Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Job 12:1-25

LI TI ATËNË NI

  • Kiringo tënë ti Job (1-25)

    • “Mbi yeke kete na gbe ti ala pëpe” (3)

    • ‘Mbi ga ye ti ngia na lê ti azo’ (4)

    • ‘Ndara ayeke na Nzapa’ (13)

    • Nzapa ayeke na ndö ti ajuge na agbia (17, 18)

12  Job akiri tënë, atene:  “Biani, ala la ayeke azo so ahinga ndo,* na tongana ala kui awe, ndara nga ayeke dä mbeni pëpe!   Me mbi nga kue mbi hinga ndo.* Mbi yeke kete na gbe ti ala pëpe. Zo wa la ahinga aye ni so ape zo wa?   Mbi ga ye ti ngia na lê ti akamarade ti mbi,+ mbi so mbi dekongo na Nzapa ti tene lo kiri tënë na mbi.+ Zo ti mbilimbili so tënë ayeke na li ti lo pëpe aga ye ti ngia.   Zo so ayeke na gingo bê pëpe abâ ti lo so ye ti vundu alingbi ti si na lo pëpe, lo pensé so a yeke si gï na ala so gere ti ala aluti nzoni pëpe.*   Siriri ayeke na yâ ti atente ti azo ti nzi,+ na azo so agi yanga ti Nzapa ayeke duti nzoni,+ azo so nzapa ti ala ayeke na maboko ti ala.   Ye oko, hunda anyama, na ala yeke fa ye na mo; hunda andeke ti nduzu, na ala yeke tene na mo.   Wala bi lê na mbage ti* sese, na lo yeke fa ye na mo; asusu ti ngu-ingo ayeke tene ni na mo.   Na popo ti aye so kue so, lo so wa la ahinga ape so Jéhovah la asara ni na maboko ti lo? 10  Fini ti aye kue so ayeke na fini* nga na yingo* ti azo kue* ayeke na maboko ti lo.+ 11  Mê ayeke tara tënë tongana ti so langue ayeke tara kobe ape?+ 12  A yeke wara ndara na popo ti ambakoro ape?+ Nga zo so ate gigi la ayeke mä yâ ti ye ape? 13  Ndara na ngangu ayeke na Nzapa;+ lo hinga ti mû wango nga lo hinga ti mä yâ ti ye.+ 14  Tongana lo kungbi mbeni ye na sese, a lingbi ti kiri ti leke ni pëpe;+ tongana lo kanga ye, zo alingbi ti zi ni pëpe. 15  Tongana lo gbanzi ngu, ye kue ahule;+ tongana lo tokua ni, a mû ndö ti sese kue.+ 16  Ngangu na tâ ndara ayeke na lo;+ zo so agirisa lege nga na zo so asara si zo agirisa lege, lo yeke na ngangu na ndö ti ala; 17  lo sara si awawango atambela gere senge,* nga lo sara si ajuge aga azo ti buba.+ 18  Lo woko yâ ti akamba so agbia akanga azo na ni,+ na lo kanga ceinture na gbe ti yâ ti agbia ni. 19  Lo sara si aprêtre atambela gere senge,+ na lo kinda azo so gere ti komandema ti ala aluti nzoni;+ 20  lo sara si awawango so zo asara confiance na ala ahinga tënë ti tenengo ni pëpe, nga lo sara si ambakoro* ahinga ti gbu li nzoni pëpe; 21  lo sara si a ne akota zo ti kodro ti ala pëpe,+ na lo sara si azo ti ngangu awoko;* 22  aye so ayeke kâ na yâ ti vukongo ndo, lo sigi na ni,+ na lo sara si lumière aza na ndö ti ando so ayeke bingo; 23  lo sara si amara aga ngangu, tongaso si a futi ala; lo sara si sese ti ala akono ahon ti kozo, si lo lingbi ti gue na ala na ngbâa. 24  Lo sara si amokonzi ti azo amä yâ ti ye* pëpe, na lo sara si ala fono gï tongaso na yâ ti benyama so lege ayeke dä pëpe.+ 25  Ala yeke tatara ndo na yâ ti bingo,+ ndo so lumière ayeke dä pëpe, lo sara si ala tambela kirikiri tongana azo so asoulé.+

Kete tënë

Na Hébreu: “ala la ayeke azo ni.”
Na Hébreu: “mbi yeke na bê.”
Wala “ayeke na ndo so ayeke dongo dongo.”
A lingbi nga ti tene “sara tënë na.”
Wala “Âme ti azo kue so ayeke na fini.”
Wala “pupu.”
Na Hébreu: “zo kue so ayeke zo na yâ ti mitele.”
Wala “na ye oko na terê ti ala pëpe.”
Wala “a-ancien.”
Na Hébreu: “lo woko yâ ti ceinture ti azo ti ngangu.”
Na Hébreu: “ayeke na bê.”