa? Ala yeke ga ande ti tene na mo: ‘E la’? 36  Zo wa la amû ndara na ambinda?*+ Wala zo wa la amû hingango ndo na aye so ayeke passé na lê ti nduzu?*+ 37  Zo wa la ndara ti lo alingbi ti sara si lo diko ambinda? Wala zo wa la apeut ti tourné yanga ti ata ti ngu so ayeke na nduzu si atuku?+ 38  na ngoi so fuku ti sese aga popoto, nga sese agbu terê na mbeni sese? 39  Mo peut ti gi nyama ti ga na ni na bamara wala ti kaï nzara ti abamara so akono awe+ 40  na ngoi so ala lango na ndo ti hondengo terê ti ala, wala na ndo so ala honde terê ti ala dä ti gbu ye? 41  Zo wa la ayeke leke kobe na corbeau+ na ngoi so amolenge ti lo atoto na Nzapa ti mû ye na ala nga ala fono kirikiri ngbanga ti so ye ti tengo ni ayeke dä ape?

Kete tënë

Wala “a-ange.”
Na Hébreu: “A si so na yâ ti gigi ti mo.”
Wala “gbe ti dê ti kuâ.”
Na Hébreu: “alango.”
A lingbi nga ti tene “Wâ ti bekpa.”
Peut-être groupe ti atongoro so a iri ni aPléiade so ayeke na yâ ti mbeni groupe ni so a iri ni Taurus.
Peut-être groupe ti atongoro so a iri ni Orion.
Na Hébreu: “Mazzaroth.”
A lingbi nga ti tene “andia ti Lo?”
A lingbi nga ti tene “na zo?”
A lingbi nga ti tene “a yôro hingango ndo na yâ ti li ti lo?”