Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Job 20:1-29

LI TI ATËNË NI

  • Use tënë ti Zophar (1-29)

    • Lo tene Job ason bê ti lo na atënë ti lo (2, 3)

    • Lo tene so Job ayeke sioni zo (5)

    • Lo tene so sarango siokpari anzere na Job nzerengo (12, 13)

20  Zophar,+ zo ti Naama, akiri tënë, atene:   “Agingo bê so mbi yeke na ni apusu mbi ti kiri tënë, ndali ti so bê ti mbi ayeke kpô pëpe.   Mbi mä mbeni tënë so ason bê ti mbi; na hingango ndo ti mbi* apusu mbi ti kiri tënë.   Mo hinga ye so ape? Ngbene ye so a zia zo* na ndö ti sese,+   azo ti sioni adekongo na ngia, me gï teti kete ngoi, na nzerengo terê ti zo so akpe Nzapa pëpe* ayeke gï teti kete ngoi.+   Atâa so kota ti lo amonté juska na yayu na li ti lo andu ambinda,   lo yeke futi biani biani tongana puru ti lo; azo so abâ lo ândö ayeke hunda ndo, atene: ‘Lo yeke na ndo wa?’   Lo yeke huru ti hon tongana bango li, na a yeke wara lo pëpe; a yeke girisa na ndö ti lo hio tongana bango li na bï.   Lê so abâ lo ândö ayeke kiri ti bâ lo pëpe, ndo so lo yeke lani dä ayeke bâ lo mbeni pëpe.+ 10  Amolenge ti lo ayeke voro yanga na awayere ti sara nzoni bê na ala, maboko ti lo wani ayeke kiri na amosoro so lo gbu na awani.+ 11  Abio ti lo angbâ lani na ngangu tongana ti amaseka, me a* yeke lango na yâ ti fuku ti sese legeoko na lo. 12  Tongana sioni ye anzere na yanga ti lo, na lo honde ni na gbe ti langue ti lo, 13  na tongana lo yeke te ni yeke yeke ti mä nzerengo ni nga lo ke ti zi ni, me lo ngbâ ti bata ni na yâ ti yanga ti lo, 14  kobe ni ayeke kpi na yâ ti lo; a yeke ga tongana poison* ti acobra na yâ ti lo. 15  Lo mene mosoro, me lo yeke dë ande ni kue; Nzapa ayeke sara si a ngbâ na yâ ti lo pëpe. 16  Lo yeke su ande ngu ti yanga ti acobra; pembe* ti sioni ngbo ayeke fâ lo. 17  Lo yeke bâ lâ oko pëpe ngu so asua, mafuta ti otoro na beurre so asua tongana ngu. 18  Aye ti mosoro so lo wara ayeke ngbâ na lo pëpe, lo yeke te* ni pëpe; nginza ti ye so lo kä, lo yeke bâ nzoni dä pëpe.+ 19  Lo tambela na ndö ti awayere nga lo dö ala lo zia; lo mû na ngangu da so lo la lo leke ni pëpe. 20  Atâa so kue, lo yeke wara siriri ti bê pëpe; mosoro ti lo ayeke sö lo pëpe. 21  Mbeni ye so angbâ ti tene lo kiri lo te ayeke dä pëpe; ndani la mosoro ti lo ni ayeke ngbâ aninga pëpe. 22  Na ngoi so mosoro ti lo awu ahon ndö ni, gingo bê ayeke hon ndö ti lo; ye ti vundu ayeke ga na ngangu na ndö ti lo. 23  Na ngoi so lo yeke te ye ti tene yâ ti lo asi, ngonzo ti Nzapa* ayeke ga wâ na terê ti lo, a tuku na ndö ti lo, juska na yâ ti kamba ti yâ ti lo. 24  Na ngoi so lo yeke kpe aye ti bira so a sara ni na wen, kokora ti cuivre ayeke pika lo na alê ti kokora. 25  Lo gboto lê ti kokora so alï peko ti lo, lo gboto zango lê ti kokora so alï da ti ngonzo ti lo, na mbeto agbu lo ngangu.+ 26  Bingo so avuko ngangu la ayeke ku amosoro ti lo; wâ so zo ape ni pëpe la ayeke gbi lo ande; ye ti ngangu la ayeke ku azo ti yâ ti tente ti lo so asö kuâ. 27  Yayu ayeke fa faute ti lo na gigi; sese ayeke londo ande na terê ti lo. 28  Ngu so asuku ayeke mû da ti lo ahon na ni; a yeke pika ngangu mingi na lâ ti ngonzo ti Nzapa.* 29  Ye so Nzapa amû na zo ti sioni la, ye so Nzapa amû yanga ti tene a mû na lo la.”

Kete tënë

Na Hébreu: “mbeni yingo so asara si mbi mä yâ ti tënë.”
Wala “azo; Adam.”
Wala “apostat.”
So ti tene ngangu ti lo.
Wala “sengo ye.”
Na Hébreu: “menga.”
Na Hébreu: “mene.”
Na Hébreu: “lo.”
Na Hébreu: “lo.”