Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Job 19:1-29

LI TI ATËNË NI

  • Kiringo tënë ti Job (1-29)

    • Lo ke sukungo ndo ti “akamarade” ti lo (1-6)

    • Lo tene so azo azia lo (13-19)

    • “Zo so ayeke sara mbeni ye ti zi mbi ayeke na fini” (25)

19  Job akiri tënë, atene:  “Juska lawa si ala yeke ngbâ ti son bê ti âme ti mbi*+ nga ti tene atënë so azia vundu na bê ti mbi?+   Fani bale-oko la ala suku na* mbi so; kamene asara ala pëpe ti sara ye ti ngangu na mbi.+   Tongana biani mbi sara faute, faute ti mbi abâ gï mbi.   Tongana ala ngbâ ti sara terê ti ala kota na ndö ti mbi, na ala tene ye ti kamene so asi na mbi ayeke na lege ni,   zia ala hinga so Nzapa la ahanda mbi, na lo gbu mbi na yâ ti gbanda ti lo.   Bâ, mbi yeke dekongo, mbi tene: ‘A yeke sara pasi na mbi!’ me zo oko akiri tënë pëpe;+ mbi ngbâ gï ti dekongo ti tene a mû maboko na mbi, me fango ngbanga ti mbilimbili ayeke dä pëpe.+   A sara gbagba ti tênë ti kanga na lege ti mbi, na mbi lingbi ti hon pëpe; lo sara si bingo amû ndö ti lege ti mbi.+   Lo zi gloire ti mbi, nga lo zi couronne na li ti mbi. 10  Lo kungbi yâ ti terê ti mbi kue, juska mbi futi kue; lo zi beku ti mbi tongana ti so zo agboto keke. 11  Ngonzo ti lo aga wâ na terê ti mbi, nga lo bâ mbi tongana wato ti lo.+ 12  Aturugu ti lo aga ala ngoro mbi na bira, nga ala sara camp na terê ti tente ti mbi. 13  Aita ti mbi wani, lo pusu ala yongoro na terê ti mbi, nga azo so ahinga mbi, ala yeke kpe mbi kpengo.+ 14  Akota kamarade* ti mbi azia mbi, nga azo so mbi hinga ala nzoni agirisa mbi.+ 15  Azo so aga gene na da ti mbi+ nga na angbâa ti mbi ti wali abâ mbi tongana wande; mbi yeke wande na lê ti ala. 16  Mbi iri zo ti kua ti mbi, me lo zi yanga pëpe, mbi dema na lo ti tene lo bâ mawa ti mbi. 17  Pupu ti yanga ti mbi afun sioni na hôn ti wali ti mbi,+ nga mbi fun sioni na hôn ti aita ti mbi wani.* 18  Même akete molenge abâ mbi yeke ye oko na lê ti ala pëpe; tongana mbi londo na nduzu, ala komanse ti he mbi. 19  Akota kamarade ti mbi kue ake mbi,+ nga azo so mbi ye ala atourné na terê ti mbi.+ 20  Poro ti terê ti mbi na nyama ti terê ti mbi acollé na terê ti bio ti mbi,+ na mbi sigi na yanga ti kuâ.* 21  Ala akamarade ti mbi, ala sara nzoni bê na mbi ma! Ala sara nzoni bê na mbi si, ndali ti so maboko ti Nzapa andu mbi.+ 22  Nyen la si ala ngbâ ti sara ye ti ngangu na mbi tongana ti Nzapa so?+ Ndani nyen si ala ngbâ gï ti tiri na mbi* so?+ 23  Âdu fade a sara atënë ti mbi na mbeti, wala tongana a sû ni na yâ ti mbeti, ka a yeke nzoni. 24  Mbi ye si a kpaka ni na ndö ti tênë si a ngbâ lakue lakue, a kpaka ni na mbeni ye ti wen nga na plomb. 25  Mbi hinga so zo so ayeke zi mbi*+ ayeke na fini, lo yeke ga ande nga lo yeke luti na ndö ti sese.* 26  Na peko ti so poro ti terê ti mbi afuti awe, atâa so mbi ngbâ na yâ ti mitele, mbi yeke bâ Nzapa, 27  lo so mbi yeke bâ lo na lê ti mbi wani, lo so mbi la mbi yeke bâ lo ande, me mbeni zo nde pëpe.+ Na yâ ti bê ti mbi kâ, mbi bâ so ye ni so ahon ndö ti mbi awe!* 28  Ala tene: ‘Nyen la afa so e yeke sara ye ti ngangu na lo?’+ so na lê ti ala mbi la mbi yeke na gunda ti kpale ni so? 29  Zia ala sara mbeto ti épée si,+ ndali ti so a yeke fâ ngbanga ti faute na lege ti épée; a yeke nzoni ala hinga so mbeni juge ayeke dä.”+

Kete tënë

Wala “son bê ti mbi.” Bâ na kete bakari.
Wala “zonga.”
Wala “Afami.”
Na Hébreu: “amolenge ti yâ ti mbi,” so ti tene, yâ so adü mbi (yâ ti mama ti mbi).
Na Hébreu: “mbi kpe gï na poro ti pembe ti mbi.”
Na Hébreu: “Ndani nyen si nyama ti terê ti mbi alingbi na ala ape?”
Wala “so ayeke na droit ti futa ye ti zi mbi.”
Na Hébreu: “na ndö ti fuku ti sese.”
Wala “arein ti mbi asara kua encore ape.”