Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Job 16:1-22

LI TI ATËNË NI

  • Kiringo tënë ti Job (1-22)

    • ‘Ala yeke azo ti dengo bê so azia gï vundu na ndö ti vundu’ (2)

    • Lo tene so Nzapa azia lo tongana ye ti pikango ni na kokora (12)

16  Job akiri tënë, atene:  “Mbi mä gbâ ti mara ti tënë tongaso kozo awe. Ala kue ayeke azo ti dengo bê so tënë ti ala azia gï vundu na ndö ti vundu.+   Asenge tënë ni* so ayeke hunzi lawa? Nyen la apusu ala ti tene tënë tongaso?   Mbi kue mbi peut ti tene mara ti tënë ti ala so. Tongana ala yeke fade na place ti mbi,* ka mbi lingbi ti leke atënë ti tene na terê ti ala nga mbi yengi li ti mbi na terê ti ala.+   Ye oko, mbi yeke kpengba ala na atënë ti yanga ti mbi, nga atënë ti dengo bê so asigi na yanga ti mbi ayeke dë bê ti ala.+   Tongana mbi sara tënë, songo ti pasi ti mbi ayeke kaï pëpe.+ Même tongana mbi zia ti sara tënë, songo ni ayeke dë kete?   Me fadeso, Nzapa asara si mbi woko;+ lo futi azo ti da ti mbi kue.*   Mo nga kue mo gbu mbi, na ye so aga ye ti témoin, si ngengo ti mbi afa na lê ti mbi so mbi yeke sioni.   Na yâ ti ngonzo ti lo, lo suru yâ ti mbi kete kete, nga lo bata ngonzo na terê ti mbi.+ Lo te pembe ti lo na terê ti mbi. Wato ti mbi abâ mbi na sioni lê.+ 10  Ala zi yanga ti ala kota na terê ti mbi,+ ala zonga mbi, ala pika ngbangba ti mbi, nga ala bungbi gbani na ndö ti mbi.+ 11  Nzapa azia mbi na maboko ti amaseka-koli, nga lo bi mbi na maboko ti azo ti sioni.+ 12  Kozo lani mbi gi bê ti mbi pëpe, me lo kungbi yâ ti mbi kete kete;+ lo gbu mbi na peko ti go ti mbi, na lo pete mbi na sese, na pekoni lo zia mbi tongana ye ti pikango ni na kokora. 13  Azo ti lo ti pikango kokora angoro mbi;+ lo kpo yâ ti arein ti mbi+ na lo bâ mawa ti mbi pëpe; lo tuku ngu ti yâ ti da ti ngonzo ti mbi na sese. 14  Mbi ga tongana mbeni gbagba so lo yeke kôro adû dä; lo ga ti sara bira na mbi, tongana mbeni ngangu zo ti bira. 15  Mbi fü bongo ti vundu ti kanga na terê ti mbi,+ nga mbi zia nengo* ti mbi na yâ ti fuku ti sese.+ 16  Lê ti mbi abe na toto,+ poro ti lê ti mbi avuko pitipiti,* 17  atâa so maboko ti mbi asara ye ti ngangu na zo pëpe nga sambela ti mbi ayeke nzoni. 18  Sese, mo kanga ndö ti mênë ti mbi pëpe!+ Zia si toto ti mbi akaï pëpe! 19  Même fadeso, témoin ti mbi ayeke na yayu, lo so alingbi ti duti témoin ti mbi ayeke na nduzu kâ. 20  Akamarade ti mbi ahe mbi;+ na oko ngoi ni, mbi yeke toto na ngu ti lê na Nzapa.*+ 21  Zia mbeni zo afâ ngbanga na popo ti zo na Nzapa, tongana ti so zo ayeke fâ ngbanga na popo ti mbeni zo na mba ti lo.+ 22  Angu so angbâ ayeke mingi pëpe, na mbi yeke mû lege ti hon na lege so zo ayeke kiri pëpe.+

Kete tënë

Wala “Atënë so ayeke tongana pupu so aya na ngangu.”
Wala “Tongana âme ti ala ayeke na place so âme ti mbi ayeke dä.”
Wala “azo so ayeke bungbi na terê ti mbi.”
Wala “ngangu.” Na Hébreu: “didi.”
Wala “gbe ti dê ti kuâ ayeke na ndö ti poro ti lê ti mbi.”
A lingbi nga ti tene “mbi yeke bâ ndo na mbage ti Nzapa, na mbi lango gbä.”