Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Job 30:1-31

LI TI ATËNË NI

  • Job afa fini dutingo ti lo (1-31)

    • Azo so li ti ala ayeke dä ape ayeke he lo (1-15)

    • Zo ti mungo maboko na lo ayeke dä ape (20, 21)

    • “Poro ti terê ti mbi avuko” (30)

30  “Fadeso, azo ayeke he mbi,+ akoli so ngu ti mbi ahon ti ala, na so mbi lingbi fade ti ke na ababâ ti ala ti duti na terê ti ambo so ayeke bata anyama ti mbi.   Nzoni ti nyen mbi wara na lege ti ngangu ti maboko ti ala? so ngangu ti ala ahunzi awe so.   Ngangu ti ala ahunzi ndali ti so ye amanke ala nga nzara asara ala; ala te kuru sese, sese so abuba na so ye oko ayeke dä pëpe.   Ala gi akeke ti ingo na popo ti akeke ti ngonda; kobe ti ala ayeke gunda ti keke ti genêt.   A tomba ala na popo ti azo;+ azo adekongo na li ti ala tongana ti zo ti nzi.   Ala lango na yâ ti apopo-hoto,* na yâ ti adû ti sese nga na adû ti tênë.   Ala yeke dekongo na popo ti akete keke ti ngonda; ala bungbi terê ti ala na yâ ti kete keke so kî ayeke na terê ni.   So ala yeke amolenge ti azo so ahinga ndo pëpe na azo so li ti ala ayeke dä pëpe, a tomba* ala na ndö ti sese ni.   Me fadeso, ala yeke he mbi même na yâ ti abia ti ala;+ mbi ga mbeni ye ti ngia* na lê ti ala.+ 10  Ala ke mbi ngangu na ala kpe mbi kpengo;+ mbeto asara ala pëpe ti tuku ngu ti yanga na lê ti mbi.+ 11  So Nzapa azi ye so amû ngangu na mbi* na lo sara si mbi ga kete, ye akanga lege na ala pëpe ti sara ye ti bê ti ala* na lê ti mbi. 12  Na mbage ti maboko ti mbi ti koli, gbâ ti ala alondo na terê ti mbi; ala zia loro na gere ti mbi, na ala zia aye so afuti zo ti kanga lege ti mbi. 13  Ala buba lege so mbi tambela dä; ala sara si kpale ti mbi akiri ahon ndö ni,+ na zo oko ti kanga lege* na ala ayeke dä pëpe. 14  Ala lï tongana ti so zo ayeke lï na lê ti kota dû so a kôro na terê ti gbagba; ala lï gï lingo na popo ti aye so abuba awe. 15  Mbeto ahon ndö ti mbi; nengo ti mbi ahon gï tongana pupu, na salut ti mbi ahon tongana mbinda. 16  Fadeso, fini* ti mbi ayeke zia mbi ziango;+ aye ti vundu+ ayeke si na mbi lâ na lâ. 17  Na bï, songo ti ye ate yâ ti abio ti mbi,*+ ye ni ate mbi ngangu, a kaï pëpe.+ 18  Mbeni ngangu ye asara si bongo ti mbi aga gbagbara ni;* a gbu go ti mbi ngangu tongana go ti bongo ti mbi. 19  Nzapa abi mbi na yâ ti popoto; mbi ga tongana fuku ti sese nga mburu ti wâ. 20  Mbi toto na mo ti wara maboko, me mo kiri tënë na mbi pëpe;+ mbi londo na nduzu, me mo yeke bâ mbi gï bango. 21  Mo changé mo ga zo ti sarango sioni na mbi;+ mo pika mbi na ngangu ti maboko ti mo kue. 22  Mo yô mbi na nduzu, mo sara si pupu ahon na mbi; na pekoni, mo sara si ngu-nzapa so apika na pupu ayengi mbi kirikiri.* 23  Mbi hinga so mo yeke gue na mbi na kuâ, mo yeke zia mbi na da so azo kue so ayeke na fini ayeke wara terê dä. 24  Me zo ayeke pika pëpe zo so ye ahon ndö ti lo awe+ si lo yeke toto ti wara maboko na yâ ti ye ti ngangu so asi na lo. 25  Azo so gigi akpengba na ala,* mbi toto ndali ti ala ape? Vundu asara mbi* ndali ti awayere ape?+ 26  Atâa so mbi ku ye ti nzoni, sioni la aga; mbi ku lumière, me bingo la aga. 27  Ye so ayeke kporo na yâ ti bê ti mbi akaï pëpe; mbi tingbi na aye ti vundu lâ na lâ. 28  Mbi tambela na kota vundu na bê,+ lumière aza pëpe; na popo ti gbâ ti azo, mbi londo mbi dekongo ti wara maboko. 29  Mbi ga ita ti ambo ti ngonda nga kamarade ti amolenge ti autruche*+ ti wali. 30  Poro ti terê ti mbi avuko na ayeke zi zingo,+ kobela asara si abio ti mbi ayeke gï wâ.* 31  A yeke pika harpe ti mbi gï na ngoi so azo ayeke toto kuâ, na a hûru flûte ti mbi gï na ngoi so azo ayeke toto.

Kete tënë

Na Hébreu: “a sara pasi na.”
Na Hébreu: “mbeni proverbe; tënë so amû yanga ti azo.”
Na Hébreu: “awoko yâ ti kamba ti kokora ti mbi.”
Wala “ala zi kamba so a kanga na yanga ti ala.”
A lingbi nga ti tene: “zo ti mû maboko.”
Wala “âme.”
Na Hébreu: “ye ayeke kôro yâ ti abio ti mbi.”
A lingbi nga ti tene “Songo ti pasi ti mbi asara si mbi kpa zo encore ape.”
A lingbi nga ti tene “mo bo mbi na sese na yâ ti mbi afâ kete kete.”
Wala “pasi ahon ndö ti ala.”
Wala “âme ti mbi.”
Wala “naamo,” mbeni kota ndeke.
A lingbi nga ti tene “fièvre asara abio ti mbi.”