Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Job 34:1-37

LI TI ATËNË NI

  • Élihu afa so Nzapa la ayeke mbilimbili nga lo sara ye lakue nzoni (1-37)

    • Job atene so Nzapa ake ti fâ yâ ti ngbanga ti lo mbilimbili (5)

    • Tâ Nzapa asara ye ti sioni lâ oko ape (10)

    • Hingango ye amanke Job (35)

34  Tongaso Élihu angbâ ti sara tënë, lo tene:   “Ala mä mbi si, ala so ayeke na ndara so; ala mä mbi si, ala so ahinga ye mingi so.   Mê ayeke tara tënë, tongana ti so langue* ayeke tara kobe.   Zia e wani e gi ti bâ ye wa ayeke na lege ni; zia e wani e mû desizion na ndö ti ye so ayeke nzoni,   ndali ti so Job atene: ‘Mbi la mbi yeke na raison,+ me Nzapa ake ti tene a fâ yâ ti ngbanga ti mbi mbilimbili.+   Mbi yeke tene mvene na ndö ti ngbanga so a lingbi a fâ na ndö ti mbi? Atâa so mbi sara pëpe mbeni ye so ake ndia, kä ti mbi amü pëpe.’+   Mbeni zo tongana Job ayeke dä? lo so lo nyon hengo ndo tongana ti so zo anyon ngu so?   Lo sara songo na azo ti sarango sioni, lo sara kamarade na asioni zo.+   Lo tene: ‘Tongana zo atara ti nzere na lê ti Nzapa lo yeke wara ye ti nzoni dä pëpe.’+ 10  Tongaso, ala mä mbi si, ala so ahinga ndo* so: Tâ Nzapa alingbi lâ oko pëpe ti sara ye ti sioni,+ Lo so ngangu ti lo ahon angangu kue alingbi ti sara sioni pëpe.+ 11  Lo yeke futa zo alingbi na ye so zo ni asara,+ nga ye kue so zo asara, lo yeke wara ye ti peko ni. 12  Ti tâ tënë ni, Nzapa ayeke sara ye ti sioni pëpe,+ Lo so ngangu ti lo ahon angangu kue ayeke ba pëpe yâ ti ye so ayeke mbilimbili.+ 13  Zo wa la azia lo ti bâ lege ti sese? Nga zo wa la azia lo ti komande na ndö ti dunia kue?* 14  Tongana bê ti lo ayeke na ndö ti azo, tongana yingo nga na pupu so lo mû na ala akiri na lo,+ 15  azo* kue ayeke kui, nga azo kue ayeke kiri na fuku ti sese.+ 16  Tongaso, tongana mo mä yâ ti ye, dengi mê na tënë so; mo mä tënë so mbi yeke tene so nzoni. 17  A yeke nzoni ti tene zo so ake fango ngbanga ti mbilimbili akomande? Wala mo lingbi ti fâ ngbanga na ndö ti zo ti mbilimbili so ayeke na ngangu mingi? 18  Mo lingbi ti tene na mbeni gbia, mo tene: ‘Li ti mo ayeke dä ape’? Wala ti tene na akota zo, mo tene: ‘Ala yeke azo ti sioni’?+ 19  Mbeni Zo ayeke dä so amû mbage ti amokonzi pëpe, na so na lê ti lo zo ti mosoro ahon wayere pëpe,*+ ndali ti so ala kue ayeke kusala ti maboko ti lo.+ 20  Ala lingbi ti kui gï hio tongaso,+ na bê ti bï;+ terê ti ala adö ngangu na ala kui; même a zi azo so ayeke ngangu mingi, me zo la azi ala pëpe.+ 21  Lê ti Nzapa ayeke bâ alege kue so zo ayeke tambela dä,+ na Lo yeke bâ atambela ti lo kue. 22  Vukongo ndo wala kota bingo ayeke dä pëpe si azo ti sioni alingbi ti honde terê ti ala dä.+ 23  Nzapa asoro pëpe mbeni mbilimbili ngoi ndali ti zo ti tene zo ni asi na gbele ngbanga ti lo. 24  Lo kungbi yâ ti azo so ayeke ngangu mingi, lo yeke pëpe na bezoin ti gi ti hinga tënë na ndö ni, na lo zia ambeni zo na place ti ala.+ 25  So lo hinga ye so ala yeke sara,+ lo kinda ala na bï ni, nga lo dö yâ ti ala na gbe ti gere ti lo.+ 26  Lo pika ala ndali ti sioni ti ala, na mbeni ndo so zo kue alingbi ti bâ ala,+ 27  ndali ti so ala zia ti mû peko ti lo,+ na ala bi bê ti ala pëpe na alege ti lo;+ 28  ala sara si wayere atoto na lo, na lo mä toto ti azo so zo ti mungo maboko na ala ayeke dä pëpe.+ 29  Tongana Nzapa aduti kpô, zo wa la alingbi ti tene so lo sara faute? Tongana lo honde lê ti lo, zo wa la alingbi ti bâ lo? Atâa lo sara tongaso na mbeni mara wala na mbeni zo, ye ti peko ni ayeke gï oko, 30  si zo so akpe Nzapa pëpe* akomande pëpe,+ wala lo zia gbanda na lege ti azo pëpe. 31  Eskê mbeni zo alingbi ti tene tënë so na Nzapa? atene: ‘A punir mbi atâa so mbi sara faute pëpe.+ 32  Fa na mbi ye so mbi bâ pëpe; tongana mbi sara ye ti sioni, mbi yeke kiri ti sara ni pëpe.’ 33  A yeke nzoni lo futa mo tongana ti so mo ye tongana mo ke fango ngbanga so lo fâ? Desizion ni ayeke na mo, me na mbi pëpe. Tongaso, fa na mbi ye so mo hinga ni nzoni mingi so. 34  Azo so ahinga ndo* ayeke tene ande na mbi, zo ti ndara kue so ayeke mä mbi, ayeke tene: 35  ‘Job asara tënë, me lo hinga tënë so lo tene pëpe,+ na ndara ayeke na yâ ti tënë ti lo pëpe.’ 36  Zia si a tara Job* juska alingbi na ngangu ti lo ndali ti so kiringo tënë ti lo ayeke tongana ti azo ti sioni. 37  Lo zia kpengba-li na ndö ti siokpari ti lo;+ na hengo ndo, lo pika maboko ti lo na gbele e nga lo tene gbâ ti atënë na terê ti tâ Nzapa.”+

Kete tënë

Na Hébreu: “yâ ti yanga.”
Na Hébreu: “azo so ayeke na bê.”
Wala “sese so azo ayeke na ndö ni.”
Na Hébreu: “nyama ti terê.”
Wala “kota zo ti kodro ahon senge zo pëpe.”
Wala “mbeni apostat.”
Na Hébreu: “so ayeke na bê.”
A lingbi nga ti tene “Babâ, mbi ye si a tara Job.”