Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Job 22:1-30

LI TI ATËNË NI

  • Ota tënë ti Éliphaz (1-30)

    • ‘Nzapa alingbi ti bâ nzoni na lege ti zo?’ (2, 3)

    • Lo tene so bê ti ye asara Job nga so lo fâ yâ ti ngbanga na lege ni ape (9)

    • ‘Kiri na Nzapa na mo yeke wara dutingo ti mo ti kozo’ (23)

22  Éliphaz,+ zo ti Théman, akiri tënë, atene:   “Nzapa ayeke na bezoin ti zo? Lo lingbi ti bâ nzoni na lege ti zo so ahinga ti bâ yâ ti aye nzoni?+   So mo yeke zo ti mbilimbili, tënë ni agbu bê ti* Lo so ngangu ti lo ahon angangu kue? So mo ngbâ lakue ti sara ye mbilimbili, lo wara mbeni ye na pekoni?+   Lo yeke punir mo? nga lo gue na mo na gbele ngbanga ndali ti so mo kpe mbeto ti lo?   A yeke ndali ti so sioni ti mo ayeke kota mingi ape? nga mo ngbâ ti sara afaute na ndö ti terê ape?+   Gï senge senge tongaso, mo mû ye ti aita ti mo na place ti bon, na mo mû bongo ti azo si ala ngbâ terê senge.*+   Mo ke ti mû ngu ti nyongo na zo so awoko, nga azo so nzara asara ala, mo gbanzi ala na kobe.+   Sese ni ayeke ti zo ti ngangu,+ na zo so azo ane lo mingi la asara kodro dä.   Mo tomba awali-mua maboko senge, na mo sara si ngangu ahunzi na amolenge so babâ ti ala ayeke dä pëpe.* 10  Ndani la akûkû*+ angoro terê ti mo kue, na aye ti mungo mbeto mingi na zo awara mo hio. 11  Ndani nga la ndo avuko mingi si mo bâ ndo pëpe, na gbâ ti ngu amene mo. 12  Nzapa ayeke kâ na yayu ape? Bâ tongana nyen atongoro kue ayeke yongoro kâ na lê ti nduzu. 13  Me mo tene: ‘Nyen la Nzapa ahinga nyen? Lo lingbi ti bâ ndo na yâ ti bingo so avuko ngangu ti fâ ngbanga? 14  Mbinda akanga lê ti lo si lo lingbi ti bâ ndo pëpe, na ngoi so lo yeke tambela gï tongaso na ndö ti cercle ti yayu kâ.’ 15  Mo yeke mû ngbene lege so azo ti sioni atambela dä lani so? 16  Azo so kuâ amû ala* kozoni si ngoi ti ala alingbi, so ala yeke tongana da so ngu so asuku* ahon na ni kue.+ 17  Ala yeke tene lani na tâ Nzapa, atene: ‘Zia e kpô!’ Nga ala tene: ‘Nyen la Lo so ngangu ti lo ahon angangu kue alingbi ti sara na e nyen?’ 18  Me Lo la Lo sara si da ti ala asi singo na anzoni ye. (Mbi yeke na mara ti sioni bibe ni so oko pëpe.) 19  Azo ti mbilimbili ayeke bâ ande futingo ti azo so, na ala yeke duti na ngia, nga azo so tënë ayeke na li ti ala pëpe ayeke he ala, atene: 20  ‘A futi awato ti e awe! Wâ ayeke gbi ande tanga ti ala.’ 21  Gi ti hinga Lo na mo yeke duti na siriri; na pekoni mo yeke wara anzoni ye. 22  Yeda na ndia so alondo na yanga ti lo, na bata tënë ti lo na bê+ ti mo. 23  Tongana mo kiri na mbage ti Lo so ngangu ti lo+ ahon angangu kue, mo yeke wara dutingo ti mo ti kozo; tongana mo zi ye ti kirikiri na yâ ti tente ti mo, 24  mo bi lor* ti mo na yâ ti fuku ti sese na mo bi lor ti Ophir+ na yâ ti adû ti apopo-hoto* so ayeke gï tênë, 25  Lo so ngangu ti lo ahon angangu kue ayeke ga ande lor* ti mo, na lo yeke ga argent ti mo so ayeke nzoni ahon atanga ni. 26  Mo yeke duti na ngia ndali ti Lo so ngangu ti lo ahon angangu kue, na mo yeke yô lê ti mo ti bâ ndo na mbage ti Nzapa. 27  Mo yeke toto na lo, na lo yeke mä mo; mo yeke sara ye ti peko ti azendo so mo mû. 28  Ye kue so mo leke ti sara ayeke ga nzoni, na lumière ayeke za na lege ti mo. 29  Nengo ti mo ayeke tï tongana mo sara tënë na fandara, me lo yeke sö zo so asara terê ti lo kete.* 30  Lo yeke zi azo so tënë ayeke na li ti ala pëpe; ni la, tongana maboko ti mo avuru, nyen na nyen a yeke zi mo.”

Kete tënë

Wala “anzere na.”
Na Hébreu: “zi bongo na terê ti azo so terê ti ala ayeke senge.”
Wala “anyindu.”
Na Hébreu: “akûkû ti gbungo andeke.”
Wala “agirisa fini ti ala hio.”
Na Hébreu: “kota ngu.”
Wala “fuku ti lor.”
Wala “fuku ti lor.”
Wala “zo so ayeke bâ ndo gï na sese.”