Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Job 29:1-25

LI TI ATËNË NI

  • Job adabe ti lo na angoi ti ngia kozo si lo wara avundu (1-25)

    • Na yanga ti gbagba ti gbata, azo ane lo lani (7-10)

    • Aye ti mbilimbili so lo sara lani (11-17)

    • Azo kue ayeke mä lani awango ti lo (21-23)

29  Job angbâ ti gue na tënë,* lo tene:   “Tâ tongana mbi yeke fade na yâ ti anze so ahon, ka a yeke nzoni; na ngoi so Nzapa angbâ ti bâ ndo na ndö ti mbi,   na ngoi so lo sara si lampe ti lo aza na li ti mbi na mbi yeke tambela na yâ ti bingo grâce na lumière+ ti lo,   na ngoi so* mbi ngbâ tâ na ngangu ti mbi, nga Nzapa angbâ kota kamarade ti mbi na lo yeke na yâ ti tente ti mbi,+   na ngoi so Lo so ngangu ti lo ahon angangu kue angbâ na terê ti mbi nga amolenge* ti mbi kue ayeke na terê ti mbi,   na ngoi so mbi yeke bi gere ti mbi gï na yâ ti beurre nga mafuta asigi na yâ ti akota tênë asua ndali ti mbi.+   Na ngoi so mbi yeke gue na yanga ti gbagba ti gbata+ na mbi duti na ngende ti mbi na ndo so azo kue ayeke gue dä mingi,+   amaseka-koli abâ mbi na ala zia lege na mbi;* même ambakoro-koli alondo na ala ngbâ na nduzu.+   Amokonzi asara tënë pëpe, ala yeke zia maboko ti ala na yanga ti ala. 10  A mä go ti akota zo ti kodro pëpe, langue ti ala acollé na yâ ti yanga ti ala kâ. 11  Zo kue so amä mbi atene nzoni tënë ti mbi, nga azo so abâ mbi atene nzoni témoignage ti mbi, 12  ndali ti so mbi sö wayere so atoto ti hunda maboko,+ molenge so babâ ti lo ayeke dä pëpe nga na zo so mbeni zo ti mû maboko na lo ayeke dä pëpe.+ 13  Zo so aga nduru ti kui airi lani tufa na ndö ti mbi,+ nga mbi zia ngia na bê ti awali-mua.+ 14  Mbi yü mbilimbili tongana bongo. Mbilimbili ti mbi ayeke tongana yongoro bongo* nga tongana turban. 15  Mbi yeke lani lê ndali ti awaziba nga gere ndali ti awazin. 16  Mbi yeke lani babâ ndali ti awayere;+ azo so mbi hinga ala pëpe na so ague na gbele ngbanga,+ mbi gi ti hinga tënë ti ala nzoni. 17  Mbi kungbi bio ti ngbangba ti zo so asara sioni,+ nga ye so lo gbu na pembe ti lo, mbi zi ni na ngangu. 18  Mbi tene lani, mbi tene: ‘Mbi yeke kui ande na yâ ti da ti mbi wani,+ lango ti mbi ayeke duti gbani tongana mbutu. 19  Mbi yeke ga tongana keke so agunda ni ague juska na yâ ti ngu nga so ngu ti pere angbâ na ndö ti amaboko ni na bï kue. 20  A yeke mû na mbi gloire lakue lakue, na lakue mbi yeke pika kokora ti mbi.’ 21  Azo ayeke ku kungo ti mä tënë ti mbi, ala duti kpô ti ku wango ti mbi.+ 22  Na peko ti tënë ti mbi, ala yeke na mbeni tënë ti tene pëpe, tënë ti mbi atï yeke yeke* na mê ti ala. 23  Ala ku mbi tongana ti so azo ayeke ku ngu-nzapa, ala nyon tënë ti mbi nyongo tongana ti so sese anyon atanga ti ngu-nzapa.+ 24  Tongana mbi he ngia na ala, li ti ala akpe tâ kue; ngia so ala bâ na lê ti mbi asara si bê ti ala adë.* 25  So mbi yeke mokonzi ti ala, mbi fa lege na ala; dutingo ti mbi na popo ti ala ayeke tongana ti mbeni gbia na popo ti aturugu ti lo,+ nga tongana ti zo so ayeke dë bê ti azo so ayeke na vundu.+

Kete tënë

Na Hébreu: “proverbe.”
Na Hébreu: “na alango so.”
Wala “azo ti kua.”
Na Hébreu: “honde terê ti ala.”
Wala “kota bongo so maboko ni ayeke dä pëpe.”
Na Hébreu: “atuku oko oko.”
A lingbi nga ti tene “ala sara si lumière ti lê ti mbi avuko pëpe.”